گرۋزيانىڭ بۇرىنعى پرەزيدەنتى ميحايل سااكاشۆيليدىڭ "بىرىڭعاي ۇلتتىق قوزعالىس" پارتياسىنا جاقىن بىرقاتار ۇكىمەتتىك ەمەس ۇيىمدار مەن وپپوزيتسيالىق تەلەكومپانيالار "ياندەكس.تاكسي" قىزمەتىنە نارازىلىق بىلدىرگەن. ولار رەسەيدىڭ ارنايى قىزمەتى YandexGo. قوسىمشاسى ارقىلى گرۋزين ازاماتتارىنىڭ جەكە مالىمەتتەرىن الىپ وتىر دەپ سانايدى.
YandexGo قىزمەتىنىڭ گرۋزياداعى ءبولىمى "ياندەكستىڭ" ورتالىق كەڭسەسى جوققا شىعارعان جاۋاپتى العا تارتىپ، "رەسەي زاڭناماسى حالىقارالىق بيزنەسكە جانە گرۋزياداعى پايدالانۋشىلارعا قولدانىلمايدى" دەپ جاۋاپ بەرگەن. YandexGo. مالىمەتىنشە، تاكسي قىزمەتىن قولدانۋشىلاردىڭ بارلىق مالىمەتى جەكە مالىمەتتەردى قورعاۋ جونىندەگى ەۋروپا حاتتامالارىنا ساي وڭدەلەدى.
گرۋزيانىڭ جەكە مالىمەتتەردى قورعاۋ قىزمەتى تەكسەرىس قورىتىندىسىنا بايلانىستى ۇكىمەتكە YandexGo قوسىمشاسىنا تىيىم سالۋ جونىندە ۇسىنىس جاساي الادى. تەكسەرىس ەكى اپتادا اياقتالادى.
وتكەن اپتادا "مەدۋزا" سايتى "ياندەكس" كومپانياسى تاكسي قىزمەتىن پايدالاناتىن شەتەل كليەنتتەرىنىڭ مالىمەتتەرىن رەسەيدەگى سەرۆەردە ساقتايدى دەپ حابارلاعان.
"مەدۋزانىڭ" اقپاراتىنان كەيىن قازاقستاندا YandexGo قىزمەتىن ۇسىناتىن "ياندەكس.تاكسي كورپ" كومپانياسى "قازاقستاندىق قولدانۋشىلاردىڭ جەكە مالىمەتتەرىمەن قازاقستان زاڭىنا ساي جۇمىس ىستەيمىز" دەپ مالىمدەگەن.
"قازاقستانداعى جەكە مالىمەتتەردى شەتەلدىڭ قۇزىرلى ورگاندارى (سونىڭ ىشىندە رەسەي دە) حالىقارالىق پروتسەدۋرادا كورسەتىلگەن رەسمي جولدارمەن عانا سۇراي الادى" دەيدى كومپانيانىڭ قازاقستانداعى وكىلدىگى.
"مەدۋزانىڭ" اقپاراتىنان سوڭ فينليانديانىڭ مالىمەتتەردى قورعاۋ بويىنشا ومبۋدسمەنى كليەنتتەر مالىمەتىن "ياندەكسكە" بەرۋدى توقتاتاتىن قاۋلىعا قول قويعان.
"مەدۋزا" سايتىنىڭ مالىمەتىنشە، 1 قىركۇيەكتەن باستاپ رەسەي فسب-سى "ياندەكس" جينايتىن بارلىق اقپاراتقا، سونىڭ ىشىندە كليەنتتىڭ اتى-جونىنە، گەولوكاتسياسىنا، تەلەفون نومىرىنە، بانك مالىمەتتەرىنە قول جەتكىزۋگە مۇمكىندىك العان. بۇل قاۋلىعا رەسەي پرەمەر-ءمينيسترى ميحايل ميشۋستين قول قويعان.
"ياندەكس" تاكسي قازىر 20 ەلدە، سونىڭ ىشىندە قازاقستان، يزرايل، نورۆەگيا، فينليانديا، بەلارۋس، ارمەنيا جانە گرۋزيادا جۇمىس ىستەيدى.
Abai.kz
