الماتىدا مامانداندىرىلعان حالىققا قىزمەت كورسەتۋ ورتالىعىنىڭ الدىنا شەتەلدىك كولىكتەردى زاڭداستىرۋ ناۋقىنا ىلىنە الماعان كولىك يەلەرى نارازىلىق جيىنىن وتكىزدى.

ولار "شەتەلدەن اكەلىنگەن كولىكتەردىڭ ءبارىن تىركەۋگە مۇمكىندىك بەرسىن، 1 قىركۇيەككە دەيىن، ودان كەيىن دەپ بولمەسىن" دەگەن تالاپ قويدى.

2022 جىلى 1 قىركۇيەكتەگى جولداۋىندا قازاقستان پرەزيدەنتى قاسىم-جومارت توقاەۆ قازاقستاندا تىركەلمەي جۇرگەن كولىكتەردى جەڭىلدىكپەن تىركەپ، زاڭداستىرۋ تۋرالى باستاما كوتەرگەن. توقاەۆ جەڭىلدىكپەن تىركەۋگە ىلىنەتىن كولىكتەردىڭ شەگى رەتىندە ءوزى جولداۋ جاساعان كۇن - 2022 جىلدىڭ 1 قىركۇيەگىن كورسەتكەن. بۇل باستاما بويىنشا، جەڭىلدىكپەن زاڭداستىرۋ ناۋقانى 2023 جىلدىڭ قاڭتارىندا باستالىپ، شىلدەنىڭ بىرىنە اياقتالعان.

قاسىم-جومارت توقاەۆ ۇندەۋ جاساعان كۇنى شەتەلدەن قازاقستانعا بەتتەگەندەر نەمەسە الدىن الا اقشاسىن تولەپ، تاپسىرىس كۇتىپ وتىرعاندار جەڭىلدىككە ىلىنە الماي قالعان.

حالىققا قىزمەت كورسەتۋ ورتالىعىنىڭ الدىنا كولىگىن زاڭداستىرعىسى كەلەتىن 50-گە جۋىق ادام جينالدى. ولار پرەزيدەنت قاسىم-جومارت توقاەۆتىڭ اتىنا ۇندەۋ جولداپ، شەتەلدەن اكەلىنگەن كولىك يەلەرىنىڭ بارلىعىنا بىردەي مۇمكىندىك جاساۋدى سۇرادى.

ۇندەۋدە ولار "شەتەلدەن جەتكىزىلگەن كولىكتەن الىناتىن ۋتيل الىم مۇلدەم الىنىپ تاستالسىن. العاشقى تىركەۋ قۇنىن ەڭ تومەنگى دەڭگەيگە ءتۇسىرسىن" دەگەن دە تالاپ قويعان.

اكىمشىلىك پوليتسيا كوميتەتىنىڭ 13 شىلدەدەگى ەسەبى بويىنشا، بيىل 26 قاڭتاردا باستالىپ، 1 شىلدەدە اياقتالعان ناۋقان كەزىندە 206 مىڭعا جۋىق شەتەل كولىگى جەڭىلدىكپەن تىركەلگەن.

جەڭىلدىكپەن تىركەۋ ناۋقانىنا باستاپقىدا ءرولى وڭ جاقتاعى اۆتوكولىكتەر مەن قازاقستانعا اۆتوموبيل رەتىندە ەمەس، اۆتوبولشەك رەتىندە كىرگەن "كونسترۋكتور-اۆتوكولىكتەر" كىرمەگەن ەدى. وڭ ءرولدى اۆتوكولىك يەلەرى مەن "اۆتوكونسترۋكتور" كولىك يەلەرى الدەنەشە رەت تالاپ ەتكەن سوڭ ولاردى دا جەڭىلدىككە قوسقان. پوليتسيا مالىمەتىنە قاراعاندا، بۇگىنگە دەيىن 14 654 "اۆتوكونسترۋكتور" اۆتوموبيلگە اينالعان.

Abai.kz