3 شىلدەدە ماڭعىستاۋ اتوم ەنەرگەتيكا كومبيناتىنىڭ (ماەك) ەلەكتر ستانتسياسىندا بولعان اپاتتى توقتاۋدىڭ سەبەبى انىقتالدى، دەپ حابارلايدى Ulysmedia.kz.

«KEGOC» اق مالىمەتىنشە، ماەك جەس ءىرى بلوگىنىڭ اجىراتىلۋىنا ءوندىرۋشى جابدىقتىڭ توزۋى سەبەپ بولعان.

«كومپانيانىڭ رەلەلىك قورعاۋ جانە اپاتقا قارسى اۆتوماتيكاسى شتاتتىق رەجيمدە ىسكە قوسىلدى. بۇل اتىراۋ جانە ماڭعىستاۋ ەنەرگيا توراپتارىنىڭ تولىق وشۋىنە جول بەرمەدى. «KEGOC» اق قىزمەتكەرلەرىنىڭ ۇيلەسىمدى ءىس-قيمىلى قىسقا مەرزىمدە جۇمىس سحەماسىن قالپىنا كەلتىرۋگە مۇمكىندىك بەردى. ءبىر ساعاتتان از ۋاقىت ىشىندە اتىراۋ ەنەرگيا تورابى، ءسال كەيىنىرەك ماڭعىستاۋ تورابى قازاقستاننىڭ بىرىڭعاي ەنەرگەتيكا جۇيەسىنىڭ باتىس ايماعىمەن سينحروندالدى.

اپاتتىق جاعدايدى تالداۋ كورسەتكەندەي، جۇمىس ىستەپ تۇرعان ەلەكتر ستانتسيالارىن جاڭعىرتۋ جانە رەكونسترۋكتسيالاۋ قاجەت، اتىراۋ مۇناي وڭدەۋ زاۋىتىن سىرتقى ەلەكترمەن جابدىقتاۋدى كۇشەيتۋ جانە جاڭا زاماناۋي ەنەرگيا كوزدەرىن سالۋ كەرەك»، - دەلىنگەن كومپانيا حابارلاماسىندا.

ءمالىم ەتىلگەندەي، «سامۇرىق-قازىنا» اق KEGOC كومپانياسىنىڭ ۇزىندىعى 770 شاقىرىم بولاتىن 220 كۆ اۋە جەلىسىن سالۋ، قولدانىستاعى 220 كۆ قوسالقى ستانتسيالاردى كەڭەيتۋ جانە 220 كۆ تاراتۋ قوسالقى ستانتسياسىن سالۋ ارقىلى باتىس ەنەرگەتيكالىق ايماقتىڭ ەلەكتر جەلىسىن كۇشەيتۋ جوباسىن اياقتاۋدى باقىلاۋدا ۇستاپ وتىر. جوبا بيىلعى جەلتوقسان ايىندا تولىق اياقتالماق. ناتيجەسىندە ءترانزيتتىڭ وتكىزۋ قابىلەتى «ورال-اتىراۋ» ۋچاسكەسىندە – ەكى ەسەگە، «اتىراۋ-ماڭعىستاۋ» ۋچاسكەسىندە – ءتورت ەسەگە ۇلعايادى، بۇل باتىس ايماق تۇتىنۋشىلارىن ەلەكترمەن جابدىقتاۋ سەنىمدىلىگىن ايتارلىقتاي كۇشەيتەدى.

ەسكە سالايىق، 3 شىلدە كۇنى ماەك-تە №1 ەنەرگەتيكالىق بلوكتىڭ جۇمىسى اپاتتى جاعدايدا توقتاپ قالعان بولاتىن. اپات سالدارىنان "اتىراۋ مۇناي وڭدەۋ زاۋىتىنىڭ" جۇمىسى دا توقتادى. قالانىڭ ءبىراز بولىگى جارىقسىز قالدى.

ماەك قىزمەتكەرلەرى ءساۋىر ايىندا كاسىپورىندا جابدىقتاردىڭ توزعانىن، سونداي-اق جالاقىنىڭ تومەندىگىنە بايلانىستى كادرلار جەتىسپەيتىنىن ايتقان. Ulysmedia ءتىلشىسى ەنەرگەتيكا ءمينيسترى الماسادام ساتقاليەۆتەن نەگە بۇل ەسكەرتۋدى ەشكىم ەلەمەگەنىن سۇرادى.

مينيستر ماەك-تەگى جاعدايدىڭ كۇردەلى ەكەنىن راستادى. وندا تولىق كولەمدە كۇردەلى جوندەۋ جۇرگىزىلمەگەن، قارجىلاندىرۋ جەتكىلىكسىز بولعان.

ال ۇكىمەت باسشىسى ءاليحان سمايىلوۆ اتىراۋ زاۋىتىنداعى اپات سالدارىنان ەلدە جانارماي تاپشىلىعى تۋىندامايتىنىنا سەندىردى.

13 شىلدەدە ماڭعىستاۋ اتوم ەنەرگەتيكالىق كومبيناتىندا (ماەك) جانە اتىراۋ مۇناي وڭدەۋ زاۋىتىندا ء(اموز) تەكسەرۋدىڭ الدىن الا قورىتىندىسى جاريالاندى.

ءدال سول كۇنى “قازمۇنايگاز” باسشىسى مەن ەنەرگەتيكا ۆيتسە-مينيسترىنە سوگىس جاريالاندى.

فوتو: اشىق دەرەككوزدەن

Abai.kz