اقوردا كادرلىق اۋىس-تۇيىستەردى بۇگىن دە جالعاستىرۋدا. كەشە ۇكىمەتتەگى تاعايىنداۋلاردىڭ ءبىرسىپىراسىن Abai.kz پورتالىندا جاريالادىق. ەندى كەزەك وبىس جانە قالا اكىمدەرىنە كەلگەن ەكەن. سونىمەن، بۇگىن كىمدەر كرەسلو اۋىستىردى؟ كىمدەر قىزمەتتەن الىندى؟

ەكولوگيا مينيسترلىگى: ءزۇلفيا كەتتى، ەرلان كەلدى

بۇگىنگى كۇننىڭ ءبىرىنشى تاعايىنداۋى – الگىندە عانا ەكىگە بولىنگەن قر ەكولوگيا جانە تابيعي رەسۋرستار مينيسترلىگىنەن باستالدى. مينيستر لاۋىزىمىنا ەرلان نۇرالىۇلى نىسانباەۆ تاعايىندالدى. بۇل قىزمەتتى وسىعان دەيىن ءزۇلفيا سۇلەيمەنوۆا اتقارىپ كەلگەن.

جاسى وتىزدان ەندى عانا اتتاعان (33 جاس) ءزۇلفيا بولاتقىزىنا بۇل قىزمەتكە بيىل قاڭتاردا عانا تاعايىندالعان. تۇپ-تۋرا 9 اي دەگەندە مينيسترلىك قىزمەتتەن الىنىپ وتىر. سۇلەيمەنوۆانىڭ اتىنا ايتىلعان سىننىڭ ەڭ ۇلكەنى – اباي وبلىسىنداعى ورمان ورتىمەن بايلانىستىرىلادى.

اقمولا وبلىسى: مينيسترلىكتەن اكىمدىككە...

ونان كەيىنگى تاعايىنداۋ قازاقستاننىڭ كۇنى كەشەگە دەيىنگى ىشكى ىستەر ءمينيسترى بولعان مارات احمەتجانوۆقا ويىستى. ەكس-مينيستر مارات احمەتجانوۆ اقمولا وبلىسىنا باسشى بولىپ تاعايىندالدى.

مارات احمەتجانوۆ 2022 جىلدىڭ اقپانىندا ىشكى ىستەر مينيسترلىگىن تىزگىندەگەن. سوزگە جۇيرىك، قازاقشاعا ءتىلى جاتىق، احمەتجانوۆ قازاقستاننىڭ ۇردا-جىق پوليتسياسىنا ايتارلىقتاي وزگەرىس جاساي العان جوق.

ال اقمولا وبلىسىن احمەتجانوۆقا دەيىن ەرمەك مارجيكپاەۆ باسقارىپ كەلگەن. ول قر تۋريزم جانە سپورت ءمينيسترى بولىپ تاعايىندالدى.

جامبىل وبلىسى: اۋىلشارۋاشىلىق ءمينيسترى شارۋالاردىڭ ماسەلەسىن شەشە الا ما؟

بۇگىنگى كۇننىڭ ءۇشىنشى تاعايىنداۋى – جامبىل وبلىسىندا بولدى. ايماقتى قازاقستاننىڭ بۇرىنعى اۋىلشارۋاشىلىق ءمينيسترى ەربول قاراشوكەەۆ تىزگىندەدى. ءدال وسى جامبىل وبلىسىنىڭ شارۋالارى بيىل ەگىن سۋىنىڭ تاپشىلىعىن باستان وتكەرىپ، وڭىردە توتەنشە جاعداي جاريالانعان. قىرعىزستان تالاستان اعاتىن سۋدى توقتاتىپ، جامبىلدىق شارۋالاردىڭ ەككەن ەگىسى قۋراپ قالعان ەدى. كۇنى كەشەگە دەيىن اۋىلشارۋاشىلىق ءمينيسترى بولعان قاراشوكەەۆ جامبىلدىق شارۋالاردىڭ ماسەلەسىن شەشە الا ما، كورە جاتارمىز.

ال جامبىل وبلىسىنىڭ قاراشوكەەۆكە دەيىنگى باسشىسى نۇرلان نۇرجىگىتوۆ قر سۋ رەسۋرستارى جانە يرريگاتسيا ءمينيسترى بولىپ تاعايىندالدى.

باق پەن ساياسي قوعامدىق ورتا اۋىس-ءتۇيىس جاسالاتىن ايماق باسشىلارىنىڭ قاتارىنا اقتوبە وبلىسى مەن شىمكەنت قالاسىنىڭ اكىمدەرىن دە جاتقىزادى. الايدا، اقوردا اتالعان ايماقتارعا قاتىستى ازىرگە ۇكىم-جارلىق جاريالاعان جوق.

ال حالىق وتستاۆكاسىن تالاپ ەتىپ، پەتيتسيا جاريالاعان الماتىنىڭ اكىمى ەربولات دوساەۆقا قاتىستى قىبىر ەتكەن قيمىل بايقالمايدى.

Abai.kz