قازاقستان ۇكىمەتى تاراپىنان ماڭعىستاۋ اتوم ەنەرگەتيكالىق كەشەنىنىڭ (ماەك) سەنىمدى ءارى تۇراقتى جۇمىسىن قامتاماسىز ەتۋ ءۇشىن جەدەل شارالار قابىلدانىپ جاتىر، دەپ حابارلايدى ۇكىمەتتىڭ رەسمي سايتى.

ماڭعىستاۋ وبلىسى اكىمدىگىنىڭ سۇرانىسى بويىنشا ماەك-تە جوندەۋ جۇمىستارىن جۇرگىزۋگە قر ۇكىمەتىنىڭ رەزەرۆىنەن شامامەن 4,9 ملرد تەڭگە سوماسىندا قارجى ءبولىندى. بۇعان قاتىستى قر ۇكىمەتى ءتيىستى قاۋلى قابىلدادى.

«ماەك» جشس ۇسىنعان ءتىزىم نەگىزىندە قاجەتتى قوسالقى جابدىقتار مەن توراپتاردى (كومپونەنتتەردى) ساتىپ الۋعا قارجىلاندىرۋ تەتىكتەرى قاراستىرىلدى. اپاتتىق جاعدايداعى قۇرامداس بولىكتەردى اۋىستىرۋ ەلەكتر ستانسالارىنىڭ گەنەراتسيالاۋشى جابدىقتارىن توقتاتۋ جانە تۇتىنۋشىلار ءۇشىن شەكتەۋلەر ەنگىزۋ تاۋەكەلدەرىن بارىنشا ازايتا وتىرىپ، جابدىقتىڭ تەحنيكالىق جاي-كۇيى مەن جۇمىسقا قابىلەتتىلىگىن ساقتاۋعا جانە جۇمىس كەزىندە ولاردىڭ سەنىمدىلىگى مەن قاۋىپسىزدىگىن باقىلاۋعا مۇمكىندىك بەرەدى.

ەسكە سالا كەتەيىك، ماەك پەن ءاموز-دە ورىن العان اپاتتاردىڭ سەبەپتەرىن تەكسەرۋ جونىندەگى مەملەكەتتىك كوميسسيا جۇمىسىنىڭ قورىتىندىسىنا سايكەس ەنەرگيا كاسىپورىندارىنىڭ جۇمىسىنداعى جۇيەلىك كەمشىلىكتەر انىقتالعان بولاتىن. كەلەشەكتە مۇنداي داعدارىستىق جاعدايلاردىڭ الدىن الۋ ءۇشىن ۇكىمەت بىرقاتار شۇعىل ءارى جۇيەلى شارالاردى قولعا الماق. ولاردىڭ قاتارىندا «ماەك» جشس-نى جاڭعىرتۋ جانە كۇردەلى جوندەۋ، باتىس ەنەرگەتيكا ايماعىن نىعايتۋ، ءاموز-ءدى سىرتقى ەلەكتر قۋاتىمەن تۇراقتى قامتاماسىز ەتۋ جانە وندا ءوزىنىڭ جەكە ەنەرگيا كوزىن سالۋ، باتىس ايماقتى قازاقستاننىڭ بىرىڭعاي ەلەكتر ەنەرگەتيكالىق جۇيەسىمەن بايلانىستىرۋ جانە ت. ب. بار.

Abai.kz