"بۇرقان-بۇلاق"سارقىراماسى تۋرالى ەستۋىڭىز بار ما؟

جوڭعار الاتاۋىنىڭ ادام بالاسىنىڭ قولى مۇلدە تيمەگەن، سول قالپىندا ساقتالعان جەرلەرى كوپ. سونىڭ ءبىرى جەتىسۋ جەرىندە ورنالاسقان ورتا ازياداعى ەڭ ۇلكەن سارقىراما— بۇرقان-بۇلاق سارقىراماسى.

«2024 جىلى قورا شاتقالىنداعى «بۇرقان-بۇلاق» سارقىراماسىنا دەيىن جول سالىنادى»، بۇل تۋرالى «Vizit Zhetysu» تۋريستىك ورتالىعىنىڭ باسشىسى نۋريەۆ جاندوس مالىكۇلى باق وكىلدەرى ءۇشىن ارنايى ۇيىمداستىرىلعان پرەسس-تۋردا ايتتى.

ونىڭ ايتۋىنشا، 2023 جىلعى 1 اقپاندا جەتىسۋ وبلىسىڭ اكىمى "بۇرقان-بۇلاق" سارقىراماسىنا دەيىنگى اۆتوموبيل جولىن قايتا جاڭارتۋ جونىندەگى جول كارتاسىن بەكىتكەن.

«حالىق ءوز يگىلىگىن كورۋى كەرەك. جەتىسۋ ءوڭىرى جاڭا تۋريستىك نىسانداردى دامىتۋدى قولعا الىپ كەلەدى. بۇل تاراپتا ءبىزدىڭ ورتالىق اقپاراتتىق جۇمىستاردى قولعا الىپ، ىشكى ءتۋريزمدى دامىتۋعا ءوز ۇلەستەرىن قوسۋدا. «Vizit Zhetysu» تۋريستىك ورتالىعىنىڭ اشىلعانىنا 10 ايدان استى. از ۋاقىتتىڭ ىشىندە كوپتەگەن جۇمىستار اتقارىلدى. "بۇرقان-بۇلاق" سارقىراماسىنا باراتىن ەكى جول بار. ءبىرى قىسقا، ءبىرى ۇزىن قاپال ارقىلى وتەتىن اينالما جول. ءبىز تەكەلى ارقىلى باراتىن قىسقا جولدى جوسپارلاپ وتىرمىز. ول "بۇرقان-بۇلاق" سارقىراماسىنا دەيىن 52 شاقىرىمدى قۇرايدى. قازىرگى ۋاقىتتا جولدىڭ تەحنيكالىق پاسپورتى ازىرلەندى، توپوگرافيالىق ءتۇسىرىلىم جۇرگىزىلىپ، ينجەنەرلىك-گەودەزيالىق ەسەپ دايىندالدى. سۋدىڭ ماكسيمالدى شىعىنىن انىقتاۋ ءۇشىن ينجەنەرلىك-گيدرولوگيالىق ەسەپتەۋلەر جۇرگىزىلدى. بۇرقان-بۇلاققا جول سالۋعا وبلىستىق بيۋدجەتتەن 94,8 ملن.تەڭگە ءبولىندى»، دەدى «Vizit Zhetysu» تۋريستىك ورتالىعىنىڭ باسشىسى جاندوس مالىكۇلى.

بۇرقان بۇلاق - ورتالىق ازياداعى ەڭ بيىك، اينالاسى اسەم سارقىراما. ول جەتىسۋ الاتاۋىنداعى كوركەم دە قۋاتتى قورا وزەنىنىڭ اڭعارىندا ورنالاسقان. ءتورت قيادان قۇلاي اققان سارقىرامانىڭ جالپى بيىكتىگى - 168 مەتر. ال كوز جەتەتىن تومەنگى ءۇش قياسى - 114 مەتر. سارقىراما تەڭىز دەڭگەيىنەن 2000 مەتر بيىكتىكتە ورنالاسقان. سارقىراما ورىن تاپقان بۇرقان بۇلاق وزەنى قاراتاۋدان باستاۋ الادى. وزەننىڭ قورا شاتقالىنداعى ساعاسى بيىك جارتاستى بەلبەۋمەن اعىپ وتەدى. باۋرايىندا جايقالعان شىرشالار مەن ازيالىق ارشانىڭ حوش ءيىسى مۇنداعى ىلعالدى اۋاعا پايدالى قاسيەتتەر سىيلاپ، سارقىراما ماڭىن تابيعي شيپاجايعا اينالدىرادى. بۇگىندە وسى كەرەمەتتى اڭعارعان ساياحاتشىلار سانى كوبەيىپ، بۇرقان-بۇلاقتىڭ تانىمالدىلىعى جىل سايىن ارتىپ كەلەدى.

«جولسىز جولدىڭ اۋىر ءارى كۇردەلىلىگىنە قاراماسان ايىنا 300-500-دەن اسا ساياحاتشىلار كەلەدى. كوبىنە گەرمانيا، ۇلىبريتانيا، رەسەي، تمد ەلدەرىنەن تۋريستەر كوپ كەلەدى. بيىل ينديادان ءبىرىنشى رەت قوناقتار كەلدى. ءبىزدىڭ «بۇرقان-بۇلاق» دەمالىس ورنى 50 ادامعا ارنالعان. 4 ءۇي - 8 ورىندى جانە 12 ادامعا ارنالعان VIP ۇلكەن ءۇيىمىز بار. باعاسىنا كەلسەك، ءبىر ادامعا ەكونوم نومىرلەر – 17 مىڭنان، VIP – 22 مىڭ تەڭگەدەن. وعان 3 ۋاقىت تاماعى كىرەدى. مامىر ايىنان قىركۇيەك ايىنا دەيىن كۇن سۋىتقانشا جۇمىس ىستەيمىز. ساياحاتشىلاردى تالدىقورعاننان ارنايى جول تالعامايتىن ارنايى كولىكپەن الىپ كەتەمىز جانە اپارىپ تاستايمىز. ترانسفەر قۇنى ءبىر ادامعا – 12 مىڭ تەڭگەدەن. كولىككە 15 ادام سىيادى. بۇل جەردىڭ تاڭعاجايىپ سۇلۋ دا اسەم تابيعاتىنا سۇيسىنبەگەن جان جوق. بارلىعى ريزا بوپ، تاعى كەلەمىز دەپ كەتەدى. جول سالىنسا، ساياحاتشىلار ءۇشىن جاعدايلار جاسالسا، جەتىسۋدىڭ كوركەم تابيعاتىنا جول اشىلار ەدى»، دەيدى دەمالىس ورىننىڭ مەنەدجەرى ەكاتەرينا نيكولاەۆا.

ساپار بارىسىندا جۋرناليستەر كيەلى جەر - اۋليە تاستا بولىپ، جەتىسۋ وبلىسىنىڭ تۋريستىك باعىتتارىمەن تانىستى.

Abai.kz