وقۋ-اعارتۋ مينيسترلىگىنىڭ مالىمەتىنشە، ءاربىر وقۋشىعا كيىم-كەشەك پەن كەڭسە تاۋارلارىن ساتىپ الۋى ءۇشىن 40 567 تەڭگەنى قۇرايتىن قارجى بولىنەدى. قاراجات اتا-انالاردىڭ كارتوچكالىق شوتتارىنا اۋدارىلادى.

"بۇل قاراجات اتا-انالارعا بالالارىمەن بىرگە مەكتەپ فورماسىن، اياق كيىم، كەڭسە تاۋارلارىن ءوز بەتىنشە تاڭداپ الۋى ءۇشىن بەرىلەدى. قابىلدانعان شەشىم اتا-انالار مەن بالالاردىڭ جەتكىزۋشىلەردى ءوز بەتىنشە تاڭداۋىنا مۇمكىندىك بەرەدى جانە ساپاسىز تاۋارلاردى ۇسىنۋدى بولدىرمايدى", - دەدى بالا قۇقىقتارىن قورعاۋ كوميتەتى توراعاسىنىڭ ورىنباسارى جولداس باتىرحان.

از قامتىلعان وتباسىلارعا ماتەريالدىق كومەك كورسەتۋ جانە بالالاردى 100% وقۋمەن قامتاماسىز ەتۋ ءۇشىن جالپىعا بىردەي مىندەتتى ورتا ءبىلىم بەرۋ قورى جۇمىس ىستەيدى. "ۆسەوبۋچ" قورىنىڭ قولداۋى اياسىندا اتاۋلى الەۋمەتتىك كومەك الاتىن وتباسى بالالارىنا، سونداي-اق جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىندەگى وتباسى بالالارىنا ماتەريالدىق كومەك كورسەتىلەدى.

جاڭا وقۋ جىلى قارساڭىندا جەتىم جانە اتا-اناسىنىڭ قامقورلىعىنسىز قالعان بالالارعا، سونداي-اق اپاتتى جاعدايعا دۋشار بولعان مەكتەپ وقۋشىلارىنا ماتەريالدىق كومەك كورسەتىلەدى. ونىڭ ىشىندە اباي اۋدانىنداعى ورمان ورتىمەن كۇرەستە قازا تاپقان ازاماتتاردىڭ بالالارى دا بار.

مينيسترلىك وتكەن جىلى مەكتەپ جيناقتارىن ساتىپ الۋ سوماسى 17 مىڭ تەڭگەدەن باستالعانىن ەسكە سالدى.