ەستەرىڭىزگە سالا كەتەيىك، 2022 جىلدىڭ 13 قىركۇيەگىندە الماتىدا وزبەكستان ءىىم قىزمەتكەرلەرى قاراقالپاق بەلسەندىلەرى قوشقارباي تورەمۇراتوۆ پەن جانگەلدى جاقسىمبەتوۆتى ەلدىڭ كونستيتۋتسيالىق قۇرىلىسىنا قول سۇعۋشىلىق جاسادى دەگەن ايىپپەن ۇستادى.

كەيىن وزبەكستان بيلىگىنىڭ سۇراۋى بويىنشا قازاقستان اۋماعىندا تاعى بىرنەشە قاراقالپاق بەلسەندىلەرى ۇستالدى.

قازاقستاننىڭ قاراقالپاق دياسپوراسى بۇل قاماۋعا الۋدى وزبەكستان بيلىگى قاراقالپاقستان رەسپۋبليكاسىنداعى نارازىلىقتاردى اياۋسىز باسقاننان كەيىن 2022 جىلعى شىلدەدەن باستاپ قولدانىلاتىن قاراقالپاق ازاماتتىق بەلسەندىلەرىنە قارسى قۋعىن-سۇرگىننىڭ جالعاسى دەپ سانايدى.

2022 جىلدىڭ 1 شىلدەسىندە نۇكۇس، مويناق جانە باسقا قالالاردا قاراقالپاقستاننىڭ ەگەمەندىگىن جوياتىن كونستيتۋتسيالىق تۇزەتۋلەرگە قارسى نارازىلىقتار باستالدى. بىراق بيلىك دەمونستراتسيالاردى بيلىكتى باسىپ الۋ ارەكەتى رەتىندە قاراستىردى جانە اكتسيالارعا قاتىسۋشىلارعا كوزدەن جاس اعىزاتىن گاز، رەزەڭكە وقتار مەن ءتۇتىن بومبالارىن قولداندى. رەسمي مالىمەتتەرگە سايكەس، نارازىلىق بىلدىرۋشىلەردى تاراتۋ ناتيجەسىندە 21 ادام قازا تاپتى. بارلىعى 243 ادام جاراقات الدى.

وزبەكستان پرەزيدەنتى شاۆكات ميرزيەەۆتىڭ نۇكۇسكە ساپارىنان كەيىن وزبەكستان پارلامەنتى قاراقالپاقستاننىڭ ەگەمەندىگى تۋرالى باپتى كونستيتۋتسياعا ەنگىزىلگەن تۇزەتۋلەر جوباسىنان الىپ تاستادى.

2023 جىلدىڭ 31 قاڭتارىندا بۇحارا وبلىسىنىڭ سوتى تارتىپسىزدىكتەرگە قاتىسقانى ءۇشىن ايىپتالعان 22 قاراقالپاقستاندىققا ۇكىم شىعاردى. بەلسەندى داۋلەتمۇرات ءتاجىمۇراتوۆ 16 جىلعا باس بوستاندىعىنان ايىرىلدى. ءىستىڭ باسقا قاتىسۋشىلارىنىڭ كوپشىلىگىنە ءۇش جىلدان سەگىز جىلعا دەيىن سوتتالدى. تاعى ءۇش ادامنىڭ باس بوستاندىعى شەكتەلدى، سوتتالۋشىلار تىزىمىندەگى جالعىز ايەل — جۋرناليست لولاگۇل قاللىحانوۆا شارتتى مەرزىمگە سوتتالدى.

بىرنەشە كۇننەن كەيىن جاپپاي تارتىپسىزدىكتەردى ۇيىمداستىرعانى ءۇشىن التى جىلعا سوتتالعان پولات شامشەتوۆتىڭ بۇحارا تەرگەۋ يزولياتورىندا قايتىس بولعانى بەلگىلى بولدى. بيلىك ءولىم ينفاركت سالدارىنان بولدى دەپ مالىمدەدى.

Abai.kz