بۇل تۋرالى قىرعىزستاننىڭ ەكونوميكا مينيسترلىگى حابارلادى. وندا ءمينيستردىڭ ورىنباسارى نازاربەك مالاەۆ مالىمەت بەرىپ، شەكاراداعى "اق تىلەك، "كەڭ-بۋلۋڭ" جانە "چالدىبار" وتكىزۋ بەكەتتەرىندەگى كەپتەلىس 20 تامىزدان باستالعانىن جەتكىزدى.

"قازاق تاراپ ەۋرازيا ەكونوميكالىق وداعىنىڭ نەگىزگى پرينتسيپتەرىنىڭ ءبىرىن بۇزىپ، ەركىن تاۋار تاسىمالىن شەكتەپ جاتىر. بۇل ادەتتەگى جاعدايعا اينالىپ، قازاق تاراپ قىرعىزستاننان باراتىن كولىكتەردى وتكىزۋدى باياۋلاتۋ ءۇشىن ۇنەمى ءتۇرلى سەبەپتەر تاۋىپ كەلەدى", - دەلىنگەن مالىمەتتە.

مينيسترلىك جۇكتەردىڭ اراسىندا تەز بۇزىلاتىن ازىق-تۇلىكتەر بار ەكەنىن ايتىپ، بۇل كاسىپكەرلەردى شىعىنعا باتىرىپ جاتىر دەدى.

22 تامىزدا قىرعىزستان شەكارا قىزمەتى "اق-تىلەك" وتكىزۋ بەكەتىندە 370 كولىك وتە الماي تۇرعانىن، تاڭعى توعىزدان كەشكى التىعا دەيىن قازاقستان تارابى تەك ءۇش ماشينانى وتكىزگەنىن حابارلادى. كولىك جۇرگىزۋشىلەرى 22 تامىز كۇندىز بەكەتكە قاراي 500-دەن اسا ماشينا كەزەكتە تۇرعانىن ايتقان. "اق-تىلەك" شەكارا بەكەتىندە كولىك كەزەگى 20 تامىزدا پايدا بولعان.

23 تامىزدا قىرعىزستاننىڭ مەملەكەتتىك ۇلتتىق قاۋىپسىزدىك كوميتەتىنىڭ شەكارا قىزمەتى قازاق-قىرعىز شەكاراسىنداعى "كەن-بۋلۋن" تەكسەرۋ-وتكىزۋ پۋنكتىندە جۇك كولىكتەرىنىڭ كەزەگى پايدا بولانىن حابارلادى.

Abai.kz