«كەيبىرەۋلەر قازاقتاردىڭ ءوز تاريحى، مەملەكەتى، ەلى بولماعان دەگەن سوزدەر ايتىپ ءجۇر. ول – ءبىزدىڭ تاريحىمىزدى بۇرمالاۋ»، - دەپ مالىمدەدى پرەزيدەنت توقاەۆ استاناداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا ساحنالانعان «جوشى حان» سپەكتاكلىنىڭ پرەمەراسىنان شىققان سوڭ.

«قۇتتى بولسىن! وتە كەرەمەت قويىلىم بولدى. شىن مانىندە، پەسانىڭ تاقىرىبى وتە ماڭىزدى، وزەكتى. مۇنداي تۋىندىلار حالقىمىز ءۇشىن قاجەت دەپ ويلايمىن. پەسانىڭ ءتىلى، ءماتىنى وتە جاقسى جازىلعان. ارتىستەردىڭ ءبارى جاقسى وينادى. شەبەرلىگى مىقتى ەكەن. ءبىزدىڭ تاريحىمىزدى، تاريحي قۇندىلىقتارىمىزدى قازىرگى تاڭدا حالىق اراسىندا كەڭىرەك دارىپتەۋىمىز كەرەك. كەيبىرەۋلەر قازاقتاردىڭ ءوز تاريحى، مەملەكەتى، ەلى بولماعان دەگەن سوزدەر ايتىپ ءجۇر. ول – ءبىزدىڭ تاريحىمىزدى بۇرمالاۋ. ونەرلەرىڭىز قاشاندا تابىستى بولسىن. بارشاڭىزعا امانشىلىق تىلەيمىن»، – دەدى مەملەكەت باسشىسى.

ەستەرىڭىزدە بولسا، بۇعان دەيىن رەسەي پرەزيدەنتى ۆلاديمير پۋتين: «قازاقتاردا ەشقاشان مەملەكەت بولماعان»، «كەڭەس وداعىنان بولىنگەن ءبىراز ەل رەسەيدىڭ، ورىستاردىڭ ءبىراز جەرلەرىن سىيلىق ەسەبىندە الىپ كەتتى»، - دەگەن بولاتىن.

پۋتيننەن باسقا كرەملدىڭ ايتقىشتارى قازاقتىڭ تاۋەسىزدىگىنە كۇمان كەلتىرەتىن، تاريحىن جوققا شىعاراتىن تالاي مالىمدەمەلەر جاساپ ءجۇر. وسىنداي ساتتە توقاەۆتىڭ «كەيبىرەۋلەر ورنىن ءبىلسىن، اۋزىم بار دەپ ويىنا كەلگەندى ايتپاسىن» دەگەن وتە ەسكەرتۋى ورىندى.

ايتا كەتەيىك، اتالعان سپەكتاكل «شىڭعىس ورداسى» مەن «قازاق ورداسى» اتتى ەكى بولىمنەن تۇرادى. قويىلىمدا شىڭعىس حان مەن ۇلى جوشى اراسىنداعى قارىم-قاتىناس، ولاردىڭ ەل باسقارۋ ىسىندەگى قابىلداعان شەشىمدەرى، ءومىرىنىڭ بەلگىلى كەزەڭدەرى كەڭىنەن سۋرەتتەلەدى. سونداي-اق ۇلى دالاداعى تۇركى تايپالارىن ءبىر ۇلىسقا بىرىكتىرىپ، ۇلىتاۋدا ورداسىن تىككەن جوشى وعلان بەينەسى قازاق مەملەكەتتىگىنىڭ نەگىزىن قالاۋشى – جوشى حان دارەجەسىنە دەيىن كوتەرىلەدى.

تاريحي درامانىڭ اۆتورى – بەلگىلى جازۋشى-دراماتۋرگ دۋمان رامازان، قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى بولات ۇزاقوۆ.

مەملەكەت باسشىسى قويىلىمدى تاماشالاعان سوڭ، تەاتر ۇجىمىنا شىعارماشىلىق تابىس تىلەپ، ونەر ورداسىنا ۇلتتىق مارتەبە بەرۋ جونىندە شەشىم قابىلداعانىن ايتتى. ءتيىستى جارلىق قازان ايىندا رەسپۋبليكا كۇنى قارساڭىندا جاريالانادى.

Abai.kz