ەۋروپارلامەنت دەپۋتاتتارى كوپشىلىك داۋىسپەن قىرعىزستانداعى ادام قۇقىقتارىنىڭ احۋالىنا، ءسوز ەركىندىگىنە جانە اقپارات قۇرالدارىنا قاتىستى قىسىمدى ايىپتاعان رەزوليۋتسيانى قابىلدادى.

وندا "قىرعىزستاندا 2022 جىلدىڭ قاڭتارىنان باستاپ ادام قۇقىقتارى جانە ءسوز ەركىندىگى احۋالى ناشارلاپ كەتكەنى" ايتىلعان.

ءسىم تاراتقان مالىمدەمەدە "ەۋروپا پارلامەنتىنىڭ اياق استىنان جانە اسىعىس تۇردە قابىلداعان، شىندىققا جاناسپايتىن رەزوليۋتسياسىنا قاتىستى وكىنىشىن بىلدىرەدى", - دەپ جازىلعان.

سونىمەن بىرگە رەزوليۋتسيانى دايىنداۋدا قىرعىز تاراپتان قوسىمشا مالىمەت سۇراماعانى دا ايتىلعان.

ەۆروپارلامەنت رەزوليۋتسيادا قىرعىزستاندا تالقىلانىپ جاتقان ءتورت زاڭ جوباسى - "بۇقارالىق اقپارات قۇرالدارى", "ۇكىمەتتىك ەمەس ۇيىمدار", "شەتەلدىك وكىل" جانە "بالالاردى زياندى مالىمەتتەن قورعاۋ جونىندەگى" زاڭ جوبالارىن كەرى قايتارۋدى ۇندەپ، ەگەر بۇل زاڭ جوبالارى قابىلدانسا، ادام قۇقىقتارى احۋالى كۇرت ناشارلايدى دەپ ەسكەرتكەن.

بۇدان بولەك ازاتتىق راديوسىنىڭ قىزمەتىن توقتاتۋ ارەكەتى دە پىكىر ءبىلدىرۋ ەركىندىگىنىڭ بۇزىلۋى رەتىندە ايىپتاعان.

حالىقارالىق Freedom House ۇيىمى "دۇنيەجۇزىندەگى ەركىندىك - 2023" اتتى جاڭا بايانداماسىندا قىرعىزستاندا ءۇشىنشى جىل قاتارىنان "ەركىن ەمەس" ەلدەر قاتارىنا قوسقان.

"شەكاراسىز تىلشىلەر" ۇيىمىنىڭ ءباسپاسوز ەركىندىگى يندەكسىندە قىرعىزستان 180 مەملەكەت اراسىنان 122-ورىنعا تۇسكەن.