بيىل ەلىمىزدەگى بىرەشە ايماقتا 1 سىنىپقا باراتىن بالالاردىڭ باسىم بولىگى ورىس مەكتەپتەرىن تاڭداعان ەكەن. بۋراحان داقانوۆ دوستىڭ شاعىن پوستىندا وسىنى اڭعاردىم.

قاتەلىك قايدان كەتتى؟ بالالار الۋمەتتىك جەلىدەن شىقپايدى، اتا-انالاردىڭ ولارعا قاراۋعا شاماسى جوق. ءتىپتى اتا-اناسى تازا قازاقشا، كەرەك دەسەڭىز، ورىسشا سويلەسپەيتىن وتباسىلاردا بالالار انا ءتىلىن بىلمەيتىن دەڭگەيدە. ادام ايتسا، نانعىسىز جاعداي. سونداي بىرنەشە اتا-انانى كورىپ تاڭ قالدىم. سمارتفون اتا-اناسىن الماستىرعان بالادا قازاق ءتىلى دە جوق.

ال وتاندىق انيماتسيالىق فيلم سالاسى اقساپ تۇر. ونى بيلىك ورگاندارى قولدان اۋىزدىقتاپ، تۇقىرتىپ وتىرعانىن مويىنداۋ كەرەك. بۇل ەڭ ۇلكەن مەملەكەتتىك ستراتەگيالىق باعىت ەكەنىن شەنەۋنىكتەر تۇسىنبەيدى، تۇسىنگىسى دە كەلمەيدى. ەلىمىزدە 30-دان اسا انيماتسيالىق كومپانيا بار. بىراق ولاردىڭ نەكەن-ساياعى عانا جۇمىس ىستەپ تۇر. نەگە؟ سەبەبى، انماتسيالىق ءونىم وندىرىسىنە بەرىلەتىن قاراجات ماردىمسىز. ال جۇمىستىڭ شىعىنى شاش-ەتەكتەن. رەجيسسەر، كومپوزيتور، ستسەناريست، انماتورلار جانە تاعى باسقا ماماندار قاراجاتى دۇرىس بولسا عانا، دۇرىستاپ جۇمىس ىستەيدى. پاتريوتتىق سوزدەر وتپەيدى. ويتكەنى، ەڭبەك وڭاي ەمەس.

بەلگىلى انيماتسيالىق رەجيسسەر اداي ابەلدينوۆ بىزگە بەرگەن سۇحباتىندا جەمقورلىقتىڭ بۇل سالانى دا جاۋلاپ العانىن اعىنان اقتارىلىپ اڭگىمەلەپ بەرگەن ەدى.

ءدال وسى سالادا باسشىلىقتا اكە، كوكەلەر سىرەسىپ وتىر. ولار قازاقتىڭ بولاشاعىنا، كىشكەنتاي بۇلدىرشىندەرىنە جانى اشىسا، سابيلەردىڭ ءتىلى ورىسشا شىعا ما؟ بالالاردىڭ تۇك كىناسى جوق.

ەندەشە، كىشكەنتاي پەرىشتەلەردىڭ وبالى بەزبۇيرەك شەنەۋنىكتەر مەن نەمقۇرايلى اتا-انالارعا.

قازىر قازاق انيماتورلارى جۇمىسسىز بوسىپ ءجۇر. تۇراقتى جۇمىس بولماعان سوڭ دامۋى دا قيىن. ال شەنەۋنىكتەر شىن جاناشىر بولسا، ولاردى جوبالار بەرىپ، جۇمىسپەن قامتىماق تۇگىل ءجيى-ءجيى شەتەلگە شىعارىپ وقىتىپ وتىرار ەدى.

مينيسترلىكتەر ملرد، ءتىپتى ترلن قاراجاتتى جۇتىپ وتىر. ءبىر حالىقارالىق فورۋمعا 187 ملن تەڭگە بولگەنىن بايقاپ قالىپ شوك بولعان ەدىم. سولاي جالاۋلاتقان ءىس-شارالاردىڭ ناقتى پايداسى قانداي؟ ال ناقتى جۇمىسپەن اينالىسىپ جاتقان وتاندىق كومپانيالارعا نەگە دۇرىستاپ قارجى بولمەيمىز؟ اينالايىن-اۋ، انيماتسيا سالاسى قازاق ەلىنىڭ بولاشاعى عوي. ءوز بولاشاعىمىزدان قىزعانعان قاراجات وپا بەرە مە؟

ارمان اۋباكىر

Abai.kz