ناۋقاننىڭ ەكىنشى كۇنىندە پارتيالار سالتاناتتى راسىمدەردەن وڭىرلەردەگى پراكتيكالىق جۇمىسقا دەن قويدى. ەگەر العاشقى كۇنى نەگىزگى وقيعا سايلاۋالدى شتابتاردىڭ اشىلۋى بولسا، ەندى كانديداتتار سايلاۋشىلارمەن العاشقى كەزدەسۋلەرىن وتكىزىپ، وبلىستارعا ساپارلارىن باستاپ، كاسىپورىندار مەن سالالىق الاڭداردى ارالاۋعا كىرىستى.

سونىمەن قاتار ءاربىر ساياسي پارتيا ءتۇرلى اۋديتوريالارعا باعىتتالىپ، حالىقپەن قارىم-قاتىناستىڭ وزىندىك فورماتىن تاڭدادى.

«ادىلەت» پارتياسى ۇگىت-ناسيحات ناۋقانىنىڭ وڭىرلىك كەزەڭىن تۇركىستان وبلىسىنان باستادى. كۇنى بويى كانديداتتار زيالى قاۋىم وكىلدەرىمەن، پەداگوگتەرمەن، مەديتسينا قىزمەتكەرلەرىمەن، قولونەرشىلەرمەن، سپورتشىلارمەن، كاسىپكەرلەرمەن جانە ءوڭىر تۇرعىندارىمەن بىرقاتار كەزدەسۋ وتكىزدى. كەزدەسۋلەر بارىسىندا ينفراقۇرىلىمدى دامىتۋ، تۋريزم، شاعىن بيزنەس، اۋىلدىق اۋماقتاردى وركەندەتۋ جانە الەۋمەتتىك سالا ماسەلەلەرى تالقىلاندى. سونىمەن قاتار سايلاۋالدى ناۋقان اياسىندا «ادىلەتتى قازاقستان ءۇشىن» ءموبيلدى كەرۋەندەرى جۇمىسىن باستادى.

جالپىۇلتتىق سوتسيال-دەموكراتيالىق پارتيا (جسدپ) استانادا جۋرناليستەردىڭ، ساياساتتانۋشىلاردىڭ جانە بلوگەرلەردىڭ قاتىسۋىمەن دوڭگەلەك ۇستەل ۇيىمداستىردى. ءىس-شارا بارىسىندا سايلاۋالدى ناۋقان، پارتيالىق باسەكە جانە كادر ساياساتى ماسەلەلەرى تالقىلاندى.

«بايتاق» جاسىلدار پارتياسى ناۋقانىن استانادا ەكولوگيالىق مارافون وتكىزۋ ارقىلى. جالعاستىردى. ءىس-شارا ترياتلون پاركىندە ءوتىپ، وعان 200-دەن استام ادام قاتىستى. ولاردىڭ قاتارىندا قۇرىلتاي دەپۋتاتتىعىنا كانديداتتار، پارتيا بەلسەندىلەرى، ەرىكتىلەر مەن ەكوبەلسەندىلەر بولدى. قاتىسۋشىلار 2,5 شاقىرىم قاشىقتىقتى ەڭسەرگەننەن كەيىن ءىس-شاراعا قاتىسۋشىلارمەن كەزدەسۋ وتكىزدى.

قازاقستاننىڭ حالىق پارتياسى (قحپ) سايلاۋالدى ناۋقانىن پاۆلودار وبلىسىندا جالعاستىردى. وندا كانديداتتار ونەركاسىپ كاسىپورىندارىنىڭ ەڭبەك ۇجىمدارىمەن كەزدەستى. كەزدەسۋلەر بارىسىندا ەڭبەك جاعدايلارى، الەۋمەتتىك سالا جانە وندىرىستىك قاۋىپسىزدىككە قاتىستى ماسەلەلەر تالقىلاندى.

ناۋقاننىڭ ەكىنشى كۇنى «اۋىل» پارتياسىنىڭ باسشىلىعى AUYL JASTARY جاستار قاناتىنىڭ ۇگىت-ناسيحات ءىس-شارالارىن وتكىزۋ بويىنشا دايىندىعىمەن تانىستى. بۇل ءىس-شارالار سايلاۋالدى كەزەڭدە ەلىمىزدىڭ بارلىق وڭىرىندە وتكىزىلەدى دەپ جوسپارلانعان. سونىمەن قاتار قۇرىلتاي دەپۋتاتتىعىنا كانديداتتار استاناداعى «ستالتسينك» كاسىپورنىنا بارىپ، ءوندىرىس جۇمىسىمەن تانىسىپ، ەڭبەك ۇجىمىمەن كەزدەستى. كەزدەسۋ بارىسىندا ءوندىرىستى دامىتۋ، كاسىپكەرلىك، وڭىرلىك ەكونوميكا جانە ەڭبەك ادامىن قولداۋ ماسەلەلەرى تالقىلاندى. كۇن سوڭىندا قۇرىلتاي دەپۋتاتتىعىنا كانديدات جيگۋلي دايراباەۆتىڭ قاتىسۋىمەن پارتيانىڭ الەۋمەتتىك جەلىدەگى رەسمي پاراقشاسىندا تىكەلەي ەفير ءوتتى.

«اق جول» دەموكراتيالىق پارتياسىنىڭ وكىلدەرى پارتيا توراعاسى دانيا ەسپاەۆانىڭ جەتەكشىلىگىمەن سايلاۋشىلارمەن كەزدەسۋلەرىن جالعاستىردى. كەزدەسۋلەر بارىسىندا ەكونوميكالىق ساياسات، كاسىپكەرلىكتى قولداۋ جانە قاتىسۋشىلاردى قىزىقتىرعان وزگە دە ماسەلەلەر تالقىلاندى. سونداي-اق سايلاۋالدى ناۋقانىن وتكىزۋگە قاتىستى بىرقاتار ماسەلەلەر بويىنشا پىكىر الماسۋ بولدى.

Respublica پارتياسىنىڭ وكىلدەرى وڭىرلىك ساپارلارىن قاراعاندى وبلىسىنان باستادى. دەلەگاتسيا بىرنەشە اۋىل شارۋاشىلىعى كاسىپورنىنا بارىپ، شارۋاشىلىق باسشىلارىمەن جانە اگرارلىق سەكتور قىزمەتكەرلەرىمەن كەزدەستى. كەزدەسۋ بارىسىندا اۋىل شارۋاشىلىعىن دامىتۋ جانە سالاداعى قولدانىستاعى رەتتەۋ ماسەلەلەرى تالقىلاندى.

جالپى، سايلاۋالدى ناۋقاننىڭ ەكىنشى كۇنى رەسمي باستالۋ كەزەڭىنەن سايلاۋشىلارمەن پراكتيكالىق جۇمىس كەزەڭىنە كوشكەنىن كورسەتتى. ساياسي پارتيالار وڭىرلىك كۇن تارتىبىنە، ەڭبەك ۇجىمدارىمەن، كاسىپكەرلەرمەن، جاستارمەن جانە قوعام وكىلدەرىمەن كەزدەسۋلەر وتكىزۋگە، سونداي-اق تاقىرىپتىق قوعامدىق ءىس-شارالار مەن اشىق پىكىرتالاستار ۇيىمداستىرۋعا باسىمدىق بەردى.

Abai.kz