سەيسەنبى, 3 قازان 2023
ءۇشبۋ حات 2400 20 پىكىر 22 مامىر, 2023 ساعات 18:01

جانپيدالىق جاساعان ازامات ەدى!

                                          قازاقستان رەسپۋبليكاسىنىڭ
                                                     پرەزيدەنتى ق.ك.توقاەۆ مىرزاعا!

قۇرمەتتى قاسىم-جومارت كەمەلۇلى!

قازاقستانعا 40 جىل بويى تاجال بولىپ، ەرتىس بويى تۇرعىندارىنىڭ جۇزدەگەن كارى-جاسىن اجالعا جەم ەتىپ، مىڭداعانىن مۇگەدەكتىككە ۇشىراتقان سەمەي اتوم-يادرولىق پوليگونىن جاپتىرۋعا العاش رەسمي قارسىلىق جاساعان، 1989-جىلى اقپان ايىنىڭ 20-كۇنى سوكپ ورتالىق كوميتەتىنىڭ باس حاتشىسى م.گورباچەۆقا پوليگونداعى سىناۋدى شەكتەپ، باسقا جاققا كوشىرۋدى تالاپ ەتىپ جەدەلحات جازعان ازاماتىمىز كەشىرىم بوزتاەۆتىڭ تۋعانىنا الدىمىزداعى شىلدە ايىندا 90 جىل تولادى.

كەشىرىمنىڭ حاتى كرەملدى، ارينە، دۇرلىكتىردى. گورباچەۆ قۇرعان مەملەكەتتىك كوميسسيا اقپاننىڭ 28-كۇنى كۋرچاتوۆ قالاسىنا، ودان سوڭ  سەمەيگە كەلىپ، جۇرتشىلىقپەن بىرنەشە كەزدەسۋ وتكىزدى. سودان كەيىن وبلىس پارتيا كوميتەتىنىڭ 1-حاتشىسى كەشىرىم بوزتاەۆتىڭ كابينەتىندە پوليگون ماسەلەسىن تالقىلاۋ جونىندە بىرلەسكەن ءماجىلىس وتكىزىلەدى. ءوزىنىڭ اۋزىن جابۋعا كەلگەنىن بىلگەن ك.بوزتاەۆ كوميسسيامەن قاتتى ايتىسىپ، اقىرىندا جەڭگەن. ول ءماجىلىستىڭ ستەنوگرافيالىق ەسەبىن وقىعاندار: «ءبىزدىڭ كەشىرىم بوزتاەۆ – ناعىز قاھارمان!» دەپ ءجۇردى.

1993-جىلى، ك.بوزتاەۆتى جاسىنىڭ الپىسقا تولۋىمەن قۇتتىقتاعان  حاتىندا پرەزيدەنت ن.ءا.نازارباەۆ مىرزا بىلاي دەپتى ء(ۇزىندى):

«قۇرمەتتى كەشىرىم بوزتايۇلى!

ومىرىڭىزدەگى اسا ەلەۋلى ءجايت – جاسىڭىزدىڭ 60-قا تولۋىمەن شىن جۇرەكتەن قۇتتىقتايمىن!

...ءسىزدىڭ سەمەي يادرولىق پوليگونىن جابۋ تۋرالى ماسەلەنى شەشۋگە، اتومدىق سىناۋلاردان زارداپ شەككەن جۇرتشىلىققا الەۋمەتتىك قامقورلىق كورسەتۋ جۇيەسىن جاساۋعا قوسقان ۇلەسىڭىز تەڭدەسسىز!..

كەشىرىم بوزتايۇلى، ىستىق ىقىلاسپەن قۇتتىقتاپ، مىقتى دەنساۋلىق، ۇزاق عۇمىر، مول باقىت تىلەيمىن!

قازاقستان رەسپۋبليكاسىنىڭ پرەزيدەنتى -  ن. نازارباەۆ.

25 ماۋسىم، 1993 ج.  الماتى قالاسى».

اقيقاتتى ايتقان!

الايدا، ك.بوزتاەۆ قايتىس بولعاننان (1999 ج.) كەيىندە: «سەمەي پوليگونىن ءبىز جاپتىق!»; «سەمەيدەگى اتوم-يادرولىق پوليگوندى مەن جاپتىردىم!»; «پوليگوندى ءبىز ەمەس، ءبىر وبكوم سەكرەتارى جاپتى-اۋ؟!» دەگەندەي داقپىرتتى ءسوز كوبەيدى. اقىرىندا پوليگون جايىندا رەسمي جيىندار وتكىزىلگەندە ك.بوزتاەۆتىڭ اتى-ءجونى اتالمايتىن بولدى. ءالى دە سولاي. وتە وكىنىشتى!.. «ەلىم ءۇشىن، حالقىم ءۇشىن جانىمدى قيۋعا بارمىن!» دەگەن ناعىز ادامنىڭ، ازاماتتىڭ ارۋاعىن اتتاپ كەتۋ، ءتىپتى مۇسىلماندىققا جات قارەكەت ەمەس پە؟!

قۇرمەتتى قاسىم-جومارت كەمەلۇلى! سەمەي پوليگونىنا قارسى كۇرەستى رەسمي جولمەن باستاپ، حالىقتىڭ، كسرو عىلىم اكادەمياسىنىڭ ۆيتسە-پرەزيدەنتى ە.ۆەليحوۆ، باسقا دا كورنەكتى مەملەكە جانە قوعام قايراتكەرلەرى، عالىمدار، جۋرنالشى-جازۋشىلار قوستاپ، يادرولىق سىناۋلارعا، قارۋ-جاراقتى شىعارۋعا قارسى حالىقارالىق ۇيىمدار قولداپ، سونىڭ ناتيجەسىندە زۇلمات پوليگوندى  جاپتىرۋ ماقساتى ىسكە اسقان  كەشىرىم بوزتاەۆقا «قازاقستاننىڭ حالىق قاھارمانى» اتاعىن بەرۋدى وتىنەمىز! بۇل – جاسى 90-نان اسقان ءبىزدىڭ عانا ەمەس، كەشىرىم مارقۇمنىڭ كىم بولعانىن جاقسى بىلەتىن مىڭداعان قازاقستاندىقتاردىڭ تىلەگى، دەپ ءبىلىڭىز.

قازاقستاندى جاڭارتۋ ىستەرىڭىزگە ساتتىلىك تىلەۋشى:

مىڭباي ءراش،

اقىن، قازاقستان رەسپۋبليكاسىنا ەڭبەگى سىڭگەن قىزمەتكەر.

ۋاحاپ قىدىرحانۇلى،

جازۋشى، قازاقستاننىڭ ەڭبەك سىڭىرگەن مادەنيەت قىزمەتكەرى.

Abai.kz

20 پىكىر