«قوعامدىق كەڭەس مۇشەلەرى باس جوسپار دايىنداۋشىلاردىڭ ۇستانىمىن قولدايدى. ولار استانا حالقى سانىن ارتتىرۋعا ۇمتىلۋدىڭ قاجەتى جوق، قازاقستاننىڭ بارلىق ايماعى تەڭ دارەجەدە دامۋى كەرەك دەپ ەسەپتەيدى».

2030 جىلعا قاراي استانا حالقى 2 ميلليونعا، ال 2035 جىلعا قاراي 2,3 ميلليون ادامعا جەتەدى دەپ بولجانعان. قازىر استانادا 1,3 ميلليوننان استام ادام تۇرادى.

قوعامدىق كەڭەس قالانىڭ 2035 جىلعا دەيىنگى باس جوسپارى جوباسىن ۇسىنىستار مەن ەسكەرتۋلەردى ەسكە وتىرىپ قابىلداۋعا كەڭەس بەردى.

وتكەن اپتادا ەڭبەك جانە حالىقتى الەۋمەتتىك قورعاۋ مينيسترلىگى استاناعا كوشتى شەكتەۋدى كوزدەيتىن ەرەجەلەر دايىنداپ جاتقانى ءمالىم بولعان.

قازاقستان پرەزيدەنتى قاسىم-جومارت توقاەۆ بيىل شىلدەدە استانانى دامىتۋعا قاتىستى جينالىستا ادام سانىنىڭ ارتۋى «كولىك سالاسىنداعى جاعدايدى ۋشىقتىرادى» دەپ مالىمدەگەن.

رەسمي مالىمەت بويىنشا، قازاقستان حالقىنىڭ جەتى پايىزدان استامى قازىر استانادا تۇرادى.

Abai.kz