بۇگىن مەملەكەت باسشىسى “ونلاين-پلاتفمورمالار جانە ونلاين-جارناما” تۋرالى زاڭعا قول قويدى.

بارشاعا بەلگىلى، الەۋمەتتىك جەلىلەر بۇگىندە نەگىزگى اقپارات كوزى مەن قوعامدىق-ساياسي باعىتتى قالىپتاستىراتىن پلاتفورماعا اينالدى.

“قوعام تىنىسىنىڭ بارومەترى” اتانعان ماسس-مەديا سالاسى قارقىندى دامىعان تۇستا اقپاراتتىق تەحنولوگيالار اسەرىمەن الەم كۇرت وزگەرىسكە ۇشىرادى، كوممۋنيكاتسيانىڭ لاندشافتى دا تەرەڭ ترانسفورماتسياعا ءتۇستى. ماسەلەن، كۇنى كەشە عانا Reuters Institute جاريالاعان بيىلعى «ديجيتال جاڭالىقتار ەسەبى» بويىنشا، الەمدە الەۋمەتتىك جەلى ارقىلى جاڭالىقپەن تانىسۋ 30 پايىزعا ۇلعايعان.

وسىعان بايلانىستى پرەزيدەنت 2022 جىلعى 16 ناۋرىزداعى جولداۋىندا مەديا سالانىڭ دامۋ ءۇردىسىن ەسكەرە وتىرىپ، باق تۋرالى زاڭدى قايتا قاراۋدى تاپسىرعانى بەلگىلى.

بۇل ورايدا مەديا قاۋىمداستىق جانە قوعامنىڭ پىكىرىنە قۇلاق ءتۇرىپ، الەمدىك تەندەنتسيالاردى مۇقيات زەردەلەپ، ماسس مەديا تۋرالى زاڭناما مەن ونلاين پلاتفورمالارعا ارنالعان ەرەجەلەردى بولەك قاراستىرۋدى ءجون سانادىق.

زاڭنىڭ قابىلدانۋى قازاقستان رەسپۋبليكاسىنداعى ونلاين-پلاتفورمالاردىڭ قىزمەتى ءۇشىن قۇقىقتىق نەگىزدەر قالىپتاستىرادى، ونلاين پلاتفورمالار جانە ونلاين جارناما سالاسىنداعى رەتتەۋدىڭ نورماتيۆتىك نەگىزىن كونسەپتۋالدىق تۇرعىدان وزەكتەندىرۋگە مۇمكىندىك بەرەدى.

وعان قوسا، ەۋروپالىق وداق قابىلداعان Digital Services Act نەمەسە تسيفرلىق قىزمەتتەر تۋرالى زاڭنىڭ بالاماسى ىسپەتتى بۇل زاڭ الەمدىك الەۋمەتتىك جەلىلەردىڭ ينتەرفەيسىن قازاقشالاۋ، ينفليۋەنسەرلەردىڭ جارناماسىن تاڭبالاۋ، زاڭسىز كونتەنتتى نەعۇرلىم ءتيىمدى مودەراتسيالاۋ ماسەلەلەرىن دە رەتتەيدى.

زاڭ اياسىندا كولەڭكەلى ەكونوميكا ءۇردىسىن ازايتۋ جانە ونلاين الاياقتىقپەن كۇرەسۋ بويىنشا قاجەتتى شارالار قابىلدانادى. باسقاشا ايتقاندا، وفلاين ومىردەگى جاۋاپكەرشىلىك ونلاين الەمدە مىندەتتەلەدى.

جالپى قابىلدانعان زاڭ ازاماتتاردىڭ قۇقىقتارى مەن بوستاندىقتارىن تولىققاندى ىسكە اسىرۋ ءۇشىن ونلاين پلاتفورمالارمەن ءتيىمدى ىنتىماقتاستىق پەن ءوزارا ءىس-قيمىل ورناتۋعا مۇمكىندىك بەرەدى. بۇل رەتتە قازىردىڭ وزىندە الەمگە ايگىلى الەۋمەتتىك جەلىلەر مەن ونلاين پلاتفورمالار ارىپتەستىك ورناتۋعا ىقىلاستى ەكەندىكتەرىن تانىتىپ، كەيبىرى وكىلدەرىن تاعايىندادى.

وسى ورايدا زاڭعا باستاماشى بولعان دەپۋتاتتارعا، جالپى ءماجىلىس جانە سەنات دەپۋتاتتارىنا، جۇمىس توبىنىڭ مۇشەلەرىنە، ۇسىنىس ايتقان، قولداۋ بىلدىرگەن بارشا بەلسەندى ازاماتتارعا العىس ايتامىز.

جاڭا زاڭ ەل يگىلىگىنە قىزمەت ەتەدى دەپ سەنەمىز.

Abai.kz