مينيستر اجار عينيات قاراعاندىداعى بالالاردىڭ تاماقتان ۋلانباعانىن مالىمدەدى. 

قاراعاندى قالاسىندا اۋرۋحاناعا تۇسكەن 14 بالانىڭ تاماقتان ۋلانباعانى انىقتالدى. بۇل تۋرالى دەنساۋلىق ساقتاۋ ءمينيسترى اجار عينيات ايتتى، دەپ حابارلادى Halyq Uni تىلشىسى.

ءمينيستردىڭ ايتۋىنشا، قاراعاندى وبلىسىنىڭ ارناۋلى الەۋمەتتىك قىزمەت كورسەتۋ ورتالىعىنان اۋرۋحاناعا تۇسكەن 14 بالانىڭ جەتەۋى ساۋىعىپ، اۋرۋحانادان شىعارىلعان.

«قازىر ولار سول ورتالىقتاعى دارىگەرلەردىڭ باقىلاۋىندا. 6 بالا رەانيماتسيا بولىمىندە جاتىر. 4 بالانىڭ جاعدايى وڭ ديناميكامەن اۋىر بولىپ قالۋدا. 2 بالانىڭ جاعدايى وتە اۋىر. جاعدايدىڭ اۋىرلىعى نەۆرولوگيالىق جانە ينتوسيكاتسيالىق سيندرومىنا، تىنىس الۋ جەتكىلىكسىزدىگىنە بايلانىستى بولىپ وتىر.

وسى وقيعا تۋرالى اقپارات تۇسكەننەن باستاپ، دەنساۋلىق ساقتاۋ مينيسترلىگى شۇعىل تۇردە جەتەكشى رەسپۋبليكالىق بالالار ماماندارىنىڭ شىعۋىن ۇيىمداستىردى. قارقىندى تەراپيا قامتاماسىز ەتىلىپ جاتىر. رەسپۋبليكالىق جانە وبلىستىق دەڭگەيدەگى بەيىندى مامانداردىڭ كەڭەيتىلگەن كونسوليۋمدارى كۇن سايىن ۇيىمداستىرىلادى»، - دەدى مينيستر ۇكىمەت وتىرىسىندا.

اجار عينيات مينيسترلىك زارداپ شەككەن بالالاردىڭ جاعدايىنا مونيتورينگ جۇرگىزىپ، ولارعا مەديتسينالىق كومەك كورسەتىپ جاتقانىن اتاپ ءوتتى. الدىن الا تەكسەرۋ ناتيجەسىندە بالالاردىڭ تاماقتان ۋلانباعانى انىقتالعان.

«سانيتارلىق ەپيدەميولوگيالىق باقىلاۋ كوميتەتى ەپيدەمياعا قارسى جانە تەكسەرۋ شارالارىن جالعاستىرىپ جاتىر. الدىن الا ەپيدەميولوگيالىق تەكسەرۋ، زەرتحانالىق جانە اسپاپتىق زەرتتەۋ ناتيجەسى اۋرۋدىڭ دامۋ سيپاتى تاماقتان ۋلانباعانىن جانە ينفەكتسيالىق اۋرۋلاردىڭ جوعىن كورسەتتى. بۇل جاعدايدىڭ بولۋ سەبەبىن دارىگەر ماماندار توكسيكالىق زاتتان قاتتى ۋلانعان دەپ پايىمدايدى. قازىر سوت مەديتسينالىق ساراپتاما جۇرگىزىلىپ جاتىر. بالالاردىڭ جاعدايى مينيسترلىكتىڭ ەرەكشە باقىلاۋىندا»، - دەدى ۆەدومستۆو باسشىسى.

پرەمەر-مينيستر ءاليحان سمايىلوۆ مينيسترگە ۋلانعان بالالارعا بارلىق كومەك كورسەتىپ، ولاردىڭ جاعدايىن اۋرۋحانادان شىققاننان كەيىن دە ەرەكشە باقىلاۋدا ۇستاۋدى تاپسىردى.

Abai.kz