قاجىمۇقان مۇڭايتپاسوۆ اتىنداعى ورتالىق ستاديوننىڭ ورنىنا جاڭا نىسان سالىنادى. بۇل تۋرالى استانا قالاسى دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ ايتتى.

«قاجىمۇقان مۇڭايتپاسوۆ اتىنداعى ستاديوندا 2022 جىلى جۇرگىزىلگەن تەحنيكالىق ساراپتاماعا سايكەس، قازىرگى ستاديون تريبۋناسى اپاتتى جاعدايدا ەكەنى ناقتىلاندى. قۇرىلىس كونسترۋكتسيالارىنىڭ توزۋىنان نىسان ادامدار ءۇشىن قاۋىپسىز ەمەس. بۇل تۇرعىدا قازىرگى ستاديوندى بۇزىپ، جاڭا ستاديون سالۋ جوسپارلانىپ وتىر»، - دەدى س. جىلقىباەۆ استانا قالاسى كوممۋنيكاتسيالار قىزمەتىندەگى ءباسپاسوز ءماسليحاتىندا.

ايتۋىنشا، قازىر قۇرىلىس باسقارماسى جوبالاۋ-سمەتالىق قۇجاتتارىن دايىنداۋمەن اينالىسىپ جاتىر.

«جوسپارلانعان ستاديون ۋەفا-3 ستاندارتى بويىنشا سالىنادى، ونىڭ سىيىمدىلىعى 4,5 مىڭ ادامدى قامتيدى. جوبالاۋ-سمەتالىق قۇجاتتاما اياقتالۋعا جاقىندادى. جوبا اياسىندا ساراپتامانىڭ وڭ قورىتىندىسىن العاننان كەيىن، قۇرىلىس-مونتاجداۋ جۇمىستارىن جۇرگىزۋگە مەملەكەتتىك ساتىپ الۋ كونكۋرسى جاريالانادى. وندا نورماتيۆتىك قۇرىلىس مەرزىمى 18-24 ايدان كەم بولمايدى. نىساندى پايدالانۋعا بەرۋ 2025 جىلعا جوسپارلانعان. 2025 جىلى وسى نىساندا ءىرى جارىستار وتەدى دەپ ويلايمىن»، - دەدى باسقارما باسشىسى.

بۇدان بۇرىن حابارلانعانداي، 2021 جىلى قالا اكىمدىگى قاجىمۇقان مۇڭايتپاسوۆ اتىنداعى ورتالىق ستاديوننىڭ جاڭا عيماراتىن سالۋ ءۇشىن ەسكيزدىك جوبا جاسالىپ جاتقانىن جاريالادى. سول كەزدە ستاديون اپاتتىق جاعدايدا تۇرعانى ايتىلعان ەدى.

فوتو: اشىق دەرەككوزدەن

Abai.kz