سوتتالعان بەلسەندى جانبولات مامايدىڭ جۇبايى ينگا يمانباي بۇۇ  بۇۇ ءجونسىز ۇستاۋلار جونىندەگى جۇمىس توبىنىڭ تىركەلمەگەن دەمپارتيا جەتەكشىسىنىڭ ىسىنە قاتىستى ەسەبىن جاريالادى، دەپ حابارلايدى Ulysmedia.kz.

«بەلگىلى قۇقىق قورعاۋشى انار يبراەۆانىڭ ارىزىنا وراي، بۇۇ ءجونسىز ۇستاۋلار جونىندەگى جۇمىس توبى دەمپارتيا جەتەكشىسى جانبولات ماماي ءىسى بويىنشا پىكىرىن جاريالادى. بۇل قۇجاتتا جانبولات مامايدى قورعاۋ تارابىنىڭ جانە قازاقستان ۇكىمەتىنىڭ جاۋابى كورسەتىلگەن. كەلتىرىلگەن دەرەكتەرگە سۇيەنە وتىرىپ، بۇۇ جۇمىس توبى بىلاي دەدى: «جۇمىس توبى ماماي مىرزانى باس بوستاندىعىنان ايىرۋ ءجونسىز دەپ سانايدى، سەبەبى ول ادام قۇقىقتارىنىڭ جالپىعا بىردەي دەكلاراتسياسىنىڭ 19 جانە 20-باپتارىنا سايكەس كەپىلدىك بەرىلگەن قۇقىقتار مەن بوستاندىقتاردى جۇزەگە اسىرۋ اياسىندا ارەكەت ەتتى»، – دەپ جازدى جۋرناليست.

سونداي-اق، بۇۇ ءجونسىز ۇستاۋلار جونىندەگى جۇمىس توبى قازاقستان ۇكىمەتىنە ۇندەۋ جاساعان.

«جۇمىس توبى قازاقستان ۇكىمەتىنەن ماماي مىرزانىڭ جاعدايىن دەرەۋ تۇزەتۋدى جانە ونى ءتيىستى حالىقارالىق نورمالارعا، ونىڭ ىشىندە ادام قۇقىقتارىنىڭ جالپىعا بىردەي دەكلاراتسياسىندا جانە ازاماتتىق جانە ساياسي قۇقىقتار تۋرالى حالىقارالىق پاكتىدە باياندالعان نورمالارعا سايكەس كەلتىرۋ ءۇشىن قاجەتتى شارالار قابىلداۋدى سۇرايدى»، – دەلىنگەن جازبادا.

سونىمەن بىرگە، بۇۇ وكىلدەرى قازاقستان ۇكىمەتىنە جانبولات مامايدىڭ وتەماقى تالاپ ەتۋىنە قۇقىعى بولۋى كەرەگىن دە ەسكە سالادى. بۇل ەسەپ بويىنشا قر ۇكىمەتى بۇۇ-عا التى ايدىڭ ىشىندە جاۋاپ بەرۋى قاجەتتىگىن ايتا وتىرىپ، ولاي بولماعان جاعدايدا ءوز تاراپىنان ارەكەتتەر جاسالاتىنىن دا كورسەتتى.

ء“بىر سوزبەن ايتقاندا، بۇۇ جانبولات مامايعا اراشا ءتۇستى دەگەن ءسوز! ونى قۋدالاۋدىڭ ءجونسىز ءارى حالىقارالىق نورمالارعا قايشى ەكەنىن باسا ايتتى. بۇل ءسوزسىز، ۇلكەن جەڭىس! بيلىك بۇۇ جۇمىس توبىنىڭ، باسقا دا بەدەلدى حالىقارالىق ۇيىمداردىڭ تالاپ تىلەگىن ەسكەرۋسىز قالدىرماۋى ءتيىس دەپ سانايمىز. جانبولات ماماي دەرەۋ اقتالىپ، بوستاندىققا شىعۋى كەرەك!”، – دەدى ينگا يمانباي.

بۇدان بۇرىن حابارلاعانىمىزداي، سوت جانبولات مامايدى 6 جىلعا شارتتى تۇردە سوتتادى. وعان قوعامدىق-ساياسي جۇمىسپەن اينالىسۋعا تىيىم سالىندى.

جانبولات مامايعا «قاساقانا جالعان اقپارات تاراتۋ» (274-باپ), «بيلىك وكىلىن قورلاۋ» (378-باپ) جانە «جاپپاي تارتىپسىزدىكتەر ۇيىمداستىرۋ» (272-باپ) بويىنشا ايىپتار تاعىلعان ەدى. العاشقى ەكى ايىپتاۋ 2021 جىلعى وقيعالارعا، ال ءۇشىنشىسى 2022 جىلعى قاڭتارداعى وقيعالارعا قاتىستى.

«بيلىك وكىلىن قورلادى» دەگەن ايىپ تاعىلعان بەلسەندى سوتتا ناقتى ەسىمدەردى اتاماعانىن، قۇقىق قورعاۋ جۇيەسىن سىنعا العانىن ايتقان. ادەيى جالعان اقپارات تاراتقان مالىمەت بويىنشا، ماماي ونىڭ قاتىسى بار ەكەندىگى تۋرالى ناقتى دالەلدەر جوق ەكەنىن ايتتى.

27 ناۋرىزدا وتكەن سوت وتىرىسىندا سويلەگەن سوزىندە جانبولات ماماي وزىنە تاعىلعان ايىپپەن كەلىسپەيتىنىن مالىمدەگەن. پروكۋرور ونى 6,6 جىلعا باس بوستاندىعىنان ايىرۋدى سۇرادى.

بۇدان بۇرىن Freedom House حالىقارالىق قۇقىق قورعاۋ ۇيىمى پروكۋراتۋرانىڭ مامايعا جاپپاي تارتىپسىزدىكتەر ۇيىمداستىردى ايىپ تاعۋىن نەگىزسىز دەپ ەسەپتەيتىنىن مالىمدەگەن. 10 اقپاندا وتكەن سوت وتىرىسىندا جانبولات مامايدىڭ قورعاۋشىسى سۋدياعا سەنىمسىزدىك تانىتقان. سەبەبى، ول بۇرىن پروتسەستە باقىلاۋشى بولعان ادامداردى كۋا رەتىندە سۇراۋدان باس تارتتى. ال ولاردىڭ اراسىندا بەلگىلى ساياساتكەر تولەگەن جۇكەەۆ پەن دەمپارتيا باستاماشىل توبىنىڭ مۇشەسى داۋرەن دوستياروۆ تا بار. ولار وتە ماڭىزدى مالىمەت بەرە الاتىن كۋاگەرلەر. سەبەبى، ءدال سول «الماتى ارەنا» ماڭىندا بولعان وقيعالاردى باستان اياق كوزىمەن كورگەن، قۇلاعىمەن ەستىگەن.

جۋىردا حالىقارالىق Freedom Now ۇيىمىنىڭ وكىلدەرى جانبولات مامايدىڭ ءىسىن ءجىتى قاداعالاپ وتىرعاندارىن مالىمدەپ، قاجەت بولعان جاعدايدا ونىڭ مۇددەسىن حالىقارالىق سوتتا قورعاۋعا دايىن ەكەندەرىن جەتكىزگەن.

Abai.kz