تۇركىستان وبلىسىنىڭ سارىاعاش اۋدانىندا 5 جاسار قىز بالانى ازاپتاپ ءولتىرۋ وقيعاسىنا قاتىستى قىلمىستىق ءىس قوزعالدى، دەپ حابارلايدى باس پروكۋراتۋرانىڭ رەسمي سايتى.

«13 شىلدەدە تۇركىستان وبلىسىنىڭ سارىاعاش اۋدانىندا زورلىقپەن ءولتىرۋ بەلگىلەرى بار جاس قىزدىڭ ءمايىتى تابىلدى. سول كۇنى پوليتسيا قىزمەتكەرلەرى وسى قىلمىستى جاسادى دەگەن كۇدىكپەن بۇرىن بىرنەشە رەت سوتتى بولعان اۋدان تۇرعىنىن ۇستالدى جانە ول ۋاقىتشا ۇستاۋ يزولياتورىنا قامالدى. بۇل فاكت بويىنشا قىلمىستىق كودەكستىڭ 99-بابىنىڭ 3-بولىگى (كامەلەتكە تولماعان بالانى ءولتىرۋ) بويىنشا سوتقا دەيىنگى تەرگەۋ باستالدى. مەملەكەت باسشىسىنىڭ تاپسىرماسىمەن بولعان وقيعانىڭ بۇكىل ءمان-جايى انىقتالادى»، - دەلىنگەن ۆەدومستۆو اقپاراتىندا.

پروكۋراتۋرا ۇسىنعان مالمەتكە ساي، كۇدىكتى 2006 جىلى 10 جىلعا سوتتالعان.

ال بيىل مامىردا ىشىمدىك ءىشىپ، جانجال كەزىندە اۋىلداسىن بالتامەن ۇرعانى ءۇشىن 3 جىلعا باس بوستاندىعى شەكتەلگەن.

«باس پروكۋراتۋرا اتالعان ۇكىمگە جازانى قاتاڭداتۋ جانە باس بوستاندىعىنان ايىرۋدى تاعايىنداۋ تۋرالى كاسساتسيالىق نارازىلىق ءتۇسىردى. پروباتسيالىق باقىلاۋدا بولعان گ. اسا اۋىر قىلمىس جاساعانىن ەسكەرە وتىرىپ، پروباتسيا قىزمەتكەرلەرىنە قاتىستى سالعىرتتىق فاكتىسى بويىنشا سوتقا دەيىنگى تەرگەپ-تەكسەرۋ باستالدى. پرەزيدەنتتىڭ تاپسىرماسىنا سايكەس، جەكە ادامعا قارسى اسا قاۋىپتى قىلمىستار ءۇشىن قىلمىستىق جاۋاپكەرشىلىكتى كۇشەيتۋگە باعىتتالعان زاڭنامالىق تۇزەتۋلەر توپتاماسى ازىرلەنۋدە»، - دەپ جازىلعان ۆەدومستۆونىڭ سايتىندا جاريالانعان حابارلامادا.

ايتا كەتەيىك، مەملەكەت باسشىسى تۇركىستان وبلىسىنداعى قايعىلى وقيعانىڭ ءمان-جايىن مۇقيات تەكسەرۋدى تاپسىرعان بولاتىن.

ال، بۇگىن كىسى قولىنان كوز جۇمعان 5 جاسار ءبۇلدىرشىننىڭ دەنەسى جەر قوينىنا تاپسىرىلدى.

تۇركىستان وبلىستىق سوتى وسى ۋاقىتقا دەيىن ادام ءولتىرىپ، 10 جىل تۇرمەدە وتىرىپ كەلگەن ادامنىڭ نەلىكتەن شارتتى جازاعا كەسىلگەنىن ءتۇسىندىردى.

فوتو: اشىق دەرەككوزدەن

Abai.kz