پرەمەر-ءمينيستردىڭ ورىنباسارى – قارجى ءمينيسترى ەرۇلان جاماۋباەۆ ۇكىمەت كۋلۋارىندا الەۋمەتتىك مەديتسينالىق ساقتاندىرۋ قورىنىڭ قاراجاتىنا رەۆيزيا جۇرگىزۋ جوسپارلانىپ وتىرعانىن ايتتى.

«ءبىز قازىر الەۋمەتتىك مەديتسينالىق ساقتاندىرۋ قورىمەن جانە دەنساۋلىق ساقتاۋ، ەڭبەك جانە حالىقتى الەۋمەتتىك قورعاۋ مينيسترلىگىمەن بىرگە جۇمىس جۇرگىزىپ جاتىرمىز. كوپ جاعدايلار كەزدەسەدى ەكەن. مىسالى، كەيدە ەم الماعان ادامدى الدى دەپ كورسەتىپ جىبەرەدى. سودان كوپ جەردە قاراجات جەتپەي جاتادى. سوسىن كونسۋلتاتسيا كوبەيىپ كەتكەن. بۇرىن كونسۋلتاتسيانىڭ كولەمى 10 ملرد تەڭگەدەن اسپاسا، قازىر 170 ملرد تەڭگەدەن اسىپ كەتكەن. ءبىر كونسۋلتاتسيانىڭ ىشىندە نە ايتۋى مۇمكىن؟»، - دەدى ۆيتسە-پرەمەر.

سونداي-اق، ول الەۋمەتتىك كومەك الۋشىلاردىڭ سانى جىل سايىن ءوسىپ كەلە جاتقانىن ايتتى.

«بىزدە كونتينگەنتتىڭ سانى جىلدان-جىلعا ءوسىپ كەلە جاتىر. قازىر بىزدەگى زەينەتكەرلەردىڭ سانى 2,4 ملن-عا جەتىپ وتىر. جىل سايىن 80-90 مىڭ ادام قوسىلادى. سونداي-اق، جاردەماقى الاتىن ادامداردىڭ سانى دا ارتىپ كەلەدى. قازىر 1,1 ملن ادام بار. دۇرىس ايتاسىز. ءبىز سوعان رەۆيزيا جاسايمىز. قاراجات قاراستىرىلعانىمەن ونىڭ ءبارىنىڭ ەسەبى بار. ءبىزدىڭ باستى ماقسات - ءار تيىندى ءتيىمدى قولدانۋ»، - دەدى ەرۇلان جاماۋباەۆ.

فوتو: اشىق دەرەككوزدەن

Abai.kz