جاڭا قالانى اشۋ سالتاناتى ەكس-پرەزيدەنت گۇربانعۇلى بەردىمۇحامەدوۆتىڭ تۋعان كۇنى ءوتتى. قالا سونىڭ قۇرمەتىنە اتالعان. الايدا ارقاداع اتاعىنا يە ەكس-پرەزيدەنت 29 ماۋسىمداعى سالتاناتتى شاراعا قاتىسپادى.
تۇركىمەنستانداعى ەڭ العاشقى "اقىلدى قالانى" اشۋ سالتاناتىنا پرەزيدەنت سەردار بەردىمۇحامەدوۆ كەلدى. جەرگىلىكتى ءباسپاسوز كوپتەگەن شەتەل قوناعى قاتىسقانىن حابارلادى، الايدا ولاردىڭ كىمدەر ەكەنى ايتىلمادى.
رەسمي باق سالتاناتتى شاراعا گۇربانعۇلى بەردىمۇحامەدوۆتىڭ قاتىسقان-قاتىسپاعانى تۋرالى ەشتەڭە جازبادى. ولار جاريالاعان سۋرەتتەردە بۇرىنعى پرەزيدەنت كورىنبەيدى.
بۇنىڭ الدىندا مەملەكەتتىك ءباسپاسوز 66 جاسقا تولعان بەردىمۇحامەدوۆ 29 ماۋسىمدا ساۋد ارابياسىندا بولاتىنىن جازعان. ادەتتە ەكس-پرەزيدەنت مۇنداي ماڭىزدى شارالاردى جىبەرمەيدى. ول قالا قۇرىلىسى قالاي ءجۇرىپ جاتقانىن بىرنەشە مارتە كورگەن.
جاڭا قالانى سالۋ ەكى كەزەڭدە جۇزەگە اسادى. قازىر ونىڭ ءبىرىنشى كەزەڭى عانا اياقتالدى. ارقاداعتا 336 مادەني-تۇرمىستىق جانە باسقا دا نىساندار بوي كوتەردى.
"اقىلدى قالادا" ساۋداعا شىعارىلعان ۇيلەرمەن تانىسقان تۇرعىندار پاتەرلەردە كىنارات كوپ ەكەنىن ايتىپ وتىر.
29 ماۋسىمدا ارقاداع گازەتى مەن تەلەارناسى اشىلدى. ەكى اي بۇرىن "ارقاداع" فۋتبول كلۋبى قۇرىلعان.
تۇركىمەنستان الەمدەگى ەڭ جابىق اۆتوريتارلىق ەلدەردىڭ ءبىرى. مەملەكەت بىرنەشە جىلدان بەرى اۋىر ەكونوميكالىق داعدارىستان شىعا الماي وتىرعانىنا قاراماستان، بيلىك ميللياردتاعان دوللاردى ەكس-پرەزيدەنت قۇرمەتىنە اتالعان جاڭا قالا قۇرىلىسىنا جۇمساعان.
Abai.kz
