قازاقستانعا اەس-ءتى قاي ەل سالاتىنى بەلگىسىز
ەنەرگەتيكا ءمينيسترى الماسادام ساتقاليەۆ بۇگىن ۇكىمەت وتىرىسىنان كەيىن تىلشىلەرگە بەرگەن سۇحباتىندا اەس قۇرىلىسىنا قاتىستى پىكىر ءبىلدىردى.
«ۇكىمەتتىڭ نازارىندا تۇرعان جوبالاردىڭ ءبىرى – اتوم ەلەكتر ستانساسىن سالۋ. ءتيىستى جول كارتاسى بار، قازىر سونىڭ اياسىندا نىسان سالىناتىن ورىندى تاڭداۋ جونىندە قوعامدىق تىڭداۋ وتەدى. ءارى قارايعى شەشىم سول قوعامدىق تىڭداۋدىڭ قورىتىندىسى بويىنشا جانە ۇكىمەتتىڭ ساراپشىلارمەن اقىلداسۋىنان كەيىن قابىلدانادى. «قازاقستان اتوم ەلەكتر ستانسالارى» قازىر وتكىزىپ جاتقان كونكۋرس ءالى كۇشىندە. ول جەردە بىرنەشە الەۋەتتى قاتىسۋشى بار. اەس سالۋ تۋرالى تالاي ايتتىق. كونكۋرسقا قاتىسۋشىلاردىڭ قاتارىن كەڭەيتتىك جانە جول كارتاسى اياسىندا جۇمىس ىستەپ جاتىرمىز»، - دەدى ەنەرگەتيكا ءمينيسترى.
Abai.kz
