27 ماۋسىمنان باستاپ فرانتسيانىڭ بىرنەشە قالاسىندا جاپپاي تارتىپسىزدىكتەر بولىپ جاتىر. ەلدەگى نارازىلىقتى باقىلاۋعا الۋعا 45 مىڭ پوليتسيا جۇمىلدىرىلعان. الەۋمەتتى جەلىلەردە تارالعان ۆيدەولاردا پوليتسيا مەن شەرۋشىلەر اراسىندا قاقتىعىستار بولعانى، پوليتسيانىڭ كوزدى جاساۋراتاتىن گاز قولدانعانى كورسەتىلگەن.

پاريج قالاسىندا 126 ادام ۇستالىپ، قاۋىپسىزدىك شارالارى كۇشەيگەن. ال مارسەل، ليون، ليل سياقتى قالالارعا قوسىمشا كومەك جىبەرىلگەن.

فرانتسيا پرەزيدەنتى ەممانۋەل ماكرون وسى وقيعالارعا بايلانىستى گەرمانياعا جوسپارلانعان ساپارىن كەيىنگە قالدىردى. تارتىپسىزدىكتەردىڭ ءتورتىنشى تۇنىندە ەلدە 1300-دەن استام ادام قاماۋعا الىندى. نارازىلىققا شىققاندار عيماراتتار مەن كولىكتەردى ورتەپ جىبەردى. مارسەل، ليون، تۋلۋزا، ستراسبۋرگ، ليلل، پاريجدەگى دۇكەندەر تونالعان.

فرانتسياداعى كوتەرىلىستەر نانتەر قالاسىندا الجيرلىك يمميگرانت ناەل م. اتتى ءجاسوسپىرىمدى پوليتسيا اتىپ ولتىرگەننەن كەيىن باستالعان. كامەلەتكە تولماعان 17 جاستاعى ەر بالا «Mercedes» كولىگىن تىزگىندەپ، جول ەرەجەسىن بۇزعان.

فرانتسۋز قوعامى پوليتسيانىڭ ارەكەتىن قاتىگەزدىك دەپ باعالاپ، ولاردى «ءناسىلشىل» دەپ ايىپتادى.

ءجاسوسپىرىمدى اتىپ ولتىرگەن پوليتسيا قىزمەتكەرى قاماۋعا الىندى، وعان قاساقانا كىسى ءولتىردى دەگەن ايىپ تاعىلدى. بەيسەنبىدە ول مارقۇمنىڭ وتباسىنان كوپشىلىك الدىندا كەشىرىم سۇرادى.

فرانتسيا پرەزيدەنتى ەممانۋەل ماكرون جۇما كۇنى كەشكە تارتىپسىزدىكتەرگە قاتىسقانى ءۇشىن ۇستالعانداردىڭ شامامەن ۇشتەن ءبىرى «وتە جاس جەتكىنشەكتەر» ەكەنىن مالىمدەدى. ءىىم باسشىسى جەرالد دارمانەن تۇتقىنعا الىنعانداردىڭ اراسىندا 13 جاستاعى بالالاردىڭ بارىن ايتقان.

ول اتا-انالاردى بالالارىنىڭ ۇيدەن شىقپاۋىن قاداعالاۋىن سۇرادى.

فرانتسيا پرەزيدەنتى ەممانۋەل ماكرون نارازىلىقتى قوزدىرۋشىلاردى كىنالادى. «ولار بالانىڭ ءولىمىن پايدالانىپ، ءبىزدىڭ ينستيتۋتتارعا شابۋىل جاساۋدى كوزدەپ وتىر. ولاردىڭ موينىندا ۇلكەن جاۋاپكەرشىلىك جاتىر.  ءبىز زورلىق-زومبىلىق ارەكەتتەرىن قاتاڭ ايىپتايمىز»،-دەدى ول.

الجيرلىك يمميگرانتتاردىڭ بالاسىنىڭ ءولىمى فرانتسۋز قوعامىندا ونسىز دا ءورشىپ تۇرعان ناسىلشىلدىك پروبلەماسىن تاعى دا كوتەردى. بۇل وقيعالار پرەزيدەنت ماكروننىڭ وتستاۆكاعا كەتۋىنە سەبەپ بولا ما؟

Abai.kz