بۇل ءتىزىمدى بەلسەندىلەر جاساعان. ۇيىم مالىمەتىنشە، نۇكىستە وزبەك بيلىگى مالىمدەگەندەي، 21 ەمەس، كەم دەگەندە 55 ادام قازا تاپقان.

Freedom for Eurasia سايتىندا جاريالانعان باياندامانى بەلگىلى قۇقىق قورعاۋشى ۆيتالي پونومارەۆ، عالىم اعەلەۋوۆ جانە دميتري كاباك دايىنداعان. بۇل جايىندا ازاتتىقتىڭ وزبەك قىزمەتى 31 شىلدەدە جازدى.

ولار قاراقالپاقستان مەن بۇحاراعا ەكى رەت بارىپ، وقيعانىڭ كۋالەرىمەن سويلەسىپ، دايەكتەردى انىقتاۋعا تىرىسقان. ولار ءۇشىنشى رەت بارعاندا تاشكەنت كىرگىزبەي قويعان.

باياندامانى ازىرلەۋگە ۇلەس قوسقان جەرگىلىكتى بەلسەندىلەردىڭ اتى-ءجونى ولاردىڭ قاۋىپسىزدىگىنە بايلانىستى اتالماعان.

قۇجاتتا كورسەتىلگەندەي، ۇلتتىق گۆارديانىڭ ءتورت وكىلىنىڭ ءولىمى جايلى مالىمەت راستالماعان.

"2022 جىلدىڭ 1-2 شىلدە كۇندەرى قاراقالپاقستاندا قوعامدىق ءتارتىپتى ساقتاۋعا تارتىلعان بىردە-ءبىر كۇش قۇرىلىم وكىلدەرى قازا بولماعان", - دەپ جازىلعان باياندامادا.

وندا رەسمي بيلىك جاريالاعان 21 ادامنان باسقا تاعى 34 ادامنىڭ ءومىرى قيىلعانى راستالعان. اۆتورلار بۇل سوڭعى ءتىزىم ەمەس ەكەنىن، نۇكىس وقيعاسىندا 70-تەن استام ادامنىڭ قايتىس بولعانى جونىندە مالىمەت بار ەكەنى ايتىلدى.

وزبەكستاندا بىلتىر كونستيتۋتسياعا وزگەرىستەر ەنگىزىلىپ جاتقاندا، قاراقالپاقستاننىڭ اۆتونوم رەسپۋبليكاسى دەگەن مارتەبەسى الىنىپ تاستالعان. 1-2 شىلدەدە قاراقالپاق حالقى وزگەرىستەرگە قارسىلىق ءبىلدىرىپ جاپپاي نارازىلىققا شىققان. نارازىلىق قارۋلى كۇشپەن باسىلعان. قاندى وقيعادان كەيىن نەگىزگى زاڭعا ەنگىزىلگەن وزگەرىستەر الىنىپ تاستالدى. 500-دەن استام ادام ۇستالىپ، كوبى تەرگەۋدەن سوڭ بوساتىلعان.

اقش، ەۋرووداق، بۇۇ جانە حالىقارالىق ۇيىمدار بۇل وقيعانى اشىق تەرگەۋگە شاقىرعان.

Abai.kz