مەنىڭ وسى وزدەرىن وپپوزيتسيادا ءجۇرمىن دەپ ەسەپتەيتىن جىگىتتەردىڭ كەيبىر قىلىقتارىنا تاڭ قالامىن. ءبارى بىردەي ەمەس، ارينە. الايدا ولاردىڭ ىشىندە نە ءومىردى بىلمەيدى، نە ساياسي كۇرەستىڭ قانداي بولاتىندىعىن مۇلدەم تۇسىنبەيتىندەر دە جەتىپ ارتىلادى.

وندايلار ءۇشىن الەمجەلىگە شىعىپ، بيلىكتى سىناعان بولىپ، اقىلدى سوزدەر ايتىپ، كوپشىلىكتىڭ كوڭىلىن اۋدارسام بولدى، ءبارىن دە قالپاقپەن ۇرىپ الام دەپ ەەپتەيدى.

قالىڭ جۇرتشىلىقتىڭ الدىندا كوش باستاۋ ءۇشىن الدىمەن ءوزىڭ تازا بولىپ، اتقارعان ىستەرىڭنەن ءمىن شىقپاۋى كەرەك. حالىقتىڭ مۇڭ-مۇددەسىمەن بىرگە ءومىر سۇرسەڭ عانا، مۇراتقا جەتەسىڭ. ال الەم جەلىدە اندا-ساندا جىلت ەتىپ، ادەمى سويلەۋ ۇنەمى ابىروي اپەرە بەرمەيدى.

ماسەلەن، ءبىر كەزدەردە الەمجەلىدە اسا بەلسەندى ارمان شوراەۆ دەگەن جىگىت اعاسى بولدى. وزەكتى ماسەلەلەردى قوزعاپ، ساياساتتا الدىنا جان سالمادى. پارلامەنت دەپۋتتىعىنا سايلاۋ باستالعاندا ودان قاتتى ۇمىتكەر بولدى. بۇل ناۋقان اياقتالىسىمەن الگى جىگىتىمىز كوزدەن بۇل-بۇل ۇشتى. قازىر ەش جەردە دە جوق. الەمجەلىدەن مۇلدەم عايىپ بولدى. تەك ءبىر وكىنىشتىسى، ءوزىن شىنىمەن سىيلايتىن مىڭداعان جانكۇيەرلەرىمەن دۇرىستاپ قوشتاسۋعا دا جارامادى. مۇنىسىن تۇسىنبەدىك، ارينە.

دەسەك تە، ءبىزدىڭ توپشىلاۋىمىزشى مۇنىڭ ءبىر عانا سەبەبى بار. ول دەپۋتتتىققا وتە الماۋىنا ءوز وقىرماندارىن كىنالايتىن سەكىلدى. مۇنىسى ۇلكەن قاتەلىك، ارينە. الەمجەلىدە وتىرعان مىڭداعان دوستارىنىڭ بارلىعى بىردەي سايلاۋعا بارىپ، بەلسەندى تۇردە داۋىس بەرەدى دەۋ ۇلكەن اداسقاندىق.

ولاردىڭ دەنى سەنى قۇلاي تىڭداعانىمەن، كۇنى ەرتەڭ ديۆاننان جۇمساق جەرىن كوتەرىپ، ساعان داۋىس بەرۋگە بارمايدى. ولار سونداي ەرەكشە كونتينگەنت. بۇلارعا سەنۋ - باسى ارتىق دۇنيە. دۇرىسى، بارلىق سايلاۋ ۋچاسكەلەرىن جاياۋ ارالاپ، حالىقپەن بەتپە-بەت كەزدەسۋ. سوندا عانا ءبىر ناتيجە بەرەدى.

رينات زايىتوۆ پەن ەرمۇرات باپي ءدال وسىلاي ىستەدى. ونىڭ ۇستىنە بۇلاردىڭ ءومىرباياندارىندا ەشبىر كىنارات جوق. بيزنەسمەن دە ەمەس. ال ارماننىڭ ءبىر كەزدەردە داريعامەن قويان-قولتىق دۇمىس ىستەگەنى بار. ونىڭ پارتياسىندا بولدى. ارينە، مۇنى وعان كىنا قىلىپ تاعۋ دا ارتىق شىعار. الايدا قازىر ەسكى قازاقستاندا نازارباەۆتىڭ وتباسىنا جاقىن بولىپ، مايلى جىلىكتىڭ باسىن ۇستاعاندارعا كوپشىلىكتتىڭ قۇلاي سەنە قويۋى قيىن.

بۇل مەنىڭ جەكە باسىمنىڭ پىكىرى. ايتپەسە ارماننان التى الاسىم، جەتى بەرىسىم جوق. ونىڭ مىقتى جۋرناليست بولعاندىعىن دا جاقسى بىلەمىن. حالىقتىڭ قامىن ويلايتىن ازعانتاي ازاماتتاردىڭ قاتارىنان ەكەندىگىن دە مويىندايمىن. مەنىكى تەك ساياسي كۇرەستىڭ قۇيتىرقىسى كوپ بولاتىندىعىن ەسكە سالىپ ءوتۋ عانا. ءبىر رەت قانا سۇرىنگەن ءامىرجان قوسانوۆتىڭ تاعدىرى وسىنىڭ كۋاسى.

جايبەرگەن بولاتوۆ

Abai.kz