15 ملرد تەڭگەنىڭ سۇراۋى قايدا، «سامۇرىق-قازىنا»؟
«سامۇرىق-قازىنانىڭ» ەنشىلەس كومپانيالارى 15 ملرد تەڭگەنى قالاي جوق قىلدى؟!
بۇگىندە مەملەكەت ىشىندەگى مەملەكەتكە اينالعان «سامۇرىق-قازىنا» قورىنىڭ باس سۇقپاعان سالاسى قالمادى، - دەپ جازادى dalanews.kz.
«فوند-بيۋرو راسسلەدوۆانيا كوررۋپتسي» تەلەگارام ارناسى 2020 جىلى قورعا قارايتىن «سامۇرىق-ەنەرگو» اق-عا قاراستى «Ereymentau Wind Power» جشس قۇنى 26,1 ملرد تەڭگەنى قۇرايتىن 50 مۆت-تىق جەل ەلەكتر ستانسالارىن سالۋ ءۇشىن تەندەر وتكىزىپ، ناتيجەسىندە جەڭىمپاز دەپ تانىلعان «وليمپ ترانس سەرۆيس» سەرىكتەستىگى اقشانىڭ جارتىسىنان كوبىن قالتاعا باسىپ الىپ، مىندەتتمەسىن ورىنداماعانىن جازدى.
ارنانىڭ حابارلاۋىنشا، بۇل بىلىقتى استانا قالاسىنىڭ ىشكى اۋديت دەپارتامەنتى انىقتاپ، سەرىكتەستىك مەملەكەتتىڭ 15 ملرد تەڭگەسىن تالان-تاراجعا سالىپ، ۋادە ەتكەن جەل ەلەكتر ستانساسىن سالماعانىن جاريا ەتكەن.
كەلىسىم-شارتقا ساي اقمولا وبلىسىنىڭ اۋماعىندا سالىنۋى ءتيىس جەل ەلەكتر ستانساسى 2021 جىلدىڭ 4 ماۋسىمىندا، ياعني، 17 ايدىڭ ىشىندە قولدانىسقا بەرىلۋى كەرەك ەدى. بىراق جەل ەلەكتر ستانساسىنىڭ قارا-قۇراسى دا جوق.
2020 جىلى مەردىگەرگە 10,5 ملرد تەڭگەنى قۇرايتىن اۆانستىق تولەمدى «Ereymentau Wind Power» جشس-ى تولىق كولەمدە تولەگەن.
ارادا ءبىرشاما ۋاقىت وتكەننەن كەيىن اتالعان كومپانيا جەلدەن قۋات كوزىن وندىرەتىن 11 قوندىرعىنا ەلگە جەتكىزۋ ءۇشىن كەلىسىم-شارتتا كورسەتىلگەن اۆانستىق تولەمنىڭ از ەكەنىن ايتىپ، ونىڭ مولشەرىن كوبەيتۋدى تالاپ ەتكەن.
بۇدان كەيىن تاپسىرىس بەرۋشى مەردىگەردىڭ كەلىسىم-شارتقا قايشى كەلەتىن تالابىنا نازار اۋدارماستان، تاعى دا 5,5 ملرد تەڭگە اۋدارعان. مەردىگەر قوسىمشا قارجى السا دا كەلىسىم-شارتتا كورسەتىلگەن ءوزىنىڭ مىندەتتەمەسىن مۇلدە ورىنداماعان.
بۇگىندە «سامۇرىق-ەنەرگوعا» قارايتىن «Ereymentau Wind Power» كومانياسى مەردىگەردىڭ ايتقانىنا كونىپ، كەلىسىم-شارتتا كورسەتىلگەن اۆانستىق تولەم ماسەلەسى وزدەرى ساقتاماعان سوڭ، جوبانى ساقتاندىرۋشى كومپانيا ولارعا ساقتاندىرۋ تولەمىن تولەۋدەن باس تارتقان.
تەلگارام ارنا مەملەكەت قاراجىتىن قايتارۋعا قاتىستى ەشقانداي جۇمىستار ءجۇرىپ جاتپاعانى ءمالىم العا تارتتى.
ال «سامۇرىق-قازىنا» ءال-اۋقات قورى ءوزىنىڭ ەنشىلەس كومپانياسىنا انىقتالعان زاڭبۇزۋشىلاقتاردى جويىپ، بۇل ىسكە قاتىسى بار تۇلعالاردى انىقتاۋدى تاپسىرعان. بولعان-بىتكەنى وسى.
وسىلايشا «سامۇرىق-ەنەرگونىڭ» جاسىل ەنەرگەتيكانى دامىتۋعا قاتىستى ءبىر جوباسى ساتسىزدىككە ۇشىراپ، بىردە-ءبىر جەل ەلەكتر ستانساسى سالىنبادى. ال بۇل جاعدايدان كەيىن «سامۇرىق-قازىنانىڭ» ەلىمىزدە اتوم ەلەكتر ستانساسىن سالاۋعا قاتىستى باستاماسىنا حالىق قالاي قولدايدى. اەس سالۋعا بولىنگەن مەملەكەت قارجىسى ۇستاعاننىڭ قولىندا، تىستەگەننىڭ اۋىزىندا كەتپەيدى دەگەنگە كىم سەنەدى؟
وسىداي ارەكەتتەر ەل ازاماتتارىنىڭ بيلىككە دەگەن سەنىمىن جوعالتاتىنى انىق. ال ونىڭ ويلاپ، باس قاتىرعان «سامۇرىق-قازىنا» قورىن بايقامادىق. حالىق الدىنداعى سەنىم، رەپۋتاتتسيا نۇقسان كەلسە، ونى قايتادان جوندەپ الاتىن كولىك ەمەس ەكەنىن قور باسشى نۇرلان جاقىپوۆ نەگە تۇسىنبەيدى؟!
وسى ءبىر وقيعادان «سامۇرىق-قازىنانىڭ» يەگىنىڭ استىندا نە بولىپ جاتقانىن كورمەيتىن، سەزبەيتىن ەبەدەيسىز قۇرىلىمعا اينالعانىن بايقاۋعا بولادى.
قوردا ەنشىلەس كومپانيالارىنىڭ نەندەي ماسەلەمەن اينالىسىپ جاتقانىن قاداعالايتىن جۇزدەگەن مەنەدجەر بار. سولار «Ereymentau Wind Power» جشس-نىڭ كەلىسىم-شارتتاعى الدىن الا تولەم ماسەلەسىن بۇزۋىنا قالايشا جول بەردى دەگەن ساۋال تۋىندايدى.
مۇنى «سامۇرىق-قازىنا» مۇنى بايقاماي قالىپتى دەيىك، ال ەلىمىزدە سالىنىپ جاتقان ەنەرگەتيكالىق نىسانداردىڭ باستى قاداعالاۋشىسى رەتىندە بەلگىلەنگەن «سامۇرىق-ەنەرو» اق اسپانعا قاراپ، جۇلدىز ساناعان با؟ سۇراق كوپ جاۋاپ جوق.
مەملەكەتتىڭ قارجىسىن جەلگە شاشاتىن مۇنداي تىزبەكتەلگەن كومپانيالاردىڭ بىزگە قاجەتى قانشا؟ وسى جايتتان كەيىن «سامۇرىق-قازىنانى» تارقاتىپ، ونىڭ قۇزىرەتىن مينيسترلىكتەرگە ءبولىپ بەرۋ كەرەك بايقايسىڭ.
Abai.kz
