قازاقستان رەسپۋبليكاسىنىڭ پرەزيدەنتى
قاسىم-جومارت كەمەلۇلى توقاەۆقا;
قازاقستان رەسپۋبليكاسىنىڭ پرەمەر-ءمينيسترى
ءاليحان اسحانۇلى سمايىلوۆقا;
قازاقستان رەسپۋبليكاسىنىڭ مادەنيەت جانە سپورت ءمينيسترى
اسحات رازدىقۇلى ورالوۆقا;
قازاقستان رەسپۋبليكاسىنىڭ اقپارات جانە قوعامدىق دامۋ ءمينيسترى دارحان قۋاندىقۇلى قىدىرالىگە;
استانا قالاسىنىڭ اكىمى جەڭىس ماحمۇدۇلى قاسىمبەككە;
الماتى قالاسىنىڭ اكىمى ەربولات اسقاربەكۇلى دوساەۆقا;
شىمكەنت قالاسىنىڭ اكىمى مۇرات دۇيسەنبەكۇلى  ايتەنوۆكە;
تۇركىستان وبلىسىنىڭ اكىمى دارحان امانگەلدىۇلى ساتىبالدىعا;
قازاقستان جازۋشىلار وداعى باسقارماسىنىنىڭ توراعاسى
مەرەكە ابدەشۇلى قۇلكەنوۆكە;
دۇنيەجۇزى قازاقتارى قاۋىمداستىعى تورالقا توراعاسىنىڭ ءبىرىنشى ورىنباسارى زاۋىتبەك قاۋىسبەكۇلى تۇرىسبەكوۆكە!

اشىق حات

قۇرمەتتى قاسىم-جومارت كەمەلۇلى!

كەلەسى 2024 جىلى كوگىلدىر كوكتەمدە، دالىرەگى 16 ناۋرىزدا قازاقتىڭ قارىمدى قالامگەرى، مەملەكەت جانە قوعام قايراتكەرى، قازاقستاننىڭ ەڭبەك سىڭىرگەن قايراتكەرى، كىسىگە كورسەتەر قايىرىمدىلىعى مول ناعىز شىنايى ۇلتجاندى ازامات قالداربەك نايمانباەۆتىڭ دۇنيەگە كەلگەنىنە 85 جىل، ال قوڭىر كۇزدە، دالىرەگى 22 قىركۇيەكتە  باقيلىق بولعانىنا 20 جىل  تولادى. قازاق مەملەكەتتىك ۋنيۆەرسيتەتى (قازىرگى ءال-فارابي اتىنداعى قازاق ۇلتتىق ۋنيۆەرسيتەتى) جۋرناليستيكا فاكۋلتەتىنىڭ تالانتتى تۇلەگى ۇزاق جىلدار بەدەرىندە  رەسپۋبليكالىق  گازەت-جۋرنال رەداكتسيالارىندا، كوركەم ادەبيەت باسپالارىندا جەمىستى قىزمەت اتقارعان. تاماشا كوركەم ادەبي تۋىندىلارى وقىرمان جۇرەگىنە جارقىن جول تاپقان. ءوز زامانداستارىنىڭ ومىرىنەن جازىلعان «باستاۋ»، «قوشتاسقىم كەلمەيدى»، «ءۇمىت وتكەلى»، «بەيمەزگىل قوناق»، «اپتاپ»، «شىلدە»، «كوكتوبە»، «وت پەن ويىن» سياقتى جيىرمادان استام اڭگىمە، پوۆەست، رومانى كەڭەستىك سوتسياليستىك رەسپۋبليكالار وداعى حالىقتارىنىڭ تىلىندە، بۇعان قوسا-قابات بولگار، پولياك، چەح، نەمىس، جالپى  وتىزدان استام تىلگە اۋدارىلىپ، وقىرمانداردىڭ ىستىق ىقىلاسىنا بولەنگەن بولاتىن. بۇدان بولەك «دومالاق ارىز»، «ەرلى-زايىپتى ەكەۋ جانە باسقالار»، «جاڭا جىل الدىندا» دەپ اتالاتىن درامالىق شىعارمالارى رەسپۋبليكامىزدىڭ بىرقاتار تەاترلارىندا ساحنالانعان. قازاقستان جازۋشىلار وداعىنا باسشىلىق جاساعان كەزەڭدە وزگە دە اقىن-جازۋشىلارىمىزبەن بىرگە تۋعان ادەبيەتىمىزدىڭ تۋىن كوككە  كوتەرۋگە بەلسەنە اتسالىسقانى بارشاعا بەلگىلى. دۇنيەجۇزى قازاقتارى قاۋىمداستىعى تورالقا توراعاسىنىڭ ءبىرىنشى ورىنباسارى  رەتىندە تورتكۇل الەمگە تارىداي شاشىلعان 43 ەلدى ارالاپ، بەس ميلليونداي  قانداستارىمىزدىڭ ءبىر ميلليوندايىن  اتامەكەنگە ورالتىپ، حالىقتىڭ اسقان  سۇيىسپەنشىلىگىنە بولەنگەن اسىل اردا ازامات تۇعىن. بارلىق بيلىك قولىندا تۇرسا دا ءوزى الماي تالاي اقىن-جازۋشىعا، شەتەلدىك زيالى قاۋىم وكىلدەرىنە، قانداستارىمىزعا باسپانامەن قوسا-قابات اتاق، سىيلىق، وردەن-مەدال اپەرگەنى دە جادىمىزدا.

بۇكىل سانالى عۇمىرىن تۋعان حالقىنا، شەتەلدىك قانداستارىمىزعا، قالىڭ قازاعىنا  قىزمەت ەتۋگە ارناعان جاۋھار جازۋشىعا، كورنەكتى مەملەكەت جانە قوعام  قايراتكەرىنە، قالا بەردى قاراپايىم قايىرىمدى جانعا دەگەن قۇرمەتىمىزدىڭ ءتيىستى تالاپ دەڭگەيىندە بولماي وتىرعانى كوڭىلىمىزگە كىربىڭ تۇسىرەدى. قالەكەڭ باقيلىق بولعاننان كەيىن 2005 جىلى دۇنيەجۇزى قازاقتارى قاۋىمداستىعىنىڭ ۇيىتقى بولۋىمەن الماتىداعى «جازۋشى» باسپاسىنان قالداربەك نايمانباەۆتىڭ قوستومدىق تاڭدامالى شىعارمالار جيناعى مەن  جۋرناليست، دۇنيەجۇزى قازاقتارى قاۋىمداستىعى  باسپا جانە اقپارات  ورتالىعىنىڭ جەتەكشىسى  تىلەك داۋلەتوۆ قۇراستىرعان «قاۋىمداسقان قازاقتىڭ قالداربەگى» اتتى ەستەلىكتەر كىتابى باسپادان شىقتى. 2009 جىلى «ءبىلىم» باسپاسىنان «ءسىز كۇتكەن كىتاپ» سەرياسىمەن قالامگەردىڭ «داڭق تۇعىرىندا» اتتى تۇڭعىش دەرەكتى پوۆەسى قايتا جارىق كوردى. 2020 جىلى الماتىداعى «ARNA-B» باسپاسىنان  سىنشى، حالىقارالىق «الاش» ادەبي سىيلىعىنىڭ لاۋرەاتى، «قۇرمەت» وردەنىنىڭ يەگەرى  باقىت ساربالاۇلىنىڭ قۇراستىرۋىمەن «قازاقتىڭ قالداربەگى» دەپ اتالاتىن ەستەلىكتەر، ەسسەلەر جيناعى، ال 2023 جىلى شىمكەنتتەگى «قىزمەت» باسپاسىنان وسى جولدار اۆتورىنىڭ  «قالىڭ قازاقتىڭ قالداربەگى: قالامگەرلىك، قايراتكەرلىك قاسيەتتەرى» اتتى ادەبي-سىن، عىلىمي-زەرتتەۋ ەڭبەگى وقىوماندار نازارىنا ۇسىنىلىپ وتىر. وسىمەن بولدى... باسقا ەشقانداي كىتابى جارىق كورمەگەن.

قالەكەڭ كوزدەن كەتسە دە كوڭىلدەن كەتپەيتىن تاۋتۇلعا  ەمەس پە؟!. وكىنىشكە وراي، بۇگىندە استانا، الماتى، شىمكەنتتى ايتپاعاندا جەتىسايدىڭ وزىندە دە  ونىڭ اتىنا بەرىلگەن كوشە نە مەكتەپتى كەزىكتىرە المايسىزدار. ەڭسەلى ەسكەرتكىش جايلى ايتپاي-اق قويالىق. حالقىمىزدىڭ «ءولى ريزا بولماي، ءتىرى بايىمايدى» دەگەن دانالىق ءسوزىن ەسكەرەتىن بولساق،  كەش تە بولسا، ىزگىلىكتى دە يگىلىكتى ءىس-شارالاردى قولعا الۋىمىز كەرەك سياقتى. سونىڭ ەڭ باستىعى --جاۋھار جازۋشىنىڭ جەتى تومدىق تاڭدامالى اكادەميالىق شىعارمالار جيناعىن شىعارساق، نۇر ۇستىنە نۇر بولار ەدى. قالامگەر جايلى جازىلعان پروزا، پوەزيا، دراماتۋرگيا، ادەبي-سىن، عىلىمي-زەرتتەۋ ەڭبەكتەرىنە  بايقاۋ جاريالانسا دەيمىز.  دۇنيەجۇزى قازاقتارى قاۋىمداستىعى عيماراتىنىڭ الدىنا ەڭسەلى ەسكەرتكىش ورناتساق، قانداي عانيبەت بولار ەدى.

بۇعان قوسا-قابات قالامگەر جايلى ەستەلىك، ەسسەلەر جيناعىن شىعارۋدى جالعاستىرۋ.

قازاقستان جازۋشىلار وداعىنىڭ قالداربەك نايمانباەۆ اتىنداعى حالىقارالىق ادەبي سىيلىعىن تاعايىنداۋ.

قالداربەك نايمانباەۆ اتىنداعى حالىقارالىق دەڭگەيدەگى مەدال شىعارۋ.

قازاق كۇرەسىنەن قالداربەك نايمانباەۆ اتىنداعى حالىقارالىق جارىس وتكىزۋ.

وڭتۇستىك استاناداعى استانا، الماتى، شىمكەنت، تۇركىستان، جەتىساي قالالارىنداعى كوشەلەر مەن مەكتەپتەرگە قالامگەردىڭ ەسىمىن بەرۋ.

ەڭ باستىسى -- دۇنيەجۇزى قازاقتارى قاۋىمداستىعىن ۇزاق جىلدار بەدەرىندە جەمىستى باسقارعانى ءۇشىن  قالداربەك نايمانباەۆتى قازاقستان رەسپۋبليكاسىنىڭ ەڭبەك ەرى، ال قازاقستان جازۋشىلار وداعىن ۇزاق جىلدار بەدەرىندە جەمىستى باسقارىپ، قازاق ادەبيەتىنىڭ التىن قورىنا قوسىلعان تاماشا ادەبي كوركەم تۋىندىلارى ءۇشىن  قالداربەك نايمانباەۆقا قازاقستانننىڭ حالىق جازۋشىسى اتاعىنا ۇسىنۋ – بۇگىنگى ۋاقىت تالابىنا اينالىپ وتىر دەپ ەسەپتەيمىز.

قۇرمەتتى قاسىم-جومارت كەمەلۇلى!

مەملەكەت باسشىسى جانە مايدانگەر قالامگەردىڭ ۇلى رەتىندە ءسىزدىڭ اقىن-جازۋشىلاردىڭ، ونەر ادامدارىنىڭ، جالپى زيالى قاۋىم وكىلدەرىنىڭ تاعدىر-تالايىنا، مۇڭ-مۇقتاجىنا بەي-جاي قارامايتىنىڭىزدى وتە جاقسى بىلەمىز. سول سەبەپتى دە قالداربەك نايمانباەۆتاي قارىمدى قالامگەردىڭ، قاجىرلى قايراتكەردىڭ، قايىرىمدى تۇلعانىڭ  ەسىمىن ماڭگى ەستە قالدىرۋ ماقساتىندا وسى ايتىلعان ۇسىنىس، تىلەك، پىكىردى نازارعا الىپ، ىزگىلىكتى دە يگىلىكتى ءىس-شارالاردى اتقارۋعا ىقپال ەتەدى دەپ ۇمىتتەنەمىز. وزىڭىزدەن باستاپ، ەل ۇكىمەتى، ءتيىستى مينيسترلىكتەر، اكىمدىكتەر، قوعامدىق ۇيىمدار مەن جالپى جۇرتشىلىق جاۋھار جازۋشىنىڭ ايتۋلى مەرەيتويىنا لايىقتى تارتۋ ازىرلەيتىنىنە سەنىمدىمىز.

سالەممەن،

ءابدىساتتار ءالىپ،

جۋرناليست، اقىن، اۋدارماشى، قازاقستان جۋرناليستەر جانە حالىقارالىق جازۋشىلار وداقتارىنىڭ مۇشەسى، رەسپۋبليكالىق «شىمكەنتىم، شىرايلىم!» ادەبي-كوركەم الماناعىنىڭ باس ديرەكتورى – باس رەداكتورى

شىمكەنت قالاسى.

Abai.kz