پرەزيدەنت قاسىم-جومارت توقاەۆ كلاسسيكالىق شاحمات بويىنشا الەم چەمپيونى اتاعى ءۇشىن سايىسقا تۇسكەن يان نەپومنياششي مەن دين ليجەندى، سونداي-اق حالىقارالىق شاحمات فەدەراتسياسىنىڭ (فيدە) پرەزيدەنتى اركادي دۆوركوۆيچتى قابىلدادى. بۇل تۋرالى اقوردا حابارلادى. 

مەملەكەت باسشىسى قوناقتارعا ءىلتيپات بىلدىرە وتىرىپ، فيدە اياسىنداعى ايگىلى سپورتشىلار قاتىسقان ەڭ بەدەلدى ءتۋرنيردىڭ جوعارى دەڭگەيدە ۇيىمداستىرىلعانىن اتاپ ءوتتى.

– مەن، ەڭ الدىمەن، دين ليجەن مىرزانى  تارتىستى وتكەن سايىستا الەم چەمپونى اتاعىن جەڭىپ الۋىمەن قۇتتىقتاعىم كەلەدى. سونداي-اق گروسسمەيستەر يان نەپومنياششيگە كورسەتكەن شەبەرلىگى ءۇشىن قۇرمەتىمدى بىلدىرەمىن. الەمنىڭ بۇكىل شاحمات قوعامداستىعى تۋرنيرگە نازار اۋداردى.  شاحمات جانكۇيەرلەرى شارشى تاقتاداعى ويىندى ءجىتى باقىلادى. تۋرنير ءساتتى ءوتتى دەپ ەسەپتەيمىن، – دەدى پرەزيدەنت.

مەملەكەت باسشىسى قازاقستاندا شاحماتتى دامىتۋعا ايرىقشا كوڭىل بولىنەتىنىن  ايتتى.

– بۇگىندە ەلىمىزدە 200 مىڭنان اسا ادام شاحماتپەن شۇعىلدانادى. قازاقستان رەسپۋبليكاسى شاحمات فەدەراتسياسىنىڭ كومەگىمەن جانە فيدە-ءنىڭ اتسالۋىمەن بۇل كورسەتكىش كەمىندە ەكى ەسە ارتۋعا ءتيىس. قازاقستاندا شاحمات ءتيىستى دەڭگەيدە داميدى، – دەدى قاسىم-جومارت توقاەۆ.

ءوز كەزەگىندە حالىقارالىق شاحمات فەدەراتسياسىنىڭ باسشىسى اركادي دۆوركوۆيچ قۇرمەت كورسەتكەنى ءۇشىن پرەزيدەنتكە العىس ايتتى.

– ءبىزدىڭ سوڭعى كەزدەسۋىمىزدەن بەرى 7 ايعا جۋىق ۋاقىت ءوتتى. وسى ۋاقىت ارالىعىندا ءسىزدىڭ جان-جاقتى قولداۋىڭىزبەن قازاقستاندا بەس الەم چەمپيوناتىن وتكىزدىك. شاحمات سپورتى قازاقستاندا قانشالىقتى تانىمال ەكەنىنە كۋامىز. تسيفرلار تاڭعالدىرادى. ءارى ول كەلەشەكتە ارتا  تۇسەدى. مەن بۇعان سەنىمدىمىن. ويتكەنى مەملەكەتتىك پەن دەمەۋشىلەر تاراپىنان كورسەتىلەتىن قولداۋ ارقاشان جاقسى ناتيجە بەرەدى، – دەدى فيدە پرەزيدەنتى.

قىتاي گروسسمەيسترى دين ليجەن وسى ماتچقا شاقىرتۋ العانى ءۇشىن  مەملەكەت باسشىسىنا العىس ايتتى.

– سىزبەن كەزدەسۋ – ءبىز ءۇشىن  زور مارتەبە. وسى تۋرنيرگە قاتىسىپ، جەڭىسكە جەتكەنىم ءۇشىن قۋانىشتىمىن. ويىننان كەرەمەت ءلاززات الدىم، – دەدى ول.

ءوز كەزەگىندە گروسسمەيستەر يان نەپومنياششي قازاقستاندا شاحماتقا قىزىعۋشىلىق جوعارى ەكەنىنە نازار اۋداردى.

– ماتچ ۇيىمداستىرۋشىلارىنا، ەلىڭىزگە العىس ايتامىن. ءسىزدىڭ ەلىڭىزدە شاحماتقا دەگەن قىزىعۋشىلىق ۇدايى ارتىپ كەلە جاتقانىن كورىپ وتىرمىن. فەدەراتسيانىڭ جاڭا باسشىلىعىمەن دۇرىس باعىتتا دامىپ جاتىرسىزدار، – دەدى ول.

كەزدەسۋ سوڭىندا پرەزيدەنت شاحماتشىلاردىڭ بيىك بەلەستەردى باعىندىرۋىنا تىلەكتەستىك ءبىلدىردى. سونداي-اق فيدە-مەن اراداعى ىنتىماقتاستىقتى ودان ءارى جالعاستىرۋ ماڭىزدى ەكەنىن اتاپ ءوتتى.

Abai.kz