قاسىمبەك پوليتسياعا ۆانداليزم ارەكەتتەرىن جاساعان جانە قوعامدىق ءتارتىپتى بۇزعان ادامداردى انىقتاۋ جۇمىسى تاپسىرىلعانىن ايتا كەلە، "قۇقىق بۇزۋشىلار جاۋاپقا تارتىلادى" دەپ مالىمدەدى Facebook پاراقشاسىندا.
"بۇل – مادەنيەتتىڭ تومەندىلىگىنىڭ، ادام ەڭبەگىن قۇرمەتتەمەۋدىڭ بەلگىسى" دەيدى اكىم.
26 تامىزدا استانادا حالىق تاجىك شارۋالارىنىڭ كورمەسىندە قويىلعان جەمىستەردى تالاپ اكەتكەن ەدى. ينتەرنەتتە تاراعان ۆيدەونىڭ بىرىندە ادامدار جەمىستەردى تاپتاپ قاربىزداردى الىپ جاتقانى، تاعى ءبىر ۆيدەودا جۇرت پيراميداعا ىلىنگەن جۇزىمدەردى شەشىپ جاتقانى بايقالعان. تاعى ءبىر ۆيدەودا ادامدار كورمەدە ىلىنگەن تارەلكەلەردى شەشىپ جاتقانى كورىنگەن. جەلى قولدانۋشىلارى حالىقتىڭ جەمىسكە تالاسىن، ىدىستاردى اكەتكەنىن سىنعا العان.
بۇگىن، 28 تامىزدا استانا قالاسى كاسىپكەرلىكتى دامىتۋ جانە ينۆەستيتسيا باسقارماسى باستىعىنىڭ ورىنباسارى ماقسات جاناباەۆ استاناداعى كورمەدە "تاجىك فەرمەرلەرىنىڭ وزدەرى پيراميداعا شىعىپ، جەمىستەردى حالىققا وزدەرى الىپ بەردى. وسى جەمىستەردى الىپ كەلگەن تاجىك دوستارىمىزدىڭ ءوزى جەمىستى حالىق السا دەدى، سەبەبى كۇننىڭ استىندا جاتىپ ءشىرىپ كەتۋى مۇمكىن" دەگەن ەدى.
جاناباەۆ حالىقتىڭ قاربىزداردى اكەتۋى "قازىر بىزگە تاجىكستاننان قاربىز كەلمەيدى، سەبەبى ول جاقتان قاربىز اكەلۋ قىمبات. ال ءبىزدىڭ حالىق تاجىكستاننىڭ ءتاتتى قاربىزى مەن قاۋىنىنان ءدام تاتقىسى كەلدى" دەپ تۇسىندىرگەندەي بولعان.
ارتىنشا جەڭىس قاسىمبەك Facebook پاراقشاسىندا قۇقىق بۇزۋ فاكتىسى تۋرالى جازباسىن جاريالادى.
Abai.kz
