سوت ايىپتالۋشىلاردىڭ بارلىعىنا ء(بىر ادام – دۋمان قاناتبەك قاڭتار وقيعاسىندا قازا بولعان) شارتتى جازا بەردى.
– قاماۋدا بولعانداردىڭ بارلىعى بوساتىلدى. شارتتى جازا العاندار پروباتسيالىق باقىلاۋدا بولادى، – دەپ حابارلادى ادۆوكات اينارا ايدارحان ازاتتىققا.
بۇعان دەيىن پروكۋرور بارلىق 25 ادامدى كىنالى دەپ تانۋدى، 13 ادامعا شارتتى جازا، قالعاندارىنا ەكى جىلدان ءتورت جىلعا دەيىن باس بوستاندىعىنان ايىرۋ جازاسىن بەرۋدى سۇراعان ەدى. ايىپتالۋشىلاردىڭ ءبىرى دۋمان قاناتبەك قاڭتاردا وققا ۇشقان. پروكۋرور ونى دا كىنالى دەپ تانۋدى، قايتىس بولۋىنا بايلانىستى ءىستى توقتاتۋدى سۇراعان. سوت پروكۋروردىڭ ءوتىنىشىن ورىندادى. دۋمان قاناتبەكتىڭ اكەسى اكىمبەك قالىبەكوۆ ۇلىن كىنالى دەپ تانىعانىنا كەلىسپەي، ۇكىمدى اپەللياتسياعا بەرەتىنىن ايتتى.
ايىپتالۋشىلارعا نەگىزىنەن "جاپپاي تارتىپسىزدىكتى ۇيىمداستىردى جانە وعان قاتىستى", "قارۋ-جاراق ۇرلادى", "عيماراتتارعا شابۋىل جاسادى" دەگەن ايىپتار تاعىلعان. ايىپتالۋشىلاردىڭ باسىم بولىگى تاعىلعان ايىپقا كەلىسپەيدى، كەيبىرى ايىپتى ءىشىنارا مويىنداعان. ادۆوكات اينارا ايدارحان ۇكىمدى تولىق قولعا العاننان كەيىن ايىپتالۋشىلار اپەللياتسياعا بەرۋ-بەرمەۋ ماسەلەسىن شەشەدى دەدى.
- 238 ادامنىڭ ءومىرىن قيعان قاڭتار قىرعىنى بويىنشا سوت پروتسەستەرى اياقتالىپ كەلەدى. باس پروكۋراتۋرانىڭ مالىمەتىنشە، ەلدە 1600-دەن استام ادامعا قاڭتارعا بايلانىستى ۇكىم شىققان. الماتى، تاراز، شىمكەنت، اقتوبە، سەمەي، قىزىلوردا، اتىراۋ جانە تالدىقورعان قالالارىندا جۇزدەگەن ادامنىڭ سوتى وتكەن. ولارعا "جاپپاي تارتىپسىزدىك", "قارۋ-جاراق ۇرلاۋ", "عيماراتتاردى باسىپ الۋ" جانە وزگە دە باپتار بويىنشا ايىپ تاعىلعان.
- وسىعان دەيىن كەيبىر ايىپتالۋشىلاردىڭ جاقىندارى مەن ادۆوكاتتارى تەرگەۋ ورگاندارى ىستەردى "بىرجاقتى قاراعانىن" ايتىپ، "تەرگەۋ ورگاندارىنىڭ ادىلەتسىزدىگىنە" شاعىمدانعان. قاڭتار كەزىندە جاقىندارىنان ايىرىلعان ازاماتتار قازا بولعان مارقۇمداردى اقتاۋدى تالاپ ەتىپ، استاناعا دەيىن دە بارعان. ولار "جاقىندارىنىڭ قاڭتارداعى تارتىپسىزدىكتەرگە قاتىسى بارىن دالەلدەيتىن ەشقانداي ايعاق جوعىن" ايتىپ، "ادىلەتسىز ۇكىمدەردىڭ" كۇشىن جويۋدى سۇراعان. وسىعان قاتىستى سۇراقتارعا جاۋاپ بەرگەن بيلىك پەن قۇقىق قورعاۋ ورگان وكىلدەرى "تەرگەۋ مەن سوت پروتسەستەرى ءالى تولىق اياقتالماعانىن" العا تارتىپ كەلەدى.
- قاڭتار كەزىندە وققا ۇشقان جانە ازاپتالعان ازاماتتارعا قاتىستى شاعىمداردىڭ باسىم بولىگى قارالماعانىن قۇقىق قورعاۋشىلار مەن بەلسەندىلەر، ساياساتكەرلەر سىناعان.
- قاڭتارعا بايلانىستى قۇقىق قورعاۋ ورگاندارىنىڭ لاۋازىمدى تۇلعالارى مەن قىزمەتكەرلەرىنىڭ بىرقاتارى "بيلىك وكىلەتىن اسىرا پايدالانۋ", "ارەكەتسىزدىك تانىتۋ", "ازاپتاۋ" باپتارى بويىنشا جاۋاپقا تارتىلعان. الايدا قۇقىق قورعاۋشىلار "قاڭتارداعى قانتوگىستىڭ شىندىعى تولىق اشىلمادى، بەيبىت نارازىلاردىڭ ولىمىنە كىنالىلەر تولىق جاۋاپقا تارتىلعان جوق" دەپ ەسەپتەيدى. بيلىك قاڭتاردى حالىقارالىق دارەجەدە تەرگەۋدى ۇسىنعان قۇقىق قورعاۋشىلاردىڭ ۇسىنىسىن كەرى قايتارعان.
Abai.kz
