ءماجىلىس دەپۋتاتى داۋلەت تۇرلىحانوۆتىڭ اسكەردەگى ۇلى اسكەري ءبولىم باستىعىنىڭ بۇيرىعىنا باعىنباعانى جانە ورىنداماعانى ءۇشىن اكىمشىلىك جاۋاپكەرشىلىككە تارتىلدى.

الماتى قالاسىنىڭ اكىمشىلىك قۇقىق بۇزۋشىلىق ىستەر جونىندەگى مامانداندىرىلعان اۋدانارالىق سوتىندا اسكەري ءبولىم باستىعىنىڭ بەلگىلەنگەن تارتىپپەن بەرىلگەن بۇيرىعىن ورىنداۋدان اشىق باس تارتۋ – اكىمشىلىك قۇقىق بۇزۋشىلىق جاساعان قاتارداعى جاۋىنگەر نۇراسىل بولاتقا قاتىستى اكىمشىلىك ءىس قارالدى.

سوتتا انىقتالعانداي، 2 شىلدەدە اسكەري ءبولىمنىڭ قاتارداعى جاۋىنگەرى ن.بولات الماتى گارنيزونى گاۋپتۆاحتاسىنان شىققاننان كەيىن كومانديردىڭ بۇيرىعىنا سايكەس ءوزىنىڭ اسكەري بولىمىنە بارۋعا مىندەتتى بولعان. الايدا ول وعان بولىمشە كومانديرىنىڭ لەيتەنانت ا. بەرگەن بۇيرىعىن ورىنداۋدان اشىق تۇردە باس تارتىپ، اسكەري پوليتسيا باسقارماسىنىڭ عيماراتىنا كەلگەن اۆتوكولىكپەن بەلگىسىز باعىتتا كەتىپ قالعان.

«سوت ب.-نى اكىمشىلىك قۇقىقبۇزۋشىلىق تۋرالى كودەكستىڭ 652-بابى 6-بولىگىندە كوزدەلگەن اكىمشىلىك قۇقىق بۇزۋشىلىقتى جاساعانى ءۇشىن كىنالى دەپ تانىدى. ول 15 تاۋلىككە قاماۋعا الىندى»، - دەپ حابارلادى سوتتان.

سوت ۇكىمى زاڭدى كۇشىنە ەنگەن جوق.

ەسكە سالايىق، 2 شىلدە كۇنى داۋلەت تۇرلىحانوۆتىڭ قوناەۆ گارنيزونىنىڭ اسكەري بولىمدەرىنىڭ بىرىندە مەرزىمدى اسكەري بورىشىن وتەپ جۇرگەن ۇلى نۇراسىل بولات اسكەري نىساننان قاشىپ كەتكەن بولاتىن. كەيىن ول تابىلىپ، قىزمەت اتقاراتىن ورنىنا جەتكىزىلدى.

نۇراسىل بولات الماتى قالاسىندا زاڭگەر اننا دميتريەۆيچ پەن ونىڭ كۇيەۋى ولەگ چەرنوۆتى سوققىعا جىقتى دەپ ايىپتالۋدا.

الماتى قالالىق پوليتسيا دەپارتامەنتى اتالعان دەرەكتى قر قىلمىستىق كودەكسىنىڭ 293-بابى («بۇزاقىلىق») بويىنشا سوتقا دەيىنگى تەرگەۋدىڭ بىرىڭعاي تىزىلىمىنە تىركەدى.

كەيىن سپورت قايراتكەرى داۋلەت تۇرلىحانوۆ بالاسىنىڭ بۇزاقىلىق ارەكەتىنە بايلانىستى تۇسىنىك بەرگەن ەدى.  4 شىلدە كۇنى ماجىلىسمەن ۇلىنىڭ اينالاسىنداعى جاعدايعا قاتىستى الەۋمەتتىك جەلىدەگى جەكە پاراقشاسىندا پوست جاريالادى.

Abai.kz