بايقوڭىر تۇرعىنىنا «رەسەي قارۋلى كۇشتەرىنىڭ بەدەلىن تۇسىرگەنى ءۇشىن» ءىرى كولەمدەگى ايىپپۇل سالىندى.

«پروكۋروردىڭ قاۋلىسى بويىنشا رەسەي فەدەراتسياسىنىڭ قارۋلى كۇشتەرىنىڭ بەدەلىن تۇسىرگەن ازاماتقا ءىرى كولەمدە ايىپپۇل سالىنادى»، - دەلىنگەن پروكۋراتۋرا ءباسپاسوز قىزمەتىنىڭ حابارلاماسىندا.

ۆەدومستۆونىڭ مالىمەتىنشە، «كەشەننىڭ پروكۋراتۋراسى رەسەي ازاماتتىعىنداعى بايقوڭىر تۇرعىنىنىڭ ينتەرنەت جەلىسىندە رەسەي فەدەراتسياسى قارۋلى كۇشتەرىنىڭ بەدەلىن تۇسىرۋگە باعىتتالعان قوعامدىق ءىس-ارەكەتىن جاساۋ فاكتىسى بويىنشا تەكسەرۋ جۇرگىزدى».

«رەسەي فەدەراتسياسى قارۋلى كۇشتەرىنىڭ بەدەلىن تۇسىرۋگە باعىتتالعان قوعامدىق ارەكەتتەردى جۇزەگە اسىرۋ ماقساتىندا ول الەۋمەتتىك جەلىلەردىڭ بىرىندە ينتەرنەت-پاراقتى قولدانىپ، ءتيىستى ماتەريالداردى ورنالاستىرعان. تەكسەرۋ ناتيجەلەرى بويىنشا كەشەن پروكۋرورى الەكساندر تريفونوۆ وسى ازاماتقا قاتىستى 20.3.3-باپتىڭ 1-بولىگىندە كوزدەلگەن اكىمشىلىك قۇقىق بۇزۋشىلىق تۋرالى ءىس قوزعادى»،- دەلىنگەن حابارلامادا.

بايقوڭىر كەشەن پروكۋرورىنىڭ قاۋلىسى مەن تەكسەرۋ ماتەريالدارى 26 -گارنيزوندىق اسكەري سوتقا جىبەرىلگەن.

«سوت تالقىلاۋىنىڭ ناتيجەلەرى بويىنشا بۇل ازامات جوعارىدا اتالعان اكىمشىلىك قۇقىق بۇزۋشىلىق جاساعانى ءۇشىن كىنالى دەپ تانىلدى، وعان 30 مىڭ رۋبل كولەمىندە اكىمشىلىك ايىپپۇل تۇرىندە جازا تاعايىندالدى. كەشەن پروكۋراتۋراسى تاراپىنان وسى باعىتتاعى جۇمىس جالعاسۋدا»، - دەپ جازدى رەسمي ورگان.

Abai.kz