ءيا، سوڭعى ءبىر ايدىڭ كولەمىندە اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتە ءتۇسۋ تۋرالى ماسەلە كوتەرىپ، پرەزيدەنت اكىمشىلىگىنىڭ باسشىسى ولجاس بەكتەنوۆ مىرزانىڭ اتىنا حاتتار جازىپ جاتقانىمىزدان كوزى قاراقتى، ساناسى سەرگەك اعايىن حاباردار دەپ ويلايمىن.

پرەزيدەنت اكىمشىلىگىنىڭ باسشىسى ولجاس بەكتەنوۆ مىرزانىڭ اتىنا جازعان سول ۇسىنىس-حاتتارىم ۇكىمەت پەن ءۇش مينيسترلىككە قايتا-قايتا باعىتتالا بەرگەن سوڭ، قازاقستان رەسپۋبليكاسى پرەزيدەنتىنىڭ كومەكشىسى – وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى قاناتبەك جايساڭباەۆ ءىنىمىزدىڭ قابىلداۋىن سۇراعان بولاتىنبىز.

وتكەن اپتانىڭ سارسەنبى كۇنى سول قاناتبەك جايساڭباەۆ مىرزانىڭ ورنىنا پرەزيدەنتىنىڭ اكىمشىلىگى ينسپەكتسيالىق-ادىستەمەلىك جۇمىس سەكتورىنىڭ مەڭگەرۋشىسى شىڭعىس اندابەكوۆتىڭ قابىلداۋىندا بولىپ قايتتىق.

كەزدەسىپ، تانىسقاندا ءبىلدىم، شىڭعىس ابدحادىرۇلى – مەنەن ءتورت-بەس جاس ۇلكەندىگى بار، اعا جولىنداعى  ازامات بولىپ شىقتى. ءوزىن سالىق زيمانوۆ اتامىزدىڭ شاكىرتىمىن دەپ تانىستىردى. پرەزيدەنت اكىمشىلىگىندە ون شاقتى جىلدان بەرى قىزمەت اتقارىپ كەلەدى ەكەن.

قاناتبەك جايساڭباەۆ مىرزانىڭ قابىلداۋىن قاتتى قالاساق تا، جاسى ۇلكەن اعانى جانە «پرەزيدەنت اكىمشىلىگى» دەگەن ينستيتۋتتى سىيلاپ، شىڭعىس اندابەكوۆ اعامىزبەن قۋانا-قۋانا كەزدەسۋگە باردىق.

بەكەر وبالى كانە، شىڭعىس ابدحادىرۇلى اعامىز بارىنشا دايىندالىپ كەلىپتى. بىردەن ءتىل تابىسىپ، ەمەن-جارقىن، بۇكپەسىز اڭگىمەلەسىپ كەتتىك. مەنىڭ 2022 جىلعى 4 مامىردان بەرگى اقورداعا جازعان حاتتارىمنىڭ قاشان قايدا باعىتتالعانىن، كىمنىڭ قولىنا تيگەنىن جىپكە تىزگەن مارجانداي ەتىپ، كەستەگە ءتۇسىرىپ الىپ كەلىپ كورسەتتى.

وتكەن جىلى جازعان ەكى حاتىمىز پرەزيدەنتكە جەتىپتى.

«ەسكى قىرماندى» ساپىرماي-اق، بۇگىنگى تاقىرىبىمىزعا ورالساق، اۋىلدىق وكرۋگ اكىمىنىڭ قۇزىرەتىن كەڭەيتۋ تۋرالى 4 مامىر كۇنى جازعان ءبىرىنشى ۇسىنىس-حاتىمىز پرەزيدەن اكىمشىلىگىنىڭ باسشىسى ولجاس بەكتەنوۆ مىرزانىڭ جانە ونىڭ پرەزيدەنتى اكىمشىلىگى باسشىسىنىڭ ءبىرىنشى ورىنباسارى تيمۋر سۇلەيمەنوۆتىڭ ءوز قولىنا ءتيىپتى. سوسىن، ارى قاراي قر ارپك 65-بابىنا سايكەس قاراپ، جاۋاپ بەرۋ ءۇشىن ۇلتتىق ەكونوميكا مينيسترلىگىنە، ساۋدا جانە ينتەگراتسيا مينيسترلىگىنە جانە اۋىل شارۋاشىلىعى مينيسترلىگىنە باعىتتالىپتى.

ال، 16 مامىر كۇنى اقورداعا جولداعان ەكىنشى ۇسىنىس-حاتىمىز دا الدىمەن پرەزيدەن اكىمشىلىگىنىڭ باسشىسى ولجاس بەكتەنوۆ مىرزانىڭ جانە ونىڭ ءبىرىنشى ورىنباسارى تيمۋر سۇلەيمەنوۆتىڭ، ودان ارى پرەزيدەنتى اكىمشىلىگى باسشىسىنىڭ ورىنباسارى ەرنار باسپاەۆتىڭ، ودان قايتادان پرەزيدەنتى اكىمشىلىگى باسشىسىنىڭ ءبىرىنشى ورىنباسارى تيمۋر سۇلەيمەنوۆتىڭ الدىنان ءوتىپ، ارى قاراي قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسىنا جونەلتىلىپتى...

قىسقاسى، پرەزيدەنت اكىمشىلىگى اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتە ءتۇسۋ تۋرالى ۇسىنىسىمىزبەن تولىق تانىسىپتى.

ول ءۇشىن قازاقستان رەسپۋبليكاسى پرەزيدەنتىنىڭ كومەكشىسى – قازاقستان رەسپۋبليكاسى پرەزيدەنتى اكىمشىلىگىنىڭ وتىنىشتەردى قاراۋدى باقىلاۋ ءبولىمىنىڭ مەڭگەرۋشىسى جايساڭباەۆ قاناتبەك باقىتۇلى ءىنىمىز بەن ونىڭ ۇجىمىنا العىسىم شەكسىز.

***

ەندى، سول سول ءۇش مينيسترلىكتىڭ جاۋاپتارى مەن كەزدەسۋلەر تۋرالى ايتايىن.

پرەزيدەنت اكىمشىلىگىنىڭ باسشىسى ولجاس بەكتەنوۆ مىرزانىڭ پارمەنىمەن بولسا كەرەك، ۇلتتىق ەكونوميكا ۆيتسە-ءمينيسترى باۋىرجان وماربەكوۆ پەن اۋىل شارۋاشىلىعى ۆيتسە-ءمينيسترى باعلان بەكباۋوۆ مەنى جەكە-جەكە شاقىرىپ، ماماندارى مەن دەپارتامەنت باسشىلارىن قاتىستىرا وتىرىپ كەزدەسۋ وتكىزدى.

ەكى ۆيتسە-مينيستر دە اۋىلدا تۋعان، بيلىكتىڭ ءبىراز باسپالداعىنان وتكەن جانىپ تۇرعان جاس جىگىتتەر ەكەن. قاراپايىم بولعانىمەن، وتە جوعارى دەڭگەيدە كەزدەسۋ بولدى. ەمىن-ەركىن پىكىرلەستىك، بۇكپەسىز وي بولىستىك. بۇل – ءوز الدىنا بولەك اڭگىمە.

ال، ءۇش مينيسترلىكتىڭ نەگىزگى ۇستانىمىن بىلدىرەتىن – ورلاردىڭ ءبىزدىڭ ۇسىنىس-حاتتارىمىزعا بەرگەن رەسىمي جاۋاپتارى.

ءبىرىنشى، اۋىل شارۋاشىلىعى مينيسترلىگىنىڭ جاۋابى.

اتالعان مينيسترلىك «اگروونەركاسىپتىك كەشەندى دامىتۋ ارقىلى ەلىمىزدىڭ ازىق-تۇلىك قاۋىپسىزدىگىن قامتاماسىز ەتۋ ماسەلەسى ارقاشان مينيسترلىكتىڭ باقىلاۋىندا...» دەپ باستاپ، «بۇگىنگى تاڭدا قابىلدانعان شارالار وڭ ناتيجە بەرۋدە. ماسەلەن، 2022 جىلعى ستاتيستيكا دەرەكتەرى بويىنشا ازىق-تۇلىك ونىمدەرىن ءوندىرۋ كولەمى اقشالاي تۇردە 2 914,4 ملرد. تەڭگەنى قۇرادى، بۇل 2021 جىلمەن سالىستىرعاندا 3,9%-عا ارتىق.

بىلتىرعى جىلدىڭ قورىتىندىسى بويىنشا اۋىل شارۋاشىلىعىنىڭ نەگىزگى كاپيتالىنا سالىنعان ينۆەستيتسيالاردىڭ كولەمى 6,7%-عا ۇلعايىپ

854 ملرد. تەڭگەنى قۇرادى، ازىق-تۇلىك وندىرىسىنە قۇيىلعان ينۆەستيتسيا 15,7%-عا ارتىپ 140,6 ملرد. تەڭگەنى قۇرادى.

بۇل رەتتە، 2022 جىلدىڭ قورىتىندىسى بويىنشا اۋىل شارۋاشىلىعىنىڭ جالپى ءونىمىنىڭ كولەمى 9,1%-عا ۇلعايىپ، 9,3 ترلن. تەڭگەنى قۇراعانىن اتاپ ءوتۋ قاجەت.» - دەپ، ءبىر توقتاپتى.

وندا نەگە پرەزيدەنتىمىز قاسىم-جومارت توقاەۆ بيىلعى 19 ءساۋىر كۇنى وتكەن ەلىمىزدىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەيتىلگەن كەڭەستە «اۋىل شارۋاشىلىعى جانە ءوندىرىس سالاسىنىڭ دامۋىندا ناقتى ناتيجە جوق. ەلىمىزدە وندىرىلەتىن تاۋاردىڭ كولەمى ىشكى سۇرانىستى قامتاماسىز ەتۋگە جەتپەيدى. يمپورتقا تاۋەلدىمىز» - دەيدى؟!

«ءاربىر ءمينيستردىڭ، اكىمنىڭ جۇمىسى ستاتيستيكامەن، ەسەپ-قيساپپەن ەمەس، ناقتى ناتيجەمەن ولشەنەتىن بولادى.»-دەگەن بولاتىن قاسىم-جومارت توقاەۆ.

دەمەك، قانشا تسيفردى سىقيتىپ العا تارتقانىمىزبەن، ناقتى ناتيجەنى پرەزيدەنت تە، جۇرت تا كورىپ وتىرعان جوق!

اتالعان مينيسترلىك تاعى دا «سۋبسيديالاۋ جۇيەسىن رەفورمالاۋعا قاتىستى

مەملەكەت باسشىسىنىڭ تاپسىرماسىنا سايكەس اگروونەركاسىپتىك كەشەندى مەملەكەتتىك قولداۋدى جەتىلدىرۋ جونىندەگى جۇمىس توبى قۇرىلدى، وعان سالالىق قاۋىمداستىقتار مەن وداقتاردىڭ، اگروبيزنەستىڭ، عىلىمنىڭ، مۇددەلى مەملەكەتتىك جانە جەرگىلىكتى اتقارۋشى ورگانداردىڭ، قازاقستان رەسپۋبليكاسى پارلامەنتى سەناتى مەن ءماجىلىسىنىڭ دەپۋتاتتارىنىڭ وكىلدەرى كىردى.

بارلىعى جۇمىس توبىنىڭ 9 وتىرىسى وتكىزىلدى، وندا سۋبسيديالاۋ جۇيەسىن جەتىلدىرۋ تاسىلدەرى تالقىلاندى.

قولدانىستاعى سۋبسيديالاۋ جۇيەسىن رەفورمالاۋدىڭ بىرنەشە نۇسقالار دايىندالدى، ولار جۇمىس توبىنىڭ وتىرىستارىندا بىرنەشە رەت تالقىلاندى.

تۇبەگەيلى رەفورمالاۋدىڭ بارلىق ۇسىنىلعان نۇسقالارىن اگروبيزنەس وكىلدەرى قولدامادى، فەرمەرلەر قاۋىمداستىعى قولدانىستاعى سۋبسيديالاۋ جۇيەسىن ساقتاۋدى تالاپ ەتتى...» - دەپتى.

مەنىڭ ۇسىنىس-حاتتارىما بەرىلگەن جاۋاپتاردىڭ تورەسى وسى بولدى!

الدىڭعى ءبىر ماقالامدا دا ايتتىم، بۇگىن تاعى قايتالايمىن، ارينە، اگروبيزنەس وكىلدەرى مەن فەرمەرلەر قاۋىمداستىعى ءۇشىن قازىرگى قولدانىستاعى سۋبسيديالاۋ جۇيەسى «اقشا جاساۋداعى» تابىلماس مۇمكىندىك.

ەگەر، اۋىل اكىمىنە مەن ۇسىنعان قۇزىرەتتەر بەرىلسە، ولار وتىز جىل بويى جەپ كەلگەن «مايشەلپەگىنەن» ايىرىلادى. بۇل – ءبىر.

ەكىنشى جاعىنان، ەگەر، جاعداي شىنىمەن وسىلاي بولسا، وندا بۇل – «اگروبيزنەس وكىلدەرى مەن فەرمەرلەر قاۋىمداستىعى سەكىلدى بەلگىلى ءبىر توپتار توقاەۆ بيلىگىنە ەكونوميكالىق رەفوما جاساتپاي وتىر ما؟!» دەگەن وي تۋعىزادى.

سونداي-اق، اتالعان مينيسترلىكتىڭ جەر رەسۋرستارىن باسقارۋ كوميتەتى «...اۋىلدىق اكىمدىكتەرگە جەردى ءبولۋ بويىنشا قۇزىرەت بەرىلگەن جاعدايدا اكىمدىكتەردىڭ شتات سانىن ۇلعايتۋعا جانە ولاردى قاجەتتى قۇرال-جابدىقتارمەن قامتاماسىز ەتۋ ءۇشىن بيۋدجەتتەن قوسىمشا قاراجات بولۋگە الىپ كەلەدى. بۇل، ءوز كەزەگىندە مەملەكەتتىك قىزمەتكەرلەردىڭ شتات سانىن قىسقارتۋ ساياساتىنا سايكەس كەلمەيدى.» - دەپ، جاۋاپ بەرىپتى بىزگە.

بۇل دا سۋ كەشپەيتىن سىلتاۋ!

جەر رەسۋرستارىن باسقارۋ كوميتەتى وسى سالادان ءبىر جىلدا ۇرلاناتىن مەملەكەت قاراجاتىنا يگەرىلمەي جاتقان جەردەن تۇسەتىن پايدانى قوسىپ، ونى اۋىلداعى جاڭادان تولىقتىرىلاتىن مەملەكەتتىك قىزمەتكەرلەرگە بولىنەتىن قاراجاتپەن سالىستىرىپ كورسىن، قايسىسى كوپ بولىپ شىعار ەكەن؟!

وعان اپارىپ، اۋىلداعى 7,5 ميلليون تۇرعىننىڭ تاعدىرىن قوسىڭىز!

«وكىنىشكە قاراي، اكىمدەر سونى بىلە تۇرا، الداعى قيىندىقتاردى ۋاقتىلى باعامداي المايدى. جاۋاپكەرشىلىكتى وزىنە الىپ، دەر كەزىندە شەشىم قابىلداۋدان قاشادى» - دەگەن جوق پا پرەزيدەت.

ەگەر، اۋىلدىق وكرۋگ اكىمىنە ءبىز ۇسىنعان قۇزىرەتتەر بەرىلسە، اكىمدەر باتىل شەشىم قابىلداۋدان دا جانە ونىڭ جاۋاپكەرشىلىگىن ارقالاۋدان دا  قاشپايتىن بولادى. ەڭ باستىسى، حالىقتىق باقىلاۋ كۇشەيەدى...

سونىمەن بىرگە، بۇل جوبا پرەزيدەنتتىڭ مەملەكەتتىك باسقارۋدى ورتالىقسىزداندىرۋ ساياساتىڭىزدىڭ ناقتى جۇزەگە اسقاندىعىنىڭ ءبىر ايقىن كورىنىسى بولادى.

ەكىنشى، ۇلتتىق ەكونوميكا مينيسترلىگىنىڭ جاۋابى.

اتالعان مينيسترلىك «...اۋىل شارۋاشىلىعى ماقساتىنداعى جەرلەردى بەرۋ راسىمىنە وزگەرىستەر ەنگىزۋ جونىندەگى ۇسىنىستاردى جانە سۋبسيديالاۋ ماسەلەلەرىن قازاقستان رەسپۋبليكاسىنىڭ اۋىل شارۋاشىلىعى مينيسترلىگى قارايتىن بولادى» دەي كەلىپ، «بيۋدجەتتىك كودەكستىڭ 42-بابى 2-تارماعىنا سايكەس بيۋدجەتتىك پروتسەستە رەسپۋبليكالىق بيۋدجەتتىڭ اۋىلدىق وكرۋگتەر بيۋدجەتتەرىمەن ءوزارا قاتىناستارىنا جول بەرىلمەيدى...» - دەپتى.

ءبىزدىڭ ءۋاجىمىز مىناۋ:

اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتە ءتۇسۋ – جەرگىلىكتى جەردەگى ەسكى باسقارۋ جۇيەسىن وزگەرتۋ بولىپ تابىلادى. ول – جاڭا قازاقستان قۇرۋ ءۇشىن جاسالىپ جاتقان جاڭا قادام.

جاڭا قازاقستان قۇرۋ ءۇشىن پرەزيدەنت قاسىم-جومارت توقاەۆ قازاقستان رەسپۋبليكاسىنىڭ كونستيتۋتسياسىنىڭ ۇتەن ءبىر بولىگىنە وزگەرىس ەنگىزدى. ءتىپتى، ءبىر جىلدا ەكى مارتە  كونستيتۋتسيالىق وزگەرىس جاسادى. ونىڭ قاسىندا، بيۋدجەتتىك كودەكستىڭ 42-بابى 2-تارماعىن وزگەرتۋ – تۇككە تۇرعىسىز دۇنيە ەمەس پە؟!

 ءۇشىنشى، ساۋدا جانە ينتەگراتسيا مينيسترلىگىنىڭ جاۋابى.

بۇل مينيسترلىك وبلىستىڭ، رەسپۋبليكالىق ماڭىزى بار قالانىڭ، استانانىڭ، اۋداننىڭ، وبلىستىق ماڭىزى بار قالانىڭ جەرگiلiكتi اتقارۋشى ورگاندارى ساۋدا ساياساتىن جۇرگiزۋدi قامتاماسىز ەتەتىنىن جانە ءوز قۇزىرەتi شەگiندە ىشكى ساۋدا سۋبەكتiلەرiنiڭ قىزمەتiن رەتتەۋدi جۇزەگە اسىراتىنىن ايتىپ، «وسىعان بايلانىستى، ىشكى ساۋدا ماسەلەلەرى بويىنشا ناقتى ۇسىنىستارىڭىز بار بولعان جاعدايدا، ءبىز ولاردى قاراستىرۋعا دايىنبىز.» دەپ، قىسقا قايىرىپتى.

دۇرىس! وعان ايتار ءۋاجىمىز جوق. بىراق، ءبىزدىڭ اۋىلدىق وكرۋگ اكىمىنىڭ قۇزىرەتىن كەڭەيتۋ تۋرالى ۇسىنىسىمىزدىڭ بۇل مينيسترلىككە نە ءۇشىن جىبەرىلگەنىن تۇسىنبەدىك.

 كورىپ وتىرسىزدار، ءۇش مينيسترلىكتىڭ دە جاۋابى وزدەرى ءۇشىن، ارينە، دۇرىس جانە ورىندى. ولار جوعارعى جاقتان ءبىر پارمەن بەرىلمەسە، سىزىلىپ قويعان  شەڭبەردەن شىعىپ، «ءيا، وسىلاي جاساۋ كەرەك!» دەپ ايتا المايدى.

جوعارىدان باعىتتالعان ءوتىنىش-حات بولعان سوڭ، وعان منيسترلىكتەر مىندەتتى تۇردە ءوز قۇزىرەتتەرى شەگىندە جاۋاپ بەرۋلەرى كەرەك قوي. جاۋاپ بەرۋ ءۇشىن جاۋاپ بەرىپ قانا قويماي، ولاردىڭ ءبىراز شىندىقتىڭ بەتىن اشىپ جاۋاپ بەرگەندەرىنە قاتتى ريزا بولدىم. اسىرەسە، اۋىل شارۋاشىلىعى ۆيتسە-ءمينيسترى ەربول تاسجۇرەكوۆتىڭ «تۇبەگەيلى رەفورمالاۋدىڭ بارلىق ۇسىنىلعان نۇسقالارىن اگروبيزنەس وكىلدەرى قولدامادى، فەرمەرلەر قاۋىمداستىعى قولدانىستاعى سۋبسيديالاۋ جۇيەسىن ساقتاۋدى تالاپ ەتتى...» دەگەن جاۋابىنا!

 سونىمەن، مەنىڭ ەندىگى جەردە مينيسترلىكتەرمەن بۇل ماسەلە تۋرالى شارۋام ءتامام! ولاردىڭ ۇستانىمى بەلگىلى بولدى. رەسىمي جاۋاپتىڭ سىرتىنداعى اۋىزەكى اڭگىمەدە مەن كەزدەسكەن ءۇش ورگاننىڭ جاۋاپتى تۇلعالارى دا، ماماندارى دجا بۇل وزگەرىسكە قارسى ەمەس ەكەندىكتەرىن اشىق ايتتى. ءتىپتى، بۇل سالاداعى جەمقورلىق تۋرالى اڭگىمەنى ەستىسەڭ، توبە شاشىڭ تىك تۇرادى. ءبىر تراكتورعا سەكسەن قانشا مارتە سۋبسيديا العان باقىردى ەستىگەندە، ءوز ۇسىنىسىمنىڭ ورىندى ەكەنىنە كوزىم ابدەن جەتتى. ال، جوق مال مەن ەگىن ءۇشىن سۋبسيديا الىپ كەلگەندەردە ەسەپ جوق...

ەندى ول تۇيەدە جۇگىم جوق. مينيسترلىكتەردى ايتام. قالعان اڭگىمەنىڭ ءبارى پرەزيدەنت اكىمشىلىگىنىڭ قۇزىرىندا، ونىڭ باسشىسى ولجاس بەكتەنوۆ مىرزانىڭ دارگەيىدە قالدى.

كەشە عانا تۇركىستان تورىندە وتكەن ۇلتتىق قۇرىلتايدا پرەزيدەنتىمىز «شىن مانىندە، ءبىز ايتىپ جۇرگەن ادىلەتتى قازاقستاندى ادال ازاماتتار قۇرادى.» - دەدى.

داۋ جوق، سول ادال ازاماتتىڭ بىرەۋى – ولجاس بەكتنوۆ مىرزا دەپ بىلەمىن.

ەگەر، ولجاس ابايۇلى ادال ازامات بولماسا، قاسىم-جومارت كەمەلۇلى ول جىگىتتى مىناداي اسا جاۋاپتى قىزمەتكە تاعايىنداماعان بولار ەدى.

اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتە ءتۇسۋ تۋرالى مەنىڭ اتالعان ۇسىنىسىمدى پرەزيدەنت اكىمشىلىگىنىڭ باسشىسى ولجاس بەكتەنوۆ مىرزا قايتادان ءوز نازارىنا الىپ، ونى پرەزيدەنتكە جەتكىزەدى دەگەن سەنىمدەمىن!

مەنشە، پرەزيدەنتىمىز قاسىم-جومارت توقاەۆتىڭ 2023 جىلعى 19 ءساۋىر كۇنى ەلىمىزدىڭ الەۋمەتتىك-ەكونوميكالىق دامۋ ماسەلەلەرى جونىندەگى كەڭەيتىلگەن كەڭەستە ايتقان تۇيتكىلدى ماسەلەلەردى پرەزيدەنت اكىمشىلىگى مەن مەملەكەتتىك حاتشى ماي شاممەن قاراپ، ونى بولدىرماۋ ءۇشىن ءتيىستى زاڭدار مەن نومارتيۆتىك قۇجاتتارعا باتىل وزگەرتۋلەر مەن تولىقتىرۋلار ەنگىزۋگە ءسوزسىز ىقپال ەتۋلەرى كەرەك!

ەستەرىڭىزدە بولسا، 2019 جىلى 12 ماۋسىم كۇنى ۇلىقتاۋ راسىمىنەن كەيىن ءسوز سويلەگەن قازاقستان رەسپۋبليكاسىنىڭ سايلانعان پرەزيدەنتى قاسىم-جومارت توقاەۆ ءوزىنىڭ ون مىندەتىن ورتاعا قويعان بولاتىن (https://kznews.kz/basty/qasym-zhomart-toqaev-prezident-retinde-atady-10-mindetin/. )

اللا قالاسا، اۋىلدىق وكرۋگ اكىمىنىڭ قۇزىرەتىن تاعى دا ءۇش باعىت بويىنشا كەڭەيتۋ جوباسى زاڭداستىرىلسا، ول – پرەزيدەنتتىڭ سول ون مىندەتىنىڭ, كەم دەگەندە، سەگىزىن شەشۋگە جول اشادى!

ايتپەسە، ءبىز اۋىل مەن اۋىل شارۋاشىلىعىن دامىتۋعا بولگەن مەملەكەت قاراجاتىن، قاسىم-جومارت كەمەلۇلى ايتقانداي، تاعى دا كەيبىر پىسىقايلاردىڭ جەمى قىلامىز. ءتىپتى جۇرت پرەزيدەنت اكىمشىلىگىن اگروبيزنەس وكىلدەرى مەن فەرمەرلەر قاۋىمداستىعىنىڭ سىبايلاسى دەپ باعالاۋى مۇمكىن...

فوتو:kyzmet.gov.kz

اۋىت مۇقيبەك

Abai.kz