سولتۇستىك قازاقستان وبلىسى سەرگەەۆ سۋ تورابىنىڭ تومەنگى بولىگىندە ورنالاسقان ەسىل وزەنىندە بالىق قىرىلدى.

سقو ەكولوگيا دەپارتامەنتىنىڭ مالىمەتىنشە، وقيعا ورنىنا ەكولوگتار، ەسىل باسسەيندىك بالىق شارۋاشىلىعى ينسپەكتسياسى، تابيعي رەسۋرستار جانە تابيعات پايدالانۋدى رەتتەۋ باسقارماسى، شال اقىن اۋدانىنىڭ ۆەتەريناريا قىزمەتى، «بالىق شارۋاشىلىعىنىڭ عىلىمي-وندىرىستىك ورتالىعى» جشس قىزمەتكەرلەرىنەن تۇراتىن جۇمىس توبى باردى.

ەسىل وزەنىنىڭ جاعالاۋى تەكسەرىلىپ، كوميسسيا بالىقتىڭ ءنالىم مەن كوكسەركە ءتۇرىنىڭ شامامەن 30-40 كەلىسى قىرىلعانىن انىقتادى.

ەكولوگيا دەپارتامەنتىنىڭ قىزمەتكەرلەرى سۋ سىنامالارىن، ال ۆەتەريناريا قىزمەتىنىڭ ماماندارى زەرتحانالىق زەرتتەۋلەر جۇرگىزۋ ءۇشىن بالىقتاردىڭ ولەكسەسىن الدى.

جەرگىلىكتى اتقارۋشى ورگاندار سانيتارلىق نورمالاردى ساقتاي وتىرىپ، قىرىلعان بالىقتى جيناپ الىپ، جويدى.

زەرتتەۋ ناتيجەلەرىنەن كەيىن قوسىمشا اقپارات بەرىلەتىنى حابارلاندى.

تامىز ايىنىڭ باسىندا سقو جامبىل اۋدانىنداعى پيتنوە كولىندە بالىق قىرىلعانى ايتىلعان. مامانداردىڭ ەسەبى بويىنشا تسەنتنەرگە جۋىق موڭكە مەن الابۇعا بالىعى ولگەن. سۋ جاندىكتەرىنىڭ نەدەن قىرىلعانىن انىقتاۋ ءۇشىن كول سۋىنىڭ سىناماسى، سونداي-اق ولگەن بالىقتىڭ ۇشاسى لابوراتوريالىق ساراپتامالار جۇرگىزۋ ءۇشىن الىندى.

الدىن الا بولجام بويىنشا، كۇننىڭ ىستىعىنان كول سۋى تارتىلىپ كەتكەن. سۋدىڭ قاتتى جىلۋىنان سۋ وسىمدىكتەرى ءشىرىپ، ۋلى گاز ءبولۋى مۇمكىن. ازىرگە زەرتتەۋ قورىتىندىسى كەلگەن جوق.

فوتو: اشىق دەرەككوزدەن

Abai.kz