2022 جىلدىڭ باسىنان بەرى يگەرىلمەي جاتقان نەمەسە زاڭسىز بەرىلگەن 7,8 ملن گا اۋىلشارۋاشىلىعى جەرلەرى مەملەكەتكە قايتارىلدى. 

قر ۇكىمەتىنىڭ مالىمەتىنە سايكەس، مەملەكەت باسشىسى ق. توقاەۆتىڭ جولداۋىن ىسكە اسىرۋ اياسىندا، ماسەلەن، قاراعاندى وبلىسىندا 1,5 ملن گا اۋىلشارۋاشىلىعى جەرلەرى مەملەكەت مەنشىگىنە قايتارىلدى.

سونداي-اق:

• قوستاناي وبلىسىندا – 738 مىڭ گا;
• اقتوبە وبلىسىندا – 745 مىڭ گا;
• تۇركىستان وبلىسىندا – 631 مىڭ گا;
• پاۆلودار وبلىسىندا 532 مىڭ گا قايتارىلدى.

رەسپۋبليكا بويىنشا جەردى پايدالانۋشىلارعا قاتىستى 5,5 ملن گا الاڭدى قامتيتىن 2 410 جوسپاردان تىس تەكسەرۋ تىركەلدى.

«تەكسەرۋ ناتيجەلەرى بويىنشا 3,1 ملن گا الاڭدا جەر زاڭناماسىن بۇزۋ دەرەكتەرىن جويۋ تۋرالى 1 597 ۇيعارىم شىعارىلدى، 240,9 مىڭ گا الاڭ بويىنشا 246 ماتەريال سوت قاراۋىندا. ءتيىستى شارالار قابىلدانعاننان كەيىن جەردى پايدالانۋشىلار 2,7 ملن گا القاپتاعى ءوز جەرلەرىن يگەرۋگە كىرىستى»، - دەلىنگەن ۇكىمەت حابارلاماسىندا.

سونىمەن قاتار قابىلدانعان شەشىمدەردىڭ زاڭدىلىعىنا قاتىستى جەرگىلىكتى اتقارۋشى ورگانداردىڭ قىزمەتىنە جۇرگىزىلگەن جوسپاردان تىس تەكسەرۋلەردىڭ قورىتىندىسى بويىنشا اۋماعى 526,3 مىڭ گا اۋىلشارۋاشىلىعى جەرلەرىن بەرۋ تۋرالى جەرگىلىكتى اتقارۋ ورگانداردىڭ 515 زاڭسىز شەشىمى انىقتالىپ، ونىڭ ىشىندە 135 شەشىمنىڭ كۇشى جويىلدى، قالعان 380 شەشىمنىڭ كۇشىن جويۋ بويىنشا جۇمىستار جۇرگىزىلىپ جاتىر.

فوتو: اشىق دەرەككوزدەن

Abai.kz