تاياۋدا وتكەن الەۋمەتتىك-مادەني دامۋ كوميتەت وتىرىسىندا ەلىمىزدەگى ەڭ وزەكتى ماسەلە رەسەي ارنالارىنىڭ تەلەكەڭىستىگىمىزدى جاۋلاپ الۋى توڭىرەگىندە ءوربىدى.

دەپۋتات ماقسات تولىقباي: «...ودان كەيىن تاعى ءبىر ماڭىزدى ماسەلە بار: رەسەيلىك تەلەارنالاردىڭ قىزمەتىنە شەكتەۋ قويۋ كەرەك. بىزدە قازىر سول رەسەيلىك اقپارات كەڭىستىگىندە ءومىر سۇرەتىن ءبىراز وتانداسىمىز بار. رەسەيدىڭ پروپاگانداسىنا تويىپ العان. ۇلتارازدىق ماسەلەلەرى قىزىلجار بولسىن، باسقا جەرلەردە بولسىن تۋىنداپ تا جاتىر. قاراڭىزدارشى مەنىڭ ۇيىمدە تەلەديدار تۇر. مەنەن ەشكىم رۇقسات سۇراعان جوق. ۇيىمە كىرىپ الدى...سونى كورگەن بالالار ۋلانىپ جاتىر...ولار كىرگەنى ءۇشىن بىزگە اقشا تولەسىن. ءبىز سونى ساعالاپ، شەكتەۋ قويۋىمىز كەرەك.

رەيتينگ دەگەن پالە بار. تەلەارنالاردىڭ رەيتينگىسى قالاي ولشەنەدى. حالىق سانى 100 مىڭنان اسقان ءىرى قالالاردا 1 نەمەسە 2 ادامنىڭ ۇيىنە قوندىرعى قويادى سونىمەن ولشەيمىز. رەيتينگىگە قاراساڭ بۇكىل قازاق «پۋست گوۆوريات» كورەتىن سياقتى. حالىقتىڭ جارتىسى 40 پياىز قايدا تۇرادى، اۋىلدا تۇرادى. بىراق اۋىلدىقتار بىزدە ەسەپكە الىنبايدى. اۋىلدىڭ تۇرعىندارى ادام ەمەس پە؟ ءبىزدىڭ قازاقشا باعدارلامالاردىڭ عۇمىرى قىسقا بولاتىن دا سوندىقتان. مىسالى ءۇشىن «دومبىرا» دەيتىن تەلەارنا بار بىزدە. بايعۇس يەسى 4 كامەرەاسى بار، بۇكىل وڭىرلەردى ارالاپ، ءداستۇرلى انشىلەردى، ءبىزدىڭ كۇيشىلەردى ءتۇسىرىپ، يۋتۋبتان بەرىپ جاتىر. نەگە الما TV-عا بولسىن، باسقاسىنا بولسىن نەگە قوسىلمايسىڭ دەسەم، ايىنا 600 مىڭ تەڭگە تولەۋىم كەرەك دەيدى... ءبىر جىلعا 7 ملن. تەڭگە كەرەك. ەكى جىل تولەسە، شىعىنى 14 ملن. بولادى. سودان كەيىن الما TV تەگىن قوسادى دەيدى. ۇلتتىق ونەر، «دومبىرا» سياقتى تەلەارنالاردى نەگە قولدامايمىز. مىسالى «قالاۋلىم» قانشا؟ 3 ساعاتتىق ەفيرىنە 2 ملن. تەڭگە كەتىپ جاتىر. سوندا «دومبىرا» سياقتى ارنالارعا ءبىر جىلدىق بيۋدجەت بەرە المايمىز با؟ مەن سەنبەيمىن، بۇكىل قازاق «پۋست گوۆوريات»، «پولە چۋدەس» كورەدى دەگەنگە.

سوندىقتان مينيسترلىك اۋىلدى دا ەسەپكە الۋ كەرەك. ولارعا دا ولشەۋىش قۇرالداردى ەنگىزىپ، بىلمەيمىن ساۋالناما جۇرگىزەسىزدە مە، اۋىلداعى ءاربىر ءۇيدى ارالايسىزدار ما؟ ولشەۋىش قۇرال قوسىزدار ما، بۇل سىزدەردىڭ پروبلەمالارىڭىز!»، - دەپ ماسەلەنى توتەسىنەن قويدى.

مادەنيەت جانە اقپارات ۆيتسە-ءمينيسترى قانات ىسقاقوۆ دەپۋتاتىڭ ساۋالىنا تۇسىنىستىكپەن قاراپ: «رەسەيلىك تەلەارنالاردى كورمەۋ تۇگىلى، ولارعا اقشا تولەيمىز. ياعني ۋدى ءبىز ءوزىمىز ساتىپ الامىز. ەڭ الدىمەن ءبىز تولەم ماسەلەسىن شەشىپ الۋىمىز كەرەك. ءسىز كابىلدى وپەراتورعا ايىنا 5 مىڭ اقشا تولەيسىز عوي. سول بەس مىڭ اقشانىڭ ىشىنەن 3 مىڭىن ولار رەسەيگە تولەيدى. سوندىقتان ءبىز ءبىرىنشى وسى ماسەلەمەن جۇمىس ىستەيمىز. ياعني ءبىز سىرتقى ارنالارعا اقشا تولەمەۋدەن بوساتامىز. ءبىز شەتەلدىك ارنالارعا اقشا تولەسەك، ءوز ارنالارىمىز كابىلدى وپەراتورعا اقشا تولەيدى. قۇداي قالاسا وسى جولى بۇل ماسەلە ناقتى شەشىمىن تاباتىن بولادى»، - دەپ تۇششىمدى جاۋاپ بەردى.

ەندى بىزگە مادەنيەت جانە اقپارات مينيسترىلىگىنڭ وسى ماسەلەنى جىل سوڭىنا دەيىن قالاي شەشەتىندىگىنە سىرت كوز باقىلاۋشى بولۋ عانا قالدى.

Abai.kz