ەكى-ءۇش كۇننەن بەرى باق پەن الەۋمەتتىك جەلىدە ساۋدياعا قاجىلىققا بارىپ، تۋريستىك كومپانياعا الدانىپ قالعان 120 قازاقستاندىقتىڭ ماسەلەسى قىزۋ تالقى بولۋدا. ونداعى اقپاراتتارعا سۇيەنسەك، «Zam-Zam Qazaqstan» اتتى كومپانيادان قاجىلىق ساپارىن ساتىپ العان ازاماتتار، ساۋدياعا بارعان. الايدا، كومپانيا جالعان قۇجاتتار پايدالانعان (قولدان جاسالعان ۆيزالار). سونىڭ سالدارىنان، 120 وتانداسىمىز ساۋدياعا قامالىپ قالعان.

بۇگىن اتالعان ماسەلەگە قاتىستى قازاقستان مۇسىلماندارى ءدىني باسقارماسى رەسمي تۇردە تۇسىنىكتەمە بەرىپ، «Zam-Zam Qazaqstan» كومپانياسىنىڭ باسشىلارى جاۋاپقا تارتىلۋى ءتيىس ەكەندىگىن مالىمدەدى.

قمدب تۇسىنىكتەمەسى:

قازاقستان مۇسىلماندارى ءدىني باسقارماسى بۇعان دەيىن «Zam-Zam Qazaqstan» (زاڭدى اتاۋى – Zam Zam store) كومپانياسىنىڭ قاجىلارعا قىزمەت كورسەتۋگە قاتىستى ءتيىستى ليتسەنزياسى، وسى جىلى رەسمي قاجىلىق ورىندارىن العان تۋروپەراتورلار تىزىمىندە جوق ەكەنىن، سوندىقتان اتالعان فيرمانىڭ قىزمەتىنە مۇلدە جۇگىنبەۋ تۋرالى بىرنەشە رەت دابىل قاعىپ، مالىمدەمە جاريالاعان بولاتىن. سونىمەن قاتار ءمۇفتيات قاجىلاردى وسىعان دەيىن الداپ، دالادا قالدىرعان اتالعان كومپانيانىڭ زاڭسىز ارەكەتتەرى تۋرالى قۇقىق قورعاۋ ورگاندارىنا شاعىم تۇسىرگەن.

قولدان جاسالعان قاجىلىق ۆيزالارىن پايدالانعان كومپانيا وكىلدەرى شاريعات پەن زاڭعا قايشى ارەكەتتەرىنەن ءالى كۇنگە دەيىن تىيىلماي كەلەدى. قازاقستان ازاماتتارىن زاڭسىز جولمەن قاجىلىققا اكەلگەن «Zam-Zam Qazaqstan» كومپانياسىنىڭ جەتەكشىسى دانيار يليەۆ زاڭ الدىندا جاۋاپ بەرۋ ءتيىس دەپ سانايمىز. ولار شاريعات پەن زاڭدى بەلدەن باسۋمەن قاتار «ءمۇفتيات قاجىلىق كۆوتاسىن ساتادى، پارا الادى» دەپ جالا جابۋىن دوعارماي، ەندى قمدب «جالعان قاجىلىق كۆوتالارىن» جاسادى دەپ شىندىققا جاناسپايتىن اقپارات تاراتۋدا.

ءدىني باسقارماعا ءجابىر كورگەن قاجىلار مەن ونىڭ تۋىستارىنان جالعان قۇجات جاساپ، ازاماتتارىمىزدى زاڭسىز جولمەن قاجىلىققا اپارعان «Zam-Zam Qazaqstan» ديرەكتورى مەن باسقا دا جاۋاپتى وكىلدەرىن نەگە قۇقىقتىق جاۋاپكەرشىلىككە تارتۋ بويىنشا ءتيىستى شارا قولدانبايدى دەگەن سۇراقتار مەن شىعىمدار تولاسسىز كەلىپ تۇسۋدە. قۇقىق قورعاۋ ورگاندارى وسى ماسەلەگە تەز ارادا نازار اۋدارىپ، زاڭ بۇزۋشىلاردى قۇقىقتىق جاۋاپكەرشىلىككە تارتۋ بويىنشا ءتيىستى شارالار قولدانادى دەپ سەنەمىز.

قازاقستان مۇسىلماندارى ءدىني باسقارماسى قاجىلىق كونكۋرسىنان وتكەن، ياعني قاجىلىق ساپارىن ۇيىمداستىرۋعا قابىلەتتى دەپ تانىلعان، ءمۇفتيات جاريالاعان تىزىمگە ساي تۋروپەراتورلار قىزمەتىنە جۇگىنۋ قاجەتتىگىن تاعى دا قاپەرگە سالادى. سونىمەن قاتار «قمدب جالعان قاجىلىق ۆيزالارىن دايىندادى» دەپ جالا جاپقان «Zam-Zam Qazaqstan» (Zam Zam store) كومپانياسىنىڭ ديرەكتورى دانيار يليەۆتىڭ ۇستىنەن سوتقا شاعىم تۇسىرەتىنىمىزدى جەتكىزەمىز. ولار اللا الدىنداعى پارىزىن وتەيمىن دەپ كەلگەن قاجىلارعا قيانات جاسادى.

Abai.kz