قازاقستاننىڭ سۋ سالاسىنداعى جاعداي كۇردەلى. ءبىزدىڭ ەلگە كەلىپ جاتقان سۋدىڭ مولشەرى از. بۇل تۋرالى ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا ايتتى.

مينيستر «قىرعىزستان زاڭدى بۇزباي، بەلگىلەنگەن ەرەجەگە ساي سۋ جىبەرىپ جاتىر ما؟» دەگەن سۇراققا «قىرعىز تاراپىمەن وتە تىعىز جۇمىس ىستەپ جاتىرمىز. بىشكەككە باردىم. ۆيتسە-ءمينيسترىمىز قورداي، بايزاق، تالاپ اۋدانىنا دا باردى. ءبىر رەت ەمەس، بىرنەشە مارتە بارىپ ءجۇر. بيىلدىڭ باسىندا كەستەگە قول قويدىق. كەستە شەڭبەرىندە مۇمكىندىگىنشە جۇمىس ىستەپ جاتىرمىز. قازىرگى تاڭدا جاعداي كۇردەلى»، - دەپ جاۋاپ بەرگەن.

مينيستر قىرعىزگيدرومەتتىڭ ناۋرىز-ءساۋىر ايىندا بەرگەن اقپاراتى راستالماعانىن مالىمدەدى.

«نەگىزىنەن ولاردىڭ بەرگەن بولجامى – نورماعا سايكەس نەمەسە نورمادان جوعارى بولاتىن. وكىنىشكە قاراي نورمادان ەداۋىر تومەن بولدى. سوعان بايلانىستى قىرعىز تاراپىمەن بىرنەشە اي بويى كەستە جاساپ، سۋدىڭ كەلۋىن، شىعىندالۋىن پىسىقتاعان بولاتىنبىز. وسى ايدان باستاپ كيروۆ سۋ قويماسىندا قازىرگى تاڭدا سۋ وتە تاپشى. سۋدىڭ كەلۋى شىلدەنىڭ ءوزى 1,5 تەكشە مەتر سەكۋندىنا كەلىپ جاتتى. 2022 جىلدىڭ شىلدەسىندە سەكۋندىنا 65 تەكشە مەتر كەلسە، بيىل 1,5 تەكشە مەتر كەلىپ جاتتى. سوعان بايلانىستى كۇردەلى جاعداي قالىپتاستى»، – دەيدى ول.

سونىمەن قاتار، تاسوتكەل كانالىنىڭ وزىندە 200-دەن استام زاڭسىز ناسوس انىقتالىپ، باس پروكۋراتۋراعا حابار بەرىلگەن.

فوتو:اشىق دەرەككوزدەن

Abai.kz