25 مامىردا سەناتتا ۇكىمەت پەن جوعارعى ەسەپ پالاتاسىنىڭ 2022 جىلعا ارنالعان رەسپۋبليكالىق بيۋدجەتتىڭ اتقارىلۋى تۋرالى ەسەپتەرىنىڭ تانىستىرىلىمى ءوتتى.

2022 جىلعا بولىنگەن بيۋدجەت قاراجاتىن ءتيىمسىز پايدالانعانى ءۇشىن 82 جوعارى لاۋازىمدى شەنەۋنىك جازالاندى. بۇل تۋرالى قارجى ءمينيسترى ەرۇلان جاماۋباەۆ مالىمدەدى.

«مەملەكەتتىك باعدارلامالار مەن ۇلتتىق جوبالاردى ىسكە اسىرۋ قورىتىندىلارىنا كەلسەك، وتكەن جىلى ءۇش مەملەكەتتىك باعدارلاما مەن 10 ۇلتتىق جوبا جۇزەگە اسىرىلدى. ولار مەملەكەتتىك جوسپارلاۋدىڭ جاڭا جۇيەسىن ەنگىزۋ اياسىندا بەكىتىلدى. ءتۇرلى كوزدەردەن 8,2 تريلليون تەڭگە ءبولىندى. ونىڭ 2,8 تريلليون تەڭگەسى مەملەكەتتىك بيۋدجەتتەن ءبولىندى»، – دەدى ول.

تانىستىرىلىم بارىسىندا سەناتور امانگەلدى تولەمىسوۆ قارجى مينيسترلىگىنىڭ باسشىسى: «بىرنەشە تريلليوننان استام بيۋدجەت اقشاسى ءتيىمسىز پايدالانىلدى. الداعى ۋاقىتتا مۇنداي جاعداي قايتالانباۋى ءۇشىن قىزمەتكەرلەر جازالانا ما؟» – دەپ سۇرادى.

وعان ە. جاماۋباەۆ: «سانداردى ناقتىلاي كەتەيىن. 8,2 تريلليون تەڭگەنىڭ بارلىعى مەملەكەت قارجىسى ەمەس. 2,8 تريلليونى رەسپۋبليكالىق بيۋدجەتتەن بولىنگەن قاراجات. قالعانى جەكە ينۆەستيتسيا مەن قارىز قاراجات. ارينە، مونيتورينگ جۇرگىزىپ جاتىرمىز. ءبىز جوعارعى ەسەپ پالاتاسىنىڭ قورىتىندىلارى مەن ۇسىنىستارىن تالدايمىز، جوعارى لاۋازىمدى تۇلعالاردى جاۋاپقا تارتامىز. قازىر 113 ادام، ونىڭ ىشىندە 82 جوعارى لاۋازىمدى تۇلعا جاۋاپكەرشىلىككە تارتىلدى»، – دەپ جاۋاپ بەردى.

Abai.kz