ەستەرىڭىزگە سالا كەتەيىك، جۋىردا جەلىدە شىمكەنتتەگى گۇل دۇكەنىندە تۇسىرىلگەن ۆيدەو تارادى. كادرلاردان ەر ادامنىڭ دۇكەن قىزمەتكەرىن ۇرىپ-سوعىپ، گۇل ۇرلاعانىن كورۋگە بولادى. كەيىنىرەك بەينەجازباداعى "باتىر" بۇرىنعى ۋچاسكەلىك ينسپەكتور ەكەنى انىقتالدى. ال ونىڭ قاسىندا ەڭبەكشى اۋدانى بويىنشا مەملەكەتتىك كىرىستەر باسقارماسى باسشىسىنىڭ ورىنباسارى دانيار ەلقوندى بولعان.

وسى جاعدايعا قاتىستى شىمكەنت قالاسى بويىنشا مەملەكەتتىك كىرىستەر دەپارتامەنتى باسشىسىنىڭ بۇيرىعىمەن د.ەلقوندى «قاتاڭ سوگىس» تۇرىندەگى تارتىپتىك جازاعا تارتىلعان.

بۇگىن بەلگىلى بولعانداي، دانيار ەلقوندى ءوزى بەرگەن ءوتىنىش نەگىزىندە اتقاراتىن قىزمەتىنەن بوساتىلدى.

«قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ باسشىلىعى تاراپىنان، قاجەت بولعان جاعدايدا قىزمەتتىك تەرگەپ-تەكسەرۋ جۇرگىزۋ ارقىلى، قولدانىلعان تارتىپتىك جازانىڭ جاسالعان تەرىس قىلىقتىڭ اۋىرلىعىنا سايكەستىگى تۇرعىسىنان زەردەلەۋ قاجەتتىگى تۋرالى تاپسىرما بەرىلگەن. الايدا، قازىرگى ۋاقىتتا د.ەلقوندى ءوزىنىڭ ءوتىنىشى نەگىزىندە اتقاراتىن لاۋازىمىنان بوساتىلدى. قولدانىستاعى زاڭناما تالاپتارىنا سايكەس، وعان مەملەكەتتىك قىزمەتتى ءوز ەركىمەن توقتاتۋعا كەدەرگىلەر بولمادى»، - دەدى قر مەملەكەتتىك قىزمەت ىستەرى اگەنتتىگى شىمكەنت قالاسى بويىنشا دەپارتامەنتىنىڭ باسشىسى شاكىر سۇلتانحان.