ءماجىلىس دەپۋتاتتارىنىڭ وڭىرلەردە حالىقپەن كەزدەسۋلەرى جالعاسۋدا.

بۇگىن ماجىلىستەگى «AMANAT» پارتياسى فراكتسياسىنىڭ مۇشەلەرى پاۆەل كازانتسەۆ پەن مارات باشيموۆ استانا قالاسىنداعى «بايقوڭىر» اۋدانىنىڭ قوعامدىق جەرلەرى مەن اۋلالارىنىڭ جاي-كۇيىمەن تانىستى. قالاداعى ساياباقتار، الاڭدار، باسقا دا نىساندار پارتيانىڭ سايلاۋالدى باعدارلاماسىن ىسكە اسىرۋ جونىندەگى جول كارتاسىنا كىرەدى.

دەپۋتاتتار الدىمەن استانانىڭ 25 جىلدىعى قارساڭىندا اشىلعان «جۋرناليستەر اللەياسىنا» باردى. جوبا اۆتورلارىنىڭ پايىمداۋىنشا، الاڭ نەگىزىنەن  باق قىزمەتكەرلەرى باس قوساتىن، ورتاق كاسىبي جەتىستىكتەردى اتاپ وتەتىن جانە مادەني-بۇقارالىق ءىس-شارالار وتكىزەتىن ورىنعا اينالۋعا ءتيىس.

–  بۇل جەردە بۇرىن ەسكى جىلۋ بەرۋ ماگيسترالى بار ەدى. قازىر قالالىقتار ءۇشىن تاماشا دەمالىس ورنىنا اينالدى. سونىمەن قاتار جاقىن ماڭدا بىرنەشە تۇرعىن ءۇي كەشەنى سالىندى. وندا جاستار كوپ تۇرادى. قۇرىلىس جۇمىسىنا قازاقستاندىق ونىمدەردىڭ پايدالانىلعانىن دا اتاپ وتكەن ءجون، – دەدى پاۆەل كازانتسەۆ.

دەپۋتاتتار «بايقوڭىر» اۋدانىنىڭ ەسكى ورتالىعىندا ورنالاسقان ەگەمەن قازاقستان مەن كەنەسارى كوشەلەرىنىڭ قيىلىسىنداعى  جاڭارتىلعان الاڭمەن دە تانىستى. اباتتاندىرۋ بارىسىندا مۇندا شاعىن ساۋلەت فورمالارى، جارىق باعانالارى، ورىندىقتار قويىلىپ، دەمالىس ايماقتارى قۇرىلدى. كوگالداندىرۋ بويىنشا قوسىمشا جۇمىس اتقارىلىپ، ارنايى سۋارۋ جۇيەسى ورناتىلدى.

سونىمەن بىرگە دەپۋتاتتار كەنەسارى كوشەسى 40 مەكەنجايىنداعى   «7 كونتينەنت» تۇرعىن ءۇي كەشەنىنىڭ اۋلاسىنا باردى. مۇندا تۇرعىندار ءۇشىن  ەكى سپورت الاڭى، اتكەنشەكتەرى بار دەمالىس ايماعى، بالالار ويىن الاڭدارى، سونداي-اق ارنايى جۇگىرۋ جولى ورناتىلعان.

– دەمالۋعا جانە ادامدارمەن ەركىن قارىم-قاتىناس جاساۋعا ارنالعان ورىندار، جاياۋ جۇرگىنشىلەر جولدارى، الاڭدار، كوشەلەر، ساياباقتار، جاسىل جەلەكتەر قالا تۇرعىندارىنىڭ ءومىر ءسۇرۋ ساپاسىن ارتتىرادى. مۇنداي قوعامدىق جەرلەر  مەن اۋلالاردىڭ دامۋى قازىر وتە ماڭىزدى جانە ونى حالىق تا قولدايدى. دامۋ ستراتەگياسى اياسىندا شاھار الدىندا ءۇش نەگىزگى ماقسات تۇر – جايلى قالاعا اينالۋ، ونىڭ تۇراقتى دامۋىن قامتاماسىز ەتۋ جانە سالاۋاتتى ءومىر سالتى ءۇشىن جاعداي جاساۋ. وسى باعىتتا اتقارىلار جۇمىس ءالى كوپ. بۇل ماسەلەنى پارتيا باقىلاۋعا الدى، – دەدى دەپۋتات مارات باشيموۆ.

بۇگىندە «بايقوڭىر» اۋدانىندا تاعى 23 قوعامدىق ورىن اشۋ جوسپارلانۋدا.

ايتا كەتەيىك، ءماجىلىس دەپۋتاتتارىنىڭ حالىقپەن كەزدەسۋى 1 قىركۇيەككە دەيىن جالعاسادى. وندا حالىق قالاۋلىلارى وڭىرلەرگە بارىپ،   پروبلەمالىق نىساندارمەن تانىسىپ، وندىرىستەردى ارالايدى.

Abai.kz