پرەمەر-مينيستر ءاليحان سمايىلوۆ ورتالىق مەملەكەتتىك ورگاندار، باس پروكۋراتۋرا، بقدا، قما جانە باسقا دا ۆەدومستۆولار باسشىلارىنىڭ قاتىسۋىمەن ەكونوميكانى دەمونوپوليزاتسيالاۋ جونىندەگى كوميسسيانىڭ كەزەكتى وتىرىسىن وتكىزدى، دەپ حابارلادى Halyq Uni تىلشىسى.

جيىنعا قاتىسۋشىلار جوعارى ءبىلىم سالاسىنداعى بۇرىن جەكە مەنشىككە وتكەن كەيبىر اكتيۆتەردى مەملەكەت مەنشىگىنە قايتارۋ ماسەلەسىن تالقىلادى.

پرەمەر-مينيستر قۇزىرلى مەملەكەتتىك ورگاندارعا ءتيىستى قۇجاتتار مەن شارتتاردى تەكسەرىپ، ولاردىڭ زاڭدىلىعىنا قۇقىقتىق باعا بەرۋدى تاپسىردى. بۇل رەتتە ءاليحان سمايىلوۆ اتالعان وقۋ ورىندارىنداعى وقۋ پروتسەسىنىڭ تولىق تۇراقتىلىعىن قامتاماسىز ەتۋ قاجەتتىلىگىنە توقتالدى. ويتكەنى باستالعان تەكسەرۋ ستۋدەنتتەرگە دە، ۋنيۆەرسيتەت قىزمەتكەرلەرىنە دە قاتىستى ەمەس.

كەڭەستە قاراعاندى وبلىسىنىڭ 30-عا جۋىق ەلدى مەكەنىن ەلەكتر قۋاتىمەن قامتاماسىز ەتىپ وتىرعان جەكەمەنشىك ەنەرگەتيكالىق كومپانيانىڭ جۇمىسى دا قارالدى. كاسىپورىن مەنشىگىندەگى ەلەكتر جەلىلەرىنىڭ ابدەن توزىعى جەتكەنى اتاپ ءوتىلدى. وسى رەتتە جوندەۋ جۇمىستارى جۇرگىزىلمەيدى ءارى اپاتتىق بريگادالار تاپشى. جالپى تەكسەرۋ بارىسىندا انىقتالعان بۇزۋشىلىقتار جويىلماعان. وسىعان بايلانىستى جەرگىلىكتى تۇرعىندار ەلەكتر قۋاتىنىڭ تاپشىلىعىنا، ءجيى سەبەپسىز ءوشىپ قالۋىنا، كەرى بايلانىستىڭ تولىق بولماۋىنا جانە تاعى باسقا ماسەلەلەر بويىنشا شاعىمدار ايتىپ جاتىر.

ءاليحان سمايىلوۆ كاسىپورىنعا قاتىستى جينالعان ماتەريالداردى تالداۋ جانە قالىپتاسقان جاعدايعا قۇقىقتىق باعا بەرۋ ءۇشىن باس پروكۋراتۋراعا بەرۋدى تاپسىردى. سونداي-اق كەڭەس بارىسىندا تەمىرجول كولىگى سالاسىندا دا بىرقاتار مونوپولياعا قارسى شارالاردى ىسكە اسىرۋ ماسەلەسى قارالدى.

Abai.kz