اقپارات جانە قوعامدىق دامۋ مينيسترلىگى ەل ازاماتتارى قانداي شەت مەملەكەتتەردە تەولوگيالىق ءبىلىم الا الاتىندىعىن جاريا ەتتى. 

«قازىرگى تاڭدا قازاقستاندىقتار تەولوگيالىق ء(دىني) ءبىلىمدى ەگيپەت اراب رەسپۋبليكاسى، تۇركيا رەسپۋبليكاسى، ساۋد ارابياسى كورولدىگى، يوردانيا حاشيميت كورولدىگى، بىرىككەن اراب امىرلىكتەرى جانە تاعى باسقا مەملەكەتتەردە الۋدا. وسىعان بايلانىستى قازاقستان مۇسىلماندارى ءدىني باسقارماسى (قمدب) جاستارىمىزدى راديكالدى اعىمداردىڭ ىقپالىنان قورعاۋ ماقساتىندا بەلگىلى تەولوگيالىق ۋنيۆەرسيتەتتەرمەن، اتاپ ايتقاندا «حاسەكي» ينستيتۋتى (تۇركيا رەسپۋبليكاسى), ءال-ازھار ۋنيۆەرسيتەتى (ەگيپەت اراب رەسپۋبليكاسى) تاشكەنت يسلام ۋنيۆەرسيتەتى (وزبەكستان) جانە رەسەي يسلام ۋنيۆەرسيتەتىمەن (رەسەي فەدەراتسياسى) كەلىسىمگە قول قويعان. قمدب ۇسىنىمى بولعان جاعدايدا قازاقستاندىقتار جوعارىدا اتالعان وقۋ ورىندارىنىڭ كەز كەلگەنىنە وقۋعا ءتۇسىپ، بىلىكتىلىگىن ارتتىرۋ كۋرستارىنان وتە الادى»، - دەپ اتاپ وتەدى مينيسترلىكتەن اگەنتتىكتىڭ رەسمي ساۋالىنا بەرگەن جاۋابىندا.

ماسەلەن، ۆەدومستۆو دەرەگىنشە، قمدب مەن تۇركيا رەسپۋبليكاسى ءدىن ىستەرى باسقارماسى اراسىنداعى كەلىسىم اياسىندا 2023-2024 وقۋ جىلىنا تۇركيانىڭ «حاسەكي» ينستيتۋتىنا قازاقستاننان 25 ازامات وقۋعا قابىلداندى. جالپى اتالعان وقۋ ورنىنا 2013-2022 جىلدارى ارالىعىندا 189 قازاقستان ازاماتتارى قابىلدانىپ، بۇگىنگى كۇنى 102 تۇلەك 3 جىلعى وقۋلارىن ءبىتىرىپ، ەلگە ورالدى.

«سونىمەن قاتار، ءال-ازھار ۋنيۆەرسيتەتى ەلىمىزدىڭ جوعارى ءبىلىمدى ءدىني كادرلارىن دايارلاۋدا ەلەۋلى ۇلەس قوسىپ كەلەدى. قمدب اقپاراتىنا سايكەس اتالعان وقۋ ورىنىندا 80 ستۋدەنت ءبىلىم الۋدا»، - دەدى مينيسترلىكتەن.

Abai.kz