1 شىلدەدەن باستاپ پوليتسيا تۇرمىستىق زورلىق-زومبىلىق فاكتىلەرىن جابىرلەنۋشىنىڭ شاعىمىنسىز تىركەيدى.

«1 شىلدەدەن باستاپ پوليتسيا تۇرمىستىق قۇقىق بۇزۋشىلىقتاردى تىركەۋدى ءوتىنىش بەرۋ سيپاتىنان انىقتاۋ سيپاتىنا اۋىستىرادى. جاڭا تۇزەتۋلەر جابىرلەنۋشىلەردىڭ ءوتىنىشىنسىز اكىمشىلىك قۇقىق بۇزۋشىلىق تۋرالى ءىس قوزعاۋعا مۇمكىندىك بەرەدى. ياعني، تۇرمىستىق زورلىق-زومبىلىق جاساۋ فاكتىسى بويىنشا. حاتتاما جاساۋ ءۇشىن كۋاگەرلەردىڭ، كورشىلەردىڭ ايعاقتارى، بەينەباقىلاۋ كامەرالارى مەن بەينەتىركەگىش جازبالارى جەتكىلىكتى بولادى. سوڭعى شەشىمدى سوت قابىلدايدى»، - دەپ مالىمدەدى اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقمارال سەرىكباەۆا.

سونىمەن قاتار، 1 شىلدەدەن باستاپ تاراپتاردى قايتا تاتۋلاستىرۋ مۇمكىندىگى الىنىپ تاستالادى. قازىر مۇنداي ىستەردىڭ جارتىسى تاتۋلاسۋمەن اياقتالىپ، سوتقا جەتپەي جاتىر.

«مىسالى، جىل باسىنان بەرى تۇرمىستىق زورلىق-زومبىلىقتىڭ 5 مىڭ فاكتىسى وسى نەگىزدەر بويىنشا توقتاتىلدى. ەندى 1 شىلدەدەن باستاپ سوتتا ءبىر رەت قانا تاتۋلاسۋعا مۇمكىن بولادى. بۇل پسيحولوگيالىق قىسىمنان تۋىندايتىن زارداپ شەككەندەرگە قاتىستى قاتال ارەكەتتەردى توقتاتۋعا مۇمكىندىك بەرەدى»، - دەپ تۇيىندەدى اقمارال سەرىكباەۆا.

Abai.kz