ءماجىلىس توراعاسى ەرلان قوشانوۆ «تەڭىزشەۆرويل» جشس باس ديرەكتورى كەۆين ليون باستاعان دەلەگاتسيانى قابىلدادى. دەلەگاتسيا استاناعا دەپۋتاتتاردى كومپانيا قىزمەتىمەن تانىستىرىپ، ىنتىماقتاستىق ماسەلەلەرىن تالقىلاۋ ءۇشىن كەلگەن.

ەرلان قوشانوۆ «تەڭىزشەۆرويل» جشس (تشو) قازاقستان ەكونوميكاسىنىڭ دامۋىنا زور ۇلەس قوسىپ كەلە جاتقان جەتەكشى حالىقارالىق كومپانيا ەكەنىن اتاپ ءوتتى. ونىڭ قۇرىلعانىنا بيىل ءساۋىر ايىندا 30 جىل تولدى.

– وسى جىلدار ىشىندە ءسىزدىڭ كومپانيا مۇناي-گاز سالاسىنداعى ءىرى جوبالاردى جۇزەگە اسىرۋدا قازاقستاننىڭ سەنىمدى سەرىكتەسىنە اينالدى. ەلىمىزدىڭ مۇناي ونەركاسىبىنە وزىق تەحنولوگيالاردى تارتۋعا، كومىرتەگى بەيتاراپتىعىنا قول جەتكىزۋگە بەلسەندى ىقپال ەتىپ كەلەدى، – دەدى ءماجىلىس توراعاسى.

ەرلان قوشانوۆ ەڭبەك ادامىن جان-جاقتى قولداۋ مەملەكەت باسشىسى ساياساتىنىڭ باسىم باعىتتارىنىڭ ءبىرى ەكەنىن ايتا كەلە، كومپانيا تاراپىنان قازاقستاندىق جۇمىسشىلارعا لايىقتى جاعداي جاساۋدىڭ ماڭىزدىلىعىنا، سونىڭ ىشىندە الەۋمەتتىك قامسىزداندىرۋ، ءادىل ەڭبەكاقى جانە وقىتۋ ماسەلەلەرىنە توقتالدى.

– بۇگىندە ەلىمىزدە مۇناي-گاز سالاسىندا بىلىكتىلىگى جوعارى ماماندار جەتكىلىكتى. شەتەلدەن مەڭگەرىپ كەلگەن ءبىلىمى مەن ترانسۇلتتىق كومپانيالارداعى تاجىريبەسى مول ازاماتتارىمىز كوپ. وسىعان بايلانىستى ءبىز ناقتى قازاقستاندىق مامانداردى، ونىڭ ىشىندە باسشىلىق قىزمەتتەرگە تارتۋدى ۇسىنىپ وتىرمىز، – دەدى ءماجىلىس توراعاسى.

تشو باسشىسى كومپانيا قازاقستاندىق مامانداردىڭ قاتارىن ارتتىرۋعا كۇش سالىپ جاتقانىن ايتتى.

- بۇگىنگى تاڭدا نەگىزگى ءوندىرىستى 95 پايىز قازاقستاندىق قىزمەتكەرلەر قۇرايدى، ونىڭ ىشىندە 87 پايىزى جەتەكشى نەمەسە باسشىلىق قىزمەتتەگى ازاماتتار، - دەدى «تەڭىزشەۆرويل» باس ديرەكتورى.

سونداي-اق ەرلان قوشانوۆ تشو-نىڭ اتىراۋ وبلىسىنىڭ دامۋىنا ۇلكەن ۇلەس قوسىپ وتىرعانىن، ءتۇرلى الەۋمەتتىك جوبالاردى قارجىلاندىرىپ، ءوڭىردىڭ الەۋمەتتىك ينفراقۇرىلىمىنا ينۆەستيتسيا قۇيىپ جاتقانىن اتاپ ءوتتى. ول سايلانىمنىڭ باسىندا ماجىلىستە «شەۆرون» كورپوراتسياسى ەۋرازيالىق بولىمشەسىنىڭ باسقارۋشى ديرەكتورى دەرەك ماگنەسسپەن كەزدەسۋ وتكەنىن ەسكە سالدى. ودان كەيىن تاراپتار سايلاۋ ناۋقانى كەزىندە كوتەرگەن جىلىوي اۋدانى، دوسسور جانە قۇلسارى تۇرعىندارىنىڭ ماسەلەلەرىن تالقىلادى. سپيكەر تشو جەرگىلىكتى تۇرعىنداردىڭ كوتەرگەن ماسەلەسىنە مۇقيات بولىپ، ولاردى شەشۋگە بار كۇش-جىگەرىن سالۋى كەرەكتىگىن باسا ايتتى. بۇل سۇراقتار ءماجىلىس دەپۋتاتتارىنىڭ تۇراقتى باقىلاۋىندا. ماسەلە، ەڭ الدىمەن، اۋىسىم مەرزىمىن 28 كۇننەن 14 كۇنگە دەيىن قىسقارتۋ تۋرالى بولىپ وتىر.

ءوز كەزەگىندە تشو باس ديرەكتورى قىزمەتكەرلەردىڭ قاۋىپسىزدىگى كومپانيا ساياساتىنداعى باسىمدىق بولىپ قالا بەرەتىنىن العا تارتتى. اتموسفەراعا شىعارىندىلاردى ازايتۋ، قالدىقتاردى ءتيىمدى باسقارۋ جانە قورشاعان ورتانى قورعاۋ بويىنشا ەكولوگيالىق جوبالار، سونداي-اق «يگىلىك» الەۋمەتتىك ينفراقۇرىلىم باعدارلاماسى اياسىندا ءوڭىردى دامىتۋ جوبالارى تۋرالى ايتتى.

– بيىل ءبىز 75 ادامعا ارنالعان ورتالىق اۋداندىق اۋرۋحانا، اتىراۋ قالاسىندا 300 ورىندىق ءبىر مەكتەپ جانە اققىستاۋ اۋىلىندا 350 ورىندىق ءبىر مەكتەپتى اياقتاپ، تاپسىرۋدى جوسپارلاپ وتىرمىز. سونىمەن قاتار قۇلسارى قالاسىندا 600 ورىندىق مەكتەپ، اتىراۋدا دەنە شىنىقتىرۋ-ساۋىقتىرۋ كەشەنى، جىلىوي اۋدانىندا بالاباقشا قۇرىلىسى جانە قۇرساي وزەنىنىڭ جاعالاۋىن نىعايتۋ جۇمىستارى باستالادى، – دەدى كەۆين ليون.

سونداي-اق «تەڭىزشەۆرويل» جشس باس ديرەكتورى جىلىوي اۋدانى تۇرعىندارىنىڭ وتىنىشىنە وراي كومپانيا جاڭا كەلىسىمشارتتارعا اۋىسىم مەرزىمىن مەردىگەرلەردىڭ وزدەرى انىقتاۋعا مۇمكىندىك بەرەتىن نورمانى ەنگىزۋدى جوسپارلاپ وتىرعانىن جەتكىزدى.

ەرلان قوشانوۆ كومپانيانىڭ قازاقستاندىق جۇمىسشىلارعا لايىقتى جاعداي جاساۋىنىڭ ماڭىزدىلىعىن اتاپ ءوتتى. سونىڭ ىشىندە الەۋمەتتىك قامسىزداندىرۋ، ءادىل ەڭبەكاقى تولەۋ جانە وقىتۋ شەڭبەرىندە.

سونداي-اق سپيكەر دەپۋتاتتىق كورپۋس پەن «تەڭىزشەۆرويل» جشس كىرەتىن الەۋمەتتىك-جاۋاپتى كومپانيالار اراسىنداعى ءوزارا ارەكەتتەستىك تۇراقتى سيپاتقا يە بولۋى قاجەتتىگىن ايتتى. ول دەپۋتاتتاردىڭ ءوڭىردىڭ دامۋى مەن ەڭبەك جاعدايىنا قاتىستى ماسەلەلەردى پارلامەنتتىڭ جاڭا سەسسياسىندا كوتەرۋگە نيەتتى ەكەنىن اتاپ ءوتتى.

كەزدەسۋگە قازاقستان تاراپىنان ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتورايىمى ايگۇل قۇسپان، اتىراۋ وبلىسىنان سايلانعان دەپۋتات ءادىل جۇبانوۆ، ەكولوگيا جانە تابيعات پايدالانۋ كوميتەتىنىڭ مۇشەسى دۇيسەنباي تۇرعانوۆ قاتىستى. دەلەگاتسيا قۇرامىندا «تشو» جشس باس ديرەكتورىنىڭ ورىنباسارى كوڭىلقوش سۇيەسىنوۆ، ۇكىمەتپەن جانە قوعاممەن بايلانىس جونىندەگى باس مەنەدجەر دارمەن ارونوۆ جانە مۇددەلى تاراپتارمەن بايلانىس جونىندەگى مەنەدجەرى بوتاگوز قۇلشاەۆا بولدى.

Abai.kz