بيىل قوستاناي وبلىسىندا ءبىرىنشى سىنىپقا بارعان بالالاردىڭ 29,5 پروتسەنتى عانا قازاق مەكتەپتەرىن تاڭداعان. ال، ۇلتتىق بولىنىسكە قاراساق، وبلىس حالقىنىڭ 45 پروتسەنتى جەرگىلىكتى حالىق، 33 پروتسەنتى ورىس حالقىنىڭ ۇلەسىنە جاتادى، تاعى 10 پروتسەنتى ۋكرايندار.

ال، قازاقتاردىڭ ورتاشا جاسى جەرگىلىكتى ورىستارعا قاراعاندا ەكى ەسە جاس بولعانىنا قاراماستان، ورىس مەكتەپتەرىندە وقيتىن بالالاردىڭ 50 پروتسەنتى تاعى قازاق بالالارى. ال، كەيبىر اۋدانداردا ءبىر عانا قازاق ءتىلدى مەكتەپ بار. بۇل قايشىلىقتى جويۋدىڭ ءبىر عانا جولى بار - ول وڭتۇستىك پەن باتىستان حالىقتىڭ ءبىر بولىگىن توبىل جەرىنە كوشىرۋ جانە اتا-انالارعا ءتۇسىندىرۋ جۇمىستارىن جۇرگىزۋ. ايتپەسە، جاعداي مۇلدەم وزگەرمەۋى مۇمكىن.
ايتقانداي، وبلىستىڭ وڭتۇستىك اۋداندارىندا (امانگەلدى، جانكەلدين اۋداندارى مەن ارقالىق قالاسى) قازاق مەكتەپتەرىنە بالا بەرمەۋ دەگەن پروبلەما جوق. شىنىن ايتۋ كەرەك، اتالعان اۋدانداردا ءبىر تازا ورىس مەكتەبى (جانكەلدين اۋدانى) مەن ارالاس مەكتەپ (امانگەلدى اۋدانى) بار، ال، ارقالىقتا مەكتەپتەردىڭ باسىم بولىگى قازاق ءتىلدى مەكتەپتەر، ارينە، وندا ارالاس مەكتەپتەر دە جۇمىس ىستەپ تۇر!
جالپى، مەنىڭ ويىمشا وبلىستاعى قازاق تىلىندەگى مەكتەپ جانە بالا باقشا پروبلەماسى وتكىر دەپ سانايمىن. بۇل ماسەلەگە رەسپۋبليكا نازار اۋدارۋى قاجەت!

اماندىق ءامىرحامزين
Abai.kz