سوڭعى جىلدارى ەلىمىزدە سەريال ءوندىرىسى، كرەاتيۆتى يندۋستريا دامىپ جاتقانىن بىلەسىزدەر. بىزدە تۇسىرىلگەن سەريالداردى شەتەلدىك ارنالارعا ساتىپ الۋدا.

سونداي ءفيلمنىڭ ءبىرى - قالتارىستاعى قاھارماندى، تاساداعى تۇلعانى، ارامىزدا جۇرگەن بۇگىنگىنىڭ باتىرلارىن ارقاۋ ەتەتىن “قاhارمان” اتتى تەلەونىم. مەملەكەت باسشىسى تاپسىرعانداي قاراپايىم ەڭبەك ادامىن ناسيحاتتاۋدى ماقسات ەتكەن تەلەسەريالدىڭ باستى كەيىپكەرى - وتكەن جىلى عانا ءتىلسىز جاۋمەن ارپالىسىپ، ءۇش ادامنىڭ ءومىرىن قۇتقارعان، وكىنىشكە وراي، ءوزى اجال قۇشقان ءورت ءسوندىرۋشى اسقار زابيكۋلين.

الاپات ءورت كەزىندە وپات بولعان باتىر باۋىرىمىزدىڭ بەينەسىن كورسەتەتىن، سول ارقىلى جالپى ءورت سوندىرۋشىلەر مەن قۇتقارۋشىلاردىڭ جانقيار ەرلىكتەرى ءھام ەرەن ەڭبەكتەرىن شىنايى سۋرەتتەيتىن تەلەسەريال ناقتى دەرەكتەر ارىلى ءوربيدى.

بۇگىن استانا قالاسىنداعى ءتۇسىرىلىم الاڭىنا بارىپ، شىعارماشىلىق توپپەن كەزدەستىم.

بۇل جەرگە اسقاردىڭ جۇبايى انەل مەن قىزدارى اديا، دامينا دا كەلگەن ەكەن، ولارمەن اڭگىمەلەستىك. انەل سەريالدىڭ ستسەناريىنە كوڭىلى تولاتىنىن ايتتى.

مينيسترلىكتىڭ قولداۋىمەن “Bas production” كومپانياسى ءتۇسىرىپ جاتقان سەريال بۇيىرسا قىركۇيەك ايىندا “Astana” ارناسىنان كورسەتىلەدى. ءتۇسىرىلىم توبىنا ساتتىلىك تىلەيمىز!

دارحان قىدىرالى،

قر اقپارات جانە قوعامدىق دامۋ ءمينيسترى

Abai.kz