ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ مۇشەلەرى قر ۇقك شەكارا اكادەمياسى كۋرسانتتارىنا ارنالعان لاگەردە ءۇش كۇننەن بەرى وقۋ-جاتتىعۋ جيىنىنا قاتىسۋدا.

ولار – ءماجىلىس دەپۋتاتتارى م.روجين، و.قۇسپەكوۆ، ب.كەرىمبەك جانە س.نۇرتازا. كۋرسانتتارمەن بىرگە اپتا بويى تاۋداعى لاگەردە تۇرىپ، جاتتىعادى. سودان كەيىن دەپۋتاتتار قىتاي جانە قىرعىزستانمەن مەملەكەتتىك شەكارانى قورعايتىن بولادى.

دەپۋتاتتار شەكارا اسكەرلەرى سوڭعى ۇلگىدەگى تەحنيكامەن جابدىقتالىپ، وندا ۇزدىكتەردىڭ ۇزدىكتەرى قىزمەت ەتۋى كەرەك دەپ ەسەپتەيدى. ويتكەنى ەلىمىزدىڭ قاۋىپسىزدىگىن قامتاماسىز ەتۋ بويىنشا ەڭ كۇردەلى جاۋىنگەرلىك مىندەتتەردى كۇن سايىن ورىندايتىن شەكاراشىلار.

– تاۋەلسىزدىك شەكارادان باستالادى. شەكاراشىلارىمىزدىڭ دايىندىعى جوعارى، وتان يگىلىگى ءۇشىن ادال قىزمەت ەتۋگە دايىن ەكەنىن كورىپ وتىرمىز. بيىك تاۋداعى شەكارانى قورعاۋدىڭ قىر-سىرىمەن تانىستىق. بۇل وتە كۇردەلى دە ناعىز ەرلەرگە لايىق جۇمىس. لاگەر كوماندادا جۇمىلىپ جۇمىس ىستەۋگە ۇيرەتەدى، - دەدى م.روجين.

دەپۋتاتتار كۋرسانتتارمەن بىرگە شاتىرلاردا تۇرادى. تاۋلى ايماقتا ەرتە تۇرىپ، ساپقا تۇرىپ، تاكتيكالىق تاپسىرمالار مەن  جاۋىنگەرلىك دايىندىقتان وتەدى.

– كۇندىز اۋا تەمپەراتۋراسى +32, تۇندە +4 بولاتىن تاۋلارداعى شاتىرلاردا تۇرۋ. تاڭەرتەڭگى ساعات 6-دا ويانۋ، قولايلى جاعدايدىڭ جوقتىعى – وسىنىڭ ءبارى ءبىزدىڭ شەكاراشىلار جاعدايى. بۇل سابىرلىلىققا، توزىمدىلىككە تاربيەلەيدى. اسكەردەگى قىزمەت – ۇلدارىمىزدى ەر-ازامات قىلىپ تاربيەلەيتىن پاتريوتتىق ورتا.  جاۋاپكەرشىلىكتىڭ، ءتارتىپتىڭ نە ەكەنىن ءتۇسىنۋدىڭ جالعىز جولى وسى. مۇمكىندىگىنشە جاستارىمىز وسىدان ءوتۋى كەرەك، – دەيدى و.قۇسبەكوۆ.

جاعداي مەن تۇرمىس-تىرشىلىكتى زەردەلەۋمەن قاتار، دەپۋتاتتار اسكەري قىزمەتشىلەرمەن اڭگىمە-دۇكەن قۇرىپ، ماتەريالدىق-تەحنيكالىق قامتاماسىز ەتۋ، ەڭبەكاقى جانە باسقا دا بىرقاتار جۇيەلى ماسەلەلەردى انىقتادى.

– مەملەكەت باسشىسى اسكەري قىزمەتشىلەر ءۇشىن جاعدايدى جاقسارتۋ قاجەتتىگىنە بىرنەشە رەت نازار اۋداردى. ەلورداعا ءار ساربازدىڭ، ءار وفيتسەردىڭ ماسەلەسىن جەتكىزەمىز. كۇردەلى پروبلەمالاردىڭ ءبىرى – وفيتسەرلەردىڭ جالاقىسىنىڭ تومەندىگى، ورتا ەسەپپەن 170-220 مىڭ تەڭگە. بۇگىنگى نارىقپەن بۇل وتە از. تۇرعىن ءۇي، الەۋمەتتىك قامسىزداندىرۋ ماسەلەلەرى بار. ءاربىر زاستاۆادا ءتيىستى تەحنيكالىق قۇرالداردىڭ بولۋى ماڭىزدى. دروندار، زاماناۋي قارۋ-جاراق، كولىك بولۋى كەرەك، – دەيدى س.نۇرتازا.

جوبا بارىسىندا دەپۋتاتتار ۇلتتىق قاۋىپسىزدىك جۇيەسىن جەتىلدىرۋگە باعىتتالعان جاڭا زاڭنامالىق باستامالار مەن شارالاردى، جاستاردى وتانسۇيگىشتىككە تاربيەلەۋدەگى تاسىلدەردى، سونداي-اق اسكەردە قىزمەت ەتۋ جاعدايلارىن جاقسارتۋ قاجەتتىلىگىن زەردەلەۋدى كوزدەپ وتىر.

Abai.kz