بۇگىن استانادا كۆازيمەملەكەتتىك سەكتورىندا ايەل باسشىلاردى دايارلاۋ بويىنشا «گەندەرلىك تەڭدىك» باعدارلاماسىنىڭ ءبىتىرۋ ءراسىمى ءوتتى. «سامۇرىق-قازىنا» اق كومپانيالار توبىنىڭ بۇل وقۋ جوباسى قازاقستان رەسپۋبليكاسىنىڭ پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن قۇرىلعان جانە كۆازيمەملەكەتتىك سەكتورىنداعى كومپانيالار مەن ۇيىمداردىڭ باسقارۋشى ورگاندارىندا ايەلدەردىڭ ۇلەسىن ارتتىرۋعا باعىتتالعان.

جوبا قر پرەزيدەنتىنىڭ مەملەكەت قاتىساتىن كومپانيالارداعى باسشىلىق لاۋازىمدارداعى ايەلدەردىڭ 30%-دىق وكىلدىگى تۋرالى تاپسىرماسىن ىسكە اسىرۋ تەتىكتەرىنىڭ بىرىنە اينالدى.

سالتاناتتى راسىمدە پرەزيدەنت اكىمشىلىگى باسشىسىنىڭ ورىنباسارى، پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ايدا بالاەۆا:

«ۇلتتىق كوميسسيا قوعامدىق نەگىزدە جۇمىس ىستەيتىن جانە بەلگىلى ءبىر سالانىڭ دامۋىنا جانە قوعامنىڭ وزەكتى ماسەلەلەرىن شەشۋگە ۇلكەن ۇلەس قوساتىن وتە بەلسەندى جانە پەرسپەكتيۆالى ايەلدەردەن تۇرادى.

بۇگىندە ايەلدەر قوزعالىسى جاڭا جارقىن وكىلدەرمەن جانە كوشباسشىلارمەن تولىقتىرىلۋدا. سىزدەردىڭ ارقايسىڭىزدىڭ قازاقستاندىق قوعامداعى ايەلدەردىڭ جاعدايىن جاقسارتۋعا ىقپال ەتەتىن ءوز يدەيالارىڭىز، باستامالارىڭىز، جوبالارىڭىز بار ەكەنىنە سەنىمدىمىن. مەنىڭ ويىمشا، ايەلدەردى ءارتۇرلى كومپانيالاردىڭ ديرەكتورلار كەڭەسىنە قوسۋدى كوزدەيتىن بۇگىنگى جوبامىز بىرەگەي»،- دەپ اتاپ ءوتتى.

«سامۇرىق-قازىنا» باسقارما توراعاسى نۇرلان جاقىپوۆ ءوز سوزىندە:

«بۇگىن كومپانيالاردى باسقارۋعا باعىتتالعان تاسىلدەردى جەتىلدىرۋدىڭ وتە ماڭىزدى كەزەڭىن اياقتاپ وتىرمىز. بىزدە شەشىم قابىلداۋ دەڭگەيىندە جۇمىس ىستەۋگە دايىن ايەلدەر پۋلى بار. ءبىزدىڭ كوشباسشىلاردى دايارلاۋ تاجىريبەمىز بۇكىل ەلگە پايدالى بولاتىنىنا سەنىمدىمىن جانە ءبىز ونى بولىسۋگە دايىنبىز»،- اتاپ ءوتتى.

بۇگىنگى تاڭدا «سامۇرىق-قازىنا» توبىندا 259,5 مىڭ ادام، ونىڭ ىشىندە 72 مىڭ ايەل جۇمىس ىستەيدى. 8,5 مىڭعا جۋىعى ءبولىم باستىعى لاۋازىمىنان باستاپ باسشىلىق لاۋازىمعا دەيىن قىزمەتتە. بۇل جالپى باسشىلار سانىنىڭ شامامەن ۇشتەن ءبىر بولىگى. دەگەنمەن جوعارى باسشىلىقتا (باسقارمالار، ديرەكتورلار كەڭەستەرى، بايقاۋ كەڭەستەرىندە) ايەلدەردىڭ ۇلەسى تەك 15%.

بۇل كورسەتكىشتى 2023 جىلى 20%-عا دەيىن جانە 2030 جىلعا قاراي 30%-عا دەيىن ارتتىرۋ بويىنشا قادامدار قابىلدانۋدا. وسىعان بايلانىستى ايەلدەر كوشباسشىلىعى داعدىلارىن قالىپتاستىرۋ، ايەل كوشباسشىلاردى ىنتالاندىرۋ جانە ىلگەرىلەتۋ، گەندەرلىك تەڭدىك باسىمدىقتارىنا قول جەتكىزۋ جونىندەگى ورتانى دامىتۋ ءۇشىن جاعدايلار جاسالادى.

وسى مىندەتتەردى ىسكە اسىرۋدىڭ ءتيىمدى قۇرالدارىنىڭ ءبىرى «گەندەرلىك تەڭدىك» باعدارلاماسى بولدى. «گەندەرلىك تەڭدىك» باعدارلاماسىنىڭ ارقاسىندا قازاقستاننىڭ تۇكپىر-تۇكپىرىنەن باسقارۋشىلىق تاجىريبەسى بار «سامۇرىق-قازىنا» كومپانيالار توبىنىڭ قىزمەتكەرلەرى مەملەكەتتىك كومپانيالاردىڭ ديرەكتورلار كەڭەستەرى مەن بايقاۋ كەڭەستەرىنىڭ قۇرامىنا كىرۋ ءۇشىن مەنەدجمەنتتىڭ قوسىمشا كۋرستارىنان ءوتتى. بۇگىن 71 ايەل كۋرستى اياقتاپ، سەرتيفيكات الدى. 15 تۇلەك ورتالىق مەملەكەتتىك ورگاندار، ايەلدەر ىستەرى جانە وتباسىلىق-دەموگرافيالىق ساياسات جونىندەگى وڭىرلىك كوميسسيالار جانىنداعى ساراپتامالىق توپتارعا ەنگىزىلگەن. تاعى 10 قاتىسۋشى مەملەكەتتىك كومپانيالاردىڭ باسقارۋ ورگاندارىنا قابىلداندى.

Abai.kz